36. रुपान्तरन

एक दिन, यीशु आपन तीन टा चेला, पतरस, याकूब, आर योहन के आपन संगे लेलक। (इ योहन नामेक चेला उ अदमी ना लागे जे यीशु के बपतिस्मा दे रहे।) उमन पारथना करेक तेहें एकटा ऊँचा पहाड़ उपरे गेलयँ।

जखन यीशु पारथना करत रहे तो उकर चेहरा सूरुज केर समान चरका हय गेलक। उकर लूगा आलो निहार चरका हय गेलक, जेसन पिरथिबी मेहेन केउ उकर लेकउ बेसी चरका करे पारयँ।

तखन मूसा आर एलिय्याह भबिस्यद्बक्ता परगट हलयँ। इ पुरुस गिला इ पिरथिबी मेहेन इ समय लेक हजार लेकअ बेसी बछर पहिले रहत रहयँ। उमन यीशु लेक उकर मिरतु केर बारे कथा करलयँ, काहेकि ऊ चाँड़ेइ यरुशलेम मेहेन मइर जाइ।

जखन मूसा आर एलिय्याह यीशु लेक कथा करत रहयँ तखन पतरस यीशु के कहलक, “हामरेक तेहें हिआँ हयेक बेस हेके। हामरे तीनटा मंडप गिला के बनाब, एकटा तर तेहें, एकटा मूसा केर तेहें आर एकटा एलिय्याह केर तेहें।” किन्तु पतरस नाइ जानत रहे कि ऊ का कहतेहे।

जखन पतरस कथा करत रहे, तो एकटा चरका बादइर हेंठे आय कहन उमने उपरे आय गेलक। फिन उमन बादइर लेक एकटा आवाज के आत के सुनलयँ। ऊ कहलक, “इटा मर बेटा हेके जेके मयँ प्रेम करलाँ। मयँ उकर लेक खुस आहँ। उकर सुना।” इ तीनो चेला गिला डराय गेलयँ आर भूँईये गिर गेलयँ।

तखन यीशु उमन के छुलक आर कहलक, “ना डरावा। उठ जावा।” जखन उमन चाइरो बाटे देखलयँ, तो जे एक झन एखनअ हुआँ रहे ऊ यीशु रहे।

यीशु आर उ तीनअ चेला गिला उ पहाड़ लेक वापस हेंठे उतइर आलयँ। तखन यीशु उमन के कहलक, “एखन जे हिआँ हलक उकर चर्चा केकरअ लेक ना करबा। मयँ चाँड़ेइ मइर जामु आर फिन जीयँत हय जामु। उकर बादे, तोहरे के कइह देक पारतहँ।”