34. यीशु दसर कहनी गिला केर सिछा देला

यीशु परमेश्‍वर केर राइन केर बारे दसर बेजाइन बेसी कहनी गिला के सुनालक। उदाहरन केर तेहें, ऊ कहलक, “परमेश्‍वर केर राइज एकटा राई केर मन्जी केर समान आहे जेटा के केउ आपन खेत मेहेन बुइन देलक। तोहरे जानाला कि राई केर बिहिन सउब मन्जी गिलाय सउब लेक छोटे हयला।”

“किन्तु जखन राई केर बिहिन बाइढ़ जायला तो उटा बगइचा केर सउब गाछ गिलाय सउब लेक बड़े हय जायला, एतना बड़े कि चरइ गिला आय कहन उकर डाइर गिलाय आराम करयलाँ।”

यीशु एकटा दसर कहनी कइह देलक, “परमेश्‍वर केर राइज खमीर (सोडा) केर समान आहे जेटा के ले कहन एकटा बेटी छुवा सानल आटा मेहेन मेसाय देला तखन उटा गोटा सानल आटा मेहेन फैल जायला।”

“सरग केर राइज उ खजाना केर समान आहे जेटा के केउ खेत मेहेन लुकाय देलक। कनअ दसर लोग टा उ खजाना टाके मिल गेलक आर ऊ उटाके पायेक केर बेजाइन चाह करलक। सेतेहें ऊ उटा के फिन तइप देलक। ऊ आनन्द लेक एतना भरल रहे कि ऊ जाय कहन आपन सउब कुछ के बेंइच देलक ताकि ऊ उ खेत टाके किने पारे जहाँ उ खजाना टा रहे।”

“सरग केर राइज एकटा बेजाइन किमती सुद्ध मोती केर समानअ आहे। जखन केउ मोती गिला केर बेपारी उटा के पाय लेला तो ऊ उटा के किनेक तेहें आपन सउब कुछ के बेंइछ देला।”

हुआँ थोड़ेक लोग गिला रहयँ जे सोंचत रहयँ कि परमेश्‍वर उमन के एहे तेहें स्वीकार करी काहेकि उमन भला काम करतहयँ। इ लोग गिला एसन लोग गिला के तुछ मानोयलाँ जे उ भला काम गिला के नाइ करयलाँ। सेतेहें यीशु उमन के कहनी कइह देलक: “दुइ झन रहयँ आर दुयोइ पारथना करेक तेहें मन्दिर मेहेन गेलयँ। उमनेक मइध लेक एक झन मासुल लेवइया रहे, आर दसर एकटा धारमिक आगुवा रहे।”

“उ धारमिक आगुवा टा इ रकम लेक पारथना करलक, ‘ए परमेश्‍वर, तर धन्यवाद हउक कि मयँ दसर लोग गिला केर समान- जेसन कि डाकू, अन्यायी मानुस, ब्यभिचारी,चाहे हियाँ तक कि हिआँ उपस्थित उ मासुल लेवइया केर समान एकटा पापी ना लागँ।’”

“उदाहरन केर तेहें, मयँ हर सप्ताह दुइ धाँव उपास राखलाँ, आर मयँ मके पावाइया धन आर सामान केर दसवाँ हिस्सा तके देवलाँ।”

“किन्तु ऊ मासुल लेवइया उ धारमिक आगुवा लेक बेजाइन दूरे ठाड़ हय गेलक। ऊ उपर सरग बाटे आँइखअ नाइ उठालक। इकर उलटा, ऊ आपन मुट्का लेक आपन छाती के पिटलक आर पारथना करलक, ‘ए परमेश्‍वर, किरपा कइर कहन मर उपरे दया करिन काहेकि मयँ एकटा पापी हेकँ।’”

फिन यीशु कहलक, “मयँ तोहरे लेक सत कहलाँ, परमेश्‍वर उ मासुल लेवइया केर पारथना के सुनलक आर उके धर्मी घोसित करलक। किन्तु ऊ उ धारमिक आगुवा केर पारथना के पसन्द नाइ करलक। परमेश्‍वर हर एक घमन्डी केर मुड़ के नीचा करेला, किन्तु ऊ हर उ लोग के आदर देला जे खुद के नम्र करेला।”