35. दयालू बाप केर कहनी

एक दिन, यीशु उ बेजाइन लोग गिला के सिछा देत रहे जे उकर सुनेक तेहें जामा हय रहयँ। इ लोग गिला मासुल लेवइया आर संगेइ दसर लोग गिलाउ रहयँ जे गिला मूसा केर बेबस्था केर पालन करे केर परयास नाइ करत रहयँ।

कुछ धारमिक आगुवा गिला देखलयँ कि यीशु इ लोग गिला लेक एकटा संगी केर समान कथा करत रहे। सेतेहें उमन एक दसर लेक इटा कहेक सुरु कइर देलयँ कि ऊ गलत करत रहे। यीशु उमन के कथा करत के सुनलक, सेतेहें ऊ उके इ कहनी टाके सुनालक।

“एकटा अदमी रहे जेकर दुइटा बेटा रहयँ। छोटे बेटा टा आपन बाप के कहलक, ‘ए बा, मके एखन मर हिस्सा चाही!’ सेतेहें बाप आपन दुइयो बेटा केर मइध मेहेन आपन सम्पत्ति केर बाँटवार कइर देलक।”

“चाँड़ेइ छोटे बेटा टा आपन सभे हिस्सा गिला के जामा कइर कहन दूर देस चइल गेलक आर पापी जीबन जीयेक मेहेन आपन सउब धन के बर्बाद कइर देलक।”

“इकर बादे, जहाँ छोटे बेटा रहे उ देस मेहेन एकटा भयंकर अकाल पड़लक, आर उकर पासे खायेक किनेक तेहें धन नाइ रहे। सेतेहें उके जे काम पावालक उटा सुअर गिला के चराय केर रहे। ऊ एतना दुखी आर भूखा रहे कि ऊ सुअर गिला केर चरा गिला के खायेक चाहत रहे।”

“आखिर मेहेन, उ छोटे बेटा टा खुद लेक कहलक, ‘मयँ का करतहँ? मर बा केर सउब धाँगर गिलाक पासे खायेक केर तेहें बेजाइन बेसी लेक आहे, तेउ मयँ हिंआ भूखे मरतहँ। मयँ आपन बा केर पासे वापस जामु आर आपन बाप केर एकटा धाँगर बनेक तेहें उकर लेक अर्जी करमु।’”

“सेतेहें उ छोटे बेटा वापस आपन बाप केर घर बाटे जायेक सुरु करलक। जखन कि ऊ एखन दुरेइ रहे, उकर बाप उके देखलक आर उकर उपरे तरस खालक। ऊ कुइद कहन आपन बेटा केर पासे गेलक आर उके पटइर कहन चुमलक।”

“ऊ बेटा टा कहलक, ‘हे बा, मयँ परमेश्‍वर केर आर तर बिरुद्ध पाप कइर आहँ। मयँ तर बेटा कहायेक लाइकअ नेखँ।’”

“किन्तु बाप आपन एकटा धाँगर के कहलक, ‘चाँड़े जाय कहन सउब लेक बेस लूगा ले कहन आइन आर मर बेटा के पिंधाइन! उकर आंगुर मेहेन आंगठी आर उकर गड़ गिलाय जूता गिला के पिंधाइन। फिन सउब बेस पसल जानवर के मरावा ताकि हामरे खाबिक आर खुसी मनाब, काहेकि मर बेटा मइर जाय रहे, किन्तु एधाँव ऊ जीयँत आहे! ऊ हेराय जाय रहे, किन्तु एधाँव हामरे उके पाय लेली!’”

“सेतेहें लोग गिला खुसी मनायेक सुरु करलँय। थोड़ेक समइ बितल बादे, बड़े बेटा टा खेत मेहेन काम कइर कहन घर आलक। ऊ गीत गायेक आर नाच डेक केर आवाज के सुनलक आर अचम्भित हलक कि इटा का हतेहे।”

“जखन बड़े बेटा के पता चललक कि उमन एहे तेहें खुसी मनात रहयँ काहेकि उकर भाई घर आय जाय रहे, तो ऊ बेजाइन खिंसालक आर घर नाइ समालक। उकर बाप बाहिर आय कहन उके उकर संगे खुसी मनाय केर अर्जी करलक, किन्तु ऊ मना कइर देलक।”

“ऊ बड़े बेटा आपन बाप के कहलक, ‘इ सउब बछर गिलाय मयँ तर तेहें इमानदार पूर्बक काम करलँ! कबउ तर कथा के नाइ टाललँ, किन्तु तयँ कबउ मके एकटा छोटे छागिर तक नाइ दे आहिस ताकि मयँ आपन संगी गिलाक संगे खावा पिया करे पारँ। किन्तु तर इ बेटा टा तर धन के पापी काम करेक मेहेन बर्बाद कइर दे आहे। आर एधाँव जखन ऊ आलक तो उकर तेहें खुसी मनायेक तेहें तयँ सउब लेक बेस पसल जानवर के मराय देले!’”

“बाप जबाब देलक, ‘ए मर बेटा, तयँ हमेसा मर संगे आहिस, आर जे कनअ मर हेके उ सउब तर हेके। किन्तु हामरेक तेहें खुसी मनायेक सही हेके काहेकि तर भाई मइर जाय रहे, किन्तु एधाँव जीयँत आहे। ऊ हेराय जाय रहे, किन्तु एधाँव हामरे उके पाय ले आही!’”