38. यीशु केर संगे बिसासघात

हरेक बछर, यहूदी लोग गिला फसह केर परब मानत रहयँ। इटा एहे बारे मेहेन एकटा खुसी रहे कि कयो शताब्दी गिलाक पहिले परमेश्‍वर उमन केर पुर्बज गिला के मिस्र देस केर गुलामी लेक छोड़ाय रहे। करिबन तीन बछर केर बादे यीशु सार्बजनिक रुप लेक परचार करेक आर सिछा देक सुरु करलक। यीशु आपन चेला गिला के बतालक कि ऊ उमनेक संगे यरुशलेम मेहेन फसह केर परब के मानेक चाहेला, आर इटाउ कि ऊ हुआँ मराय देल जाइ।

यीशु चेला गिलाक मइधे एकटा यहूदा नामेक अदमी रहे। यहूदा प्रेरित गिलाक धन केर थइला राखेक केर प्रभारी रहे, किन्तु खने-खने ऊ उ थइला लेक पइसा गिला के निकलात रहे। यीशु आर चेला गिला यरुशलेम मेहेन पहँचल बादे यहूदा यहूदी आगुवा गिला केर पासे गेलक। ऊ धन केर बदली मेहेन यीशु के उमनेक हाथ धरुवायेक केर प्रस्ताव राखलक। ऊ जानत रहे कि यहूदी आगुवा गिला स्वीकार नाइ करत रहयँ कि यीशुवे मसीह रहे। ऊ जानत रहे कि उमन उके मरायेक चाहत रहयँ।

महायाजक केर कहल मोताबिक यहूदी आगुवा गिला यीशु के उमनेक हाथे धरुवायेक तेहें यहूदा के तीस चाँदी केर सिक्‍का देलयँ। इटा ओहे निहार हलक जेसन कि भबिस्यद्बक्ता कइह रहे कि हइ। यहूदा माइन गेलक आर धन ले कहन चइल गेलक। उमन यीशु के गिरफ्तार करेक मेहेन साहेता करेक तेहें कनअ मोका केर खोज करे लागलयँ।

यरुशलेम मेहेन, यीशु आपन चेला गिला केर संगे फसह केर परब मानालक। फसह केर भोज केर समइ, यीशु पिठा ले कहन टुटालक। ऊ कहलक, “इटा के लेवा आर खावा। इटा मर गात हेके जे मयँ तोहरेक तेहें देवलाँ। इटा के मर याइद मेहेन करबा।” इ निहार, यीशु कहलक कि ऊ उमनेक तेहें मइर जाइ, यानि उमनेक तेहें ऊ आपन गात के बलि चेढ़ाय देइ।

फिन यीशु एकटा अंगुर रस केर डुभी टाके लेलक आर कहलक, “इटा लेक पिया। इटा नावा वाचा केर मर लहू हेके जे कि मयँ उझलमु ताकि परमेश्‍वर तोहरेक पाप गिला के छमा करुक। हरेक धाँव इटा के पियेक समइ मर याइद मेहेन इटा के करा जे मयँ इखन करतहँ।”

तखन यीशु आपन चेला गिला के कहलक, “तोहरेक मइध लेक एक झन मके धरुवाइ।” चेला गिला चँइक गेलयँ, आर पुछे लागलयँ कि के एसन काम करी। यीशु कहलक, “मर धरुवाइया अदमी उ हेके जेके मयँ इ पिठा केर खेंचा टा के देवलाँ।” तखन ऊ उ पिठा टाके यहूदा के देलक।

उ पिठा टाके लेलक उकर बादे, यहूदा मेहेन सयतान समाय गेलक। यहूदा निकइल कहन यीशु के गिरफ्तार करेक तेहें यहूदी आगुवा गिला के साहेता करेक तेहें चइल गेलक। इटा राइत केर समइ रहे।

खायेक बादे, यीशु आर उकर चेला गिला जैतून पहाड़ उपरे चइल गेलयँ। यीशु कहलक, “तोहरे सउब आइज राइते मके छोइड़ देबा। इटा लिखल आहे, ‘मयँ चरवाह गिला के मरामु आर सउब भेड़ी गिला छिति-बिति हय जाबयँ।’”

पतरस जबाब देलक, “भलेइ बाकी सभे गिला तके छोइड़ देबयँ, मयँ नाइ छोड़मु!” तखन यीशु पतरस के कहलक, “सयतान तयँ सउब के लेक चाहिसला, किन्तु ए पतरस, मयँ तर तेहें पारथना कइर आहँ कि तयँ बिसास लेक चुइक ना जाहिन। तेउ, आइज राइते, खुकड़ी डाइक देइ उकर पहिले तयँ तीन धाँव इंकार करबे कि तयँ मके जानबअ नाइ करलाँ।”

पतरस तखन यीशु के कहलक, “भलेइ मयँ मरियो जामु, मयँ कबउ तर इंकार नाइ करमु!” बाकी सभे चेला गिलाउ एसने कहलयँ।

तखन यीशु आपन चेला गिला संगे गतसमनी नामेक जायगा मेहेन गेलक। यीशु आपन चेला के पारथना करेक तेहें कहलक ताकि सयतान उमन के परीछा ना करुक। तखन यीशु खुद पारथना करेक तेहें चइल गेलक।

यीशु तीन धाँव पारथना करलक, “ए मर बा, जदि सम्भव हइ हले किरपा कइर कहन इ दुख केर डुभी पियेक तेहें मके ना देहिन। किन्तु लोग गिला केर पाप छमा करल जायेक तेहें कनअ आरो दसर डहर नेखे, हले तरेइ हिंछा पूरा हउक।” यीशु बेजाइन बेयाकुल रहे आर उकर पसीना लहू केर टिपा निहार रहे। उके सामर्थ देक तेहें परमेश्‍वर एकटा सरगदूत के पइठालक।

हर धाँव पारथना करेक बादे, यीशु आपन चेला गिलाक तहाँ वापिस आलक, किन्तु उमन निदात रहयँ। जखन यीशु तिसर धाँव घुरलक तो यीशु कहलक, “जाइग जावा! मर धरुवाइया हिआँ आहे।”

यहूदी आगुवा, पालटन गिला, आर एकटा बड़े भीड़ केर संगे यहूदा आलक। उमन तलवाइर आर ठेंगा धइर रहयँ। यहूदा यीशु तहाँ आय कहन उके कहलक, “ए गुरु, परनाम,” आर उके चुइम लेलक। ऊ गिरफ्तार करेक जायेक अदमी टाके यहूदा आगुवा गिलाय परगट करेक तेहें एसन कइर रहे। तखन यीशु कहलक, “ए यहूदा, का तयँ एकटा चुम्बन लेक मके धरुवातिहिस?”

जखन उ पालटन गिला यीशु के धरत रहयँ, तो पतरस आपन तलवाइर बाहरालक आर महायाजक केर एकटा धाँगर केर कान टाके काइट देलक। यीशु कहलक, “तलवाइर के छँ कर! मयँ आपन बाप लेक मर बचाव करेक तेहें बिनती करे पारँ। किन्तु मके मर बाप केर कथा के मानेक आहे।” तखन यीशु उ अदमी केर कान के बेस कइर देलक। तखन सभे चेला गिला भाइग गेलयँ।