33. एकटा किसान केर कहनी

एक दिन, यीशु झील केर धार पासे रहे। ऊ लोग गिला केर एकटा बड़े भीड़ के सिछा देत रहे। उके सुनेक तेहें एतना बेसी लोग आलयँ कि यीशु केर पासे उ सभे लेक कथा करेक तेहें जायगा नाइ बाँचलक। सेतेहें ऊ पानी मेहेन ठाड़ नाव उपरे चाइप गेलक। हुआँ ऊ बइस गेलक आर लोग गिला के सिछा देलक।

यीशु उमन के इ कहनी टा के सुनालक, “एकटा किसान बिहिन बुनेक तेहें बाहिर बाहरालक। जखन ऊ हाथ गिला लेक बिहिन गिला के छिंटत रहे तो थोड़ेक बिहिन गिला डहरे गिरलक। किन्तु चरइ गिला आय कहन उ सउब बिहिन गिला के खाय लेलयँ।”

“दसर बिहिन गिला पाखना भूँईये जहाँ बेजाइन कम माटी रहे। पाखना भूँईये गिरल बिहिन गिला बेजाइन चाँड़े अंकुरित हलक, किन्तु उटाक जेइर भूँई मेहेन भीतर तक जायेक मेहेन सक्षम नाइ रहे। जखन सूरुज उगलक आर गरम हलक तो उ पौधा गिला मुरझाय गेलक आर मइर गेलक।”

“तेउ दसर बिहिन गिला झूँड़ गिलाक माझे गिरलक। उ बिहिन गिला बाढ़े सुरु हलक, किन्तु काँटा गिला उटा के दबाय देलक। सेतेहें झूँड़ भूँईये गिरल बिहिन मइध लेक जनमल पौधा मइध लेक कनअए अनाज उत्पन्‍न नाइ करे पारलक।”

“दसर बिहिन बेस भूँईये गिरलक। उ बिहिन गिला बाढ़लक आर जतना बिहिन बुनल जाय रहे उटा लेक तीस, साइठ, आर हिआँ तक कि सअ गुना अनाज उत्पन्‍न करलक। जे केउ परमेश्‍वर केर पेछुवे चलेक चाहयलाँ, ऊ उ कथा उपरे धेयान देइ जेटा मयँ कहतहँ!”

इ कहनी टा चेला गिला के उलझन मेहेन डाइल देलक। सेतेहें यीशु उकर माने कइह देलक, “उ बिहिन टा परमेश्‍वर केर बचन हेके। उ डहर टा एकटा एसन लोग हेके जे परमेश्‍वर केर बचन के सुनेला, किन्तु उटा के समझेला नाहीं। तखन सयतान उकर पास लेक बचन के चराय लेला। यानि कि सयतान उके बचन के समझेक लेक दूर राखेला।”

“उ पाखना भूँई टा एसन लोग हेके जे परमेश्‍वर केर बचन के सुनेला आर आनन्द लेक उटा के स्वीकार कइर लेला। किन्तु जखन मुस्किल समइ आयला, चाहे जखन दसर लोग गिला उके सतायलाँ, तो उ परमेश्‍वर लेक दूर चइल जायला। यानी ऊ परमेश्‍वर उपरे भरसा करेक बन्द कइर देला।”

“उ झूँड़ भूँई टा एसन लोग हेके जे परमेश्‍वर केर बचन के सुनेला। किन्तु ऊ बेजाइन बेसी कथा गिला केर बारे चिन्ता करेक सुरु कइर देला, आर ऊ बेजाइन धन कमायेक केर परयास करेला, आर ऊ बेजाइन चीज गिला के पायेक केर परयास करेला। थोड़ेक समइ केर बादे, एधाँव ऊ परमेश्‍वर के प्रेम करेक मेहेन सक्षम नेखे। सेतेहें जे उ परमेश्‍वर कर बचन लेक सिख रहे ऊ उटा के परमेश्‍वर केर खुस करेक मेहेन सक्षम नाइ करेला। ऊ गहम केर डाँटी गिला केर समान आहे जेटा कनअ अनाज उत्पन्‍न नाइ करेला।”

“किन्तु बेस भूँई टा उ लोग हेके जे परमेश्‍वर केर बचन के सुनेला, उकर उपरे बिसास करेला, आर फर उत्पन्‍न करेला।”