37. यीशु केर दाराय लाजर के मरल मइध लेक जीयँत करेक

लाजर नामेक एकटा अदमी रहे। उकर दुइटा बहिन गिला रहयँ जेकर नाम मरियम आर मार्था रहे। उ सउब यीशु केर नजदीकी संगी गिला रहयँ। एक दिन, केउ यीशु के कइह देलक कि लाजर बेजाइन रोगी रहे। जखन यीशु इटा सुनलक तो ऊ कहलक, “इ रोग टा लाजर के मरेक संगे सिराय नाइ जाइ। उकर उलटा, इटा लोग गिला के परमेश्‍वर केर आदर करेक तेहें प्रेरित करी।”

यीशु आपन संगी गिला लेक प्रेम करत रहे, किन्तु जहाँ ऊ रहे हुआँ ऊ दुइ दिन तक इतंजार करलक। उ दुइ दिन केर बादे, ऊ आपन चेला के कहलक, “आवा, वापस यहूदिया के जाबिक।” चेला गिला जबाब देलयँ, “किन्तु ए गुरु, एखन थोड़ेके समइ पहिले हुआँ केर लोग गिला तके मराय देक चाहत रहयँ!” यीशु कहलक, “हामरे केर संगी लाजर निदाय जाय आहे, आर मके उके जगायेक आहे।”

यीशु केर चेला गिला जबाब देलयँ, “ए परभु, जदि लाजर निदातेहे, हले ऊ बेस हय जाइ।” तखन यीशु उमन के साफा साफी कइह देलक, “लाजर मइर जाय आहे। मयँ आनन्दित आहँ कि मयँ हुआँ नाइ रहँ, ताकि तोहरे मर उपरे बिसास करे पारा।”

जखन यीशु लाजर केर गाँव पहँचलक तो लाजर केर मरल पहिले लेकेइ चाइर दिन हय चुइक रहे। मार्था यीशु लेक भेंट करेक तेहें बाहिर आलक आर कहलक, “ए परभु, जदि तयँ हिआँ हते हले मर भाई नाइ मरतक। किन्तु मयँ बिसास करलाँ कि जे कनए तयँ परमेश्‍वर लेक माँगबे ऊ तके देइ।”

यीशु जबाब देलक, “फिन जी उठेक आर जीबन मयें हेकँ। जे केउ मर उपरे बिसास करेला जदि ऊ मरीयो जाइ तेउ जीयँत हय घुरी। जे केउ मर उपरे बिसास करयलाँ ऊ कबउ नाइ मरी। का तयँ इ कथाय बिसास करिसला?” मार्था जबाब देलक, “ए परभु, मयँ बिसास करलाँ कि तयँ परमेश्‍वर केर बेटा मसीह हेकिस।”

तखन मरियम आलक। ऊ यीशु केर गड़ तले गिर कहन कहलक, “ए परभु, जदि तयँ हिआँ हते हले मर भाई नाइ मरतक।” यीशु उके पुछलक, “तोहरे लाजर के कहाँ राइख आहा?” ऊ उके कइह देलक, “मसना मेहेन, आविन आर देइख लेहिन।” तखन यीशु कान्दे लागलक।

ऊ मुर्दा गड़हा टा एकटा पाखना लाता रहे जेकर दुवाइरे एकटा पाखना के लुढ़काल जाय रहे। जखन यीशु मुर्दा गड़हा मेहेन पहँचलक तो ऊ उमन के कहलक, “पाखना टाके हटाय देवा।” किन्तु मार्था कहलक, “उकर मरल चाइर दिन हय चुइक आहे। उटा लेक बास आत हइ।”

यीशु जबाब देलक, “का मयँ तोहरे के नाइ कइह रहँ कि जदि तोहरे मर उपरे बिसास करबा हले परमेश्‍वर केर सामर्थ के देखबा?” सेतेहें उमन पाखना के हटाय देलयँ।

तखन यीशु उपर सरग बाटे देइख कहन कहलक, “ए बा, मर सुइन ले आहिस तेहें मयँ तर धन्यवाद करलाँ। मयँ जानलाँ कि तयँ हमेसा मर सुनिसला, किन्तु मयँ इटा हिआँ ठाड़ हल इ सउब लोग गिला केर साहेता करेक तेहें कहलँ ताकि इमन बिसास करुन कि तयँ मके पइठाय आहिस।” तखन यीशु आँटे कहलक, “ए लाजर, बाहिर निकइल आइन!”

सेतेहें लाजर बाहिर निकइल आलक! ऊ एखनअ कफन मेहेन लेपटल रहे। यीशु उके कहलक, “इ कफन टाके हटायेक मेहेन उकर साहेत करा आर उके आजाद करा।” इ चमत्कार केर चलते बेजाइन यहूदी गिला यीशु उपरे बिसास करलयँ।

किन्तु यहूदी गिला केर धारमिक आगुवा गिला यीशु लेक हिंसगाय जले लागलयँ, सेतेहें उमन जोजना बनायेक तेहें एके संगे जामा हलयँ कि केसन यीशु आर लाजर के माइर मराबिक।