32. यीशु केर दुस्टात्मा ग्रस्त अदमी आर एकटा रोगी बेटी छुवा के चंगा करेक

यीशु आर उकर चेला गिला आपन नाव मेहेन चाइप कहन उ इलाका मेहेन गेलयँ जहाँ गिरासेनी लोग गिला रहत रहयँ। उमन उ इलाका मेहेन पहँइच कहन नाव लेक नाभलयँ।

हुआँ एकटा अदमी रहे जे दुस्टात्मा लेक ग्रस्त रहे।

इ अदमी टा एतना बलिमान रहे कि केउ उके आपन अधीन मेहेन नाइ करे पाइर रहयँ। कयो धाँव लोग गिला उके हाथ गिलाय आर गड़ गिलाय सिकड़ लेकउ बाँधलयँ, किन्तु ऊ उ गिला के टुटाय देत रहे।

ऊ अदमी टा उ इलाका मेहेन मसना गिलाय रहत रहे। इ अदमी गोटा दिन आर राइत चिलाय बुलत रहे। ऊ लूगा नाइ पिंधत रहे आर खने-खने खुद के पाखना लेक छेंछाय हय कहन लहूलुहान कइर देत रहे।

उ अदमी टा कुइद कहन यीशु तहाँ आलक आर उकर पासे हेंठु टेइक देलक। तखन यीशु उ अदमी केर भीतर केर दुस्टात्मा लेक कथा करलक आर कहलक, “इ अदमी भीतर लेक बाहिर निकइल आइन!”

उ दुस्टात्मा टा डबल आँटे चिलालक, “ए यीशु, परम परधान परमेश्‍वर केर बेटा, तर मर लेक का काम? किरपा कइर कहन मके ना सताबे!” तखन यीशु उ दुस्टत्मा के पुछलक, “तर का नाम हेक?” उ जबाब देलक, “मर नाम पालटन हेके, काहेकि हामरे बेजाइन आही।” (रोमी पालटन मेहेन कयो हजार पालटन गिला केर एकटा दल एकटा “पालटन” हत रहे।)

उ दुस्टात्मा गिला यीशु लेक अर्जी करलक, “किरपा कइर कहन हामरे के इ इलाका लेक बाहिर ना पइठाइन!” उठिन पासेइ पहाड़ उपरे सुअर गिला केर एकटा गठ चरत रहे। सेतेहें उ दुस्टात्मा गिला यीशु लेक अर्जी करलयँ, “किरपा कइर कहन हामरे के सुअर गिलाय पइठाय देहिन!” यीशु कहलक, “ठीक आहे, उमन मेहेन चइल जावा!”

सेतेहें उ दुस्टात्मा गिला उ अदमी भीतर लेक निकइल कहन उ सुअर गिलाय समाय गेलयँ। उ सुअर गिला कुइद कहन एकटा टुँगरी उपर लेक झील मेहेन डेइग देलयँ आर डुइब मरलयँ। उ गठ मेहेन करिबन दुइ हजार सुअर गिला रहयँ।

हुआँ उ सुअर गिलाक चरवाह गिला रहयँ। जे कनअ हय रहे जखन उमन उटा के देखलयँ तो उमन नगर मेहेन भाइग गेलयँ। यीशु जेटा कइर रहे सेटा के उमन सभे टाके कइह देलयँ। उ नगर केर लोग गिला बाहराय आलयँ आर उ अदमी के देखलयँ जेकर मेहेन दुस्टात्मा गिला रहयँ। ऊ सचेत, लूगा पिंधल, आर एकटा सामान्य अदमी निहार बेबहार करत के बइसल रहे।

उ लोग गिला बेजाइन डराल रहयँ आर उमन यीशु के चइल जायेक तेहें कहलयँ। सेतेहें यीशु नाव उपरे चेइड़ गेलक। ऊ अदमी टा जेकर मेहेन दुस्टात्मा गिला रहयँ ऊ यीशु केर संगे जायेक तेहें अर्जी करलक।

किन्तु यीशु उके कहलक, “नाहीं। मयँ चाहलाँ कि तयँ घर जाय कहन सउब लोग गिला के कइह देहिन कि परमेश्‍वर तर तेहें का कइर आहे। उमन के कइह देहिन कि केसन परमेश्‍वर तर उपरे दया कइर रहे।”

सेतेहें उ अदमी टा चइल गेलक आर सउब के इ बारे कइह देलक जेटा यीशु उकर तेहें कइर रहे। उकर कहनी के सुनइया हर एक झन चकित रहयँ।

यीशु झील केर दसर धार बाटे घुइर आलक। उकर हुआँ पहँचेक बादे, एकटा बड़े भीड़ उकर आसे पासे जामा हलयँ आर उके चिपे लागलयँ। उ भीड़ मेहेन एकटा बेटी छुवा रहे जे बारो बछर लेक लहू बहे केर समस्या लेक पीड़ित रहे। उ आपन सउब धन बइद्ध गिला के दे दे रहे ताकि उमन उके बेस करे पारयँ, किन्तु उकर रोग टा आरो बेसी बाढ़ते जाय रहे।

ऊ सुइन रहे कि यीशु कयोटा रोगी गिला के बेस कइर रहे आर ऊ सोंचलक, “मयँ निश्‍चित आहँ कि जदि मयँ केबल यीशु केर लूगा केइ छुइ लेमु, हले मयँ बेस हय जामु!” सेतेहें ऊ यीशु केर पेछु बाटे लेक आलक आर उकर लूगा के छुइ लेलक। जेसनेइ उ उके छुलक, लहू केर बहेक बन्द हय गेलक।

तुरतेइ, यीशु जाइन लेलक कि उकर भीतर लेक सामर्थ निकइल आहे। सेतेहें ऊ पेछु बाटे मुहाय कहन पुछलक, “मके के छुलक?” चेला गिला जबाब देलयँ, “हिआँ एतना बेसी लोग गिला तर चाइरो धार बाटे भीड़ लगाय आहयँ, आर तके ढेकलतहयँ। हलउ तयँ काहे पुछले कि मके के छुइ आहे?”

ऊ बेटी छुवा टा यीशु केर पासे काँपत के आर बेजाइन डराल आपन ठेमनाय बइस गेलक। तखन उ उके कइह देलक कि उ का कइर आहे, आर इटाउ कि ऊ बेस हय जाय आहे। यीशु उके कहलक, “तर बिसास टाइ तके चंगा कइर आहे। सान्ति लेक जाहिन।”