31. यीशु केर पानी उपरे चलेक

पाँच हजार लोग गिला के खियाल बादे, यीशु आपन चेला गिला के नाव मेहेन चापेक तेहें कहलक। ऊ उमन के झील केर दसर धार बाटे जायेक तेहें कहलक जखन कि ऊ थोड़ेक समइ केर तेहें हुआँइ रुइक गेलक। सेतेहें चेला गिला चइल गेलयँ आर यीशु भीड़ के विदा करलक कि उमन आपन घर जाउन। इकर बादे, यीशु पारथना करेक तेहें एकटा पहाड़ उपरे चइल गेलक। हुआँ ऊ एकलाइ रहे, आर ऊ ढेइर राइत तक पारथना करलक।

उ समइ, चेला गिला आपन नाव के चलात के जात रहयँ, किन्तु हवा उमनेक बिरुद्ध बेजाइन आँटे बहत रहे। बेजाइन राइत हय गेलक तेउ उमन केबल झील केर माझ मेहनेइ पहँचल रहयँ।

उ समइ यीशु पारथना करेक सिरालक आर आपन चेला गिला केर पासे वापस जायेक सुरु करलक। ऊ नाव बाटे जायेक तेहें पानी केर उपरे चले लागलक।

तखन चेला गिला उके देखलयँ। उमन बेजाइन डराय जाय रहयँ काहेकि उमन सोंइच रहयँ कि ऊ कनअ भूत हेके। यीशु जानत रहे कि उमन डराय जाय रहयँ, सेतेहें ऊ उमन के आवाज दे कहन कहलक, “ना डरावा, मयँ हेकँ!”

तखन पतरस यीशु के कहलक, “ए परभु, जदि तयँ हेकिस हले मके पानी उपरे चइल कहन तर पासे आयेक केर आदेस देहिन।” यीशु पतरस के कहलक, “आविन!”

सेतेहें पतरस नाव लेक उतइर गेलक आर यीशु केर पासे जायेक तेहें पानी उपरे चलेक सुरु करलक। किन्तु थोड़ेक दूर जाय कहन, ऊ आपन आँइख गिला के यीशु लेक मुइड़ लेलक आर ढेउ गिला के देखेक आर तेज हवा के महसूस करेक सुरु कइर देलक।

तखन पतरस डराय गेलक आर पानी मेहेन डुबे लागलक। ऊ चिलालक, “ए परभु, मके बाँचाइन!” यीशु ओहे समइ हाथ लम्बा कइर कहन उके धइर लेलक। तखन ऊ पतरस के कहलक, “तर बिसास बेजाइन कम आहे! तके सुरछित राखेक तेहें तयँ मर उपरे भरसा काहे नाइ करले?”

तखन यीशु आर पतरस नाव उपरे चाइप गेलयँ, आर तुरुत हवा केर बहेक बन्द हय गेलक। पानी सान्त हय गेलक। चेला गिला चकित हय कहन यीशु केर आघुवे हेंठु टेइक देलयँ। उमन उकर आराधना करलयँ आर उके कहलयँ, “सचमुच तयँ परमेश्‍वर केर बेटा हेकिस।”