39. यीशु उपरे मुकद्दमा चलेला

एधाँव इटा राइत केर समइ रहे। उ पालटन गिला यीशु के महायाजक केर घर ले आनलयँ, काहेकि ऊ यीशु के सवाल करेक चाहत रहे। पतरस दूर लेक उमनेक पीछा करत रहे। जखन पालटन गिला यीशु के घर मेहेन ले गेलयँ, तो पतरस बाहिरे रुइक कहन खुद के आइग लेक गरम करे लागलक।

घर केर भीतरे, यहूदी आगुवा गिला यीशु उपरे मुकद्दमा चलालयँ। उमन उकर बिरुद्ध झूठा कथा कहेक तेहें ढेइरे झूठा गवाह गिला के ले कहन आलयँ। हालाँकि, उमनेक कथा गिला एक दसर लेक नाइ जुमलक, सेतेहें यहूदी आगुवा गिला इटा साबित नाइ करे पारलयँ कि ऊ कनअ कथा केर दोसी रहे। यीशु कनअ नाइ कहलक।

आखिर मेहेन, महायाजक यीशु बाटे देइख कहन कहलक, “हामरे के कइह देहिन कि का तयें जीयँत परमेश्‍वर केर बेटा मसीह हेकिस?”

यीशु कहलक, “मयँ हेकँ, आर तयँ मके परमेश्‍वर केर संगे बइसल आर सरग लेक आत कउ देखबा।” महायाजक आपन लूगा के फाइर लेलक काहेकि यीशु कहलक ऊ उ कथाय बेजाइन खिंसाय रहे। ऊ दसर आगुवा गिला के चिलाय कहन कहलक, “हामरे के इटा बतायेक तेहें कनअ आरो गवाह केर दरकार नेखे कि इ मानुस टा का कइर आहे! तोहरे खुदेइ उके इटा कहत के सुइन आहा कि उ परमेश्‍वर केर बेटा हेके। उकर बारे मेहेन तोहरे केर का निर्नय आहे?”

सउब यहूदी आगुवा गिला महायाजक के जबाब देलयँ, “ऊ मराय देक लाइक आहे!” तखन उमन यीशु केर आँइखे पट्टी बाँइध देलयँ, उकर उपरे थूकलयँ, उके मारलयँ, आर उकर मजाक उड़ालयँ।

आर पतरस, जखन ऊ घर केर बाहिरे इन्तजार करत रहे। तखन एकटा धाँगरिन उके देखलक। ऊ उके कहलक, “तयँअ यीशु केर संगे रहिस!” पतरस इंकार कइर देलक। बादे, कनअ दसर लड़की एहे कथा के कहलक, आर पतरस फिन इंकार कइर देलक। आखिर मेहेन, थोड़ेक लोग गिला कहलयँ, “हामरे जानिला कि तयँ यीशु केर संगे रहिस काहेकि तोहरे दुइयो झन गलील केर हेका।”

तखन पतरस कहलक, “जदि मयँ इ मानुस के जानलाँ हले परमेश्‍वर मके सराप देउक!” तुरतेइ पतरस इ निहार शपत खाल बादे, एकटा खुकड़ी डाइक देलक। यीशु पेछु बाटे मुहाय कहन पतरस के देखलक।

पतरस हुआँ लेक चइल गेलक आर फुइट-फुइट कहन कान्दलक। ओहे समइ, यीशु के धरुवाइया यहूदा देखलक कि यहूदी आगुवा गिला यीशु के मृत्युदंड दे आहयँ। यहूदा बेजाइन दुखी हय गेलक आर जाय कहन खुद के मराय देलक।

एधाँव उ देस केर राइजपाल पिलातुस रहे। ऊ रोम केर तेहें काम करत रहे। यहूदी आगुवा गिला यीशु के उकर पासे ले कहन आलयँ। उमन चाहत रहयँ कि पिलातुस उके मृत्युदंड देउक आर उके मराय देउक। तखन पिलातुस यीशु के पुछलक, “का तयँ यहूदी गिला केर राजा हेकिस?”

यीशु जबाब देलक, “तयँ सतेइ कइह आहिस। किन्तु मर राइज हिआँ पिरथिबी केर ना लागे। जदि हतक हले मर धाँगर मर तेहें युद्ध करतयँ। मयँ पिरथिबी मेहेन परमेश्‍वर केर बारे सच बतायेक तेहें आय आहँ। हर एक झन जे सच लेक प्रेम करेला ऊ मर सुनेला।” पिलातुस कहलक, “तो सच का हेके?”

यीशु केर संगे कथा करेक बादे, पिलातुस बाहिर भीड़ केर पासे जाय कहन कहलक, “मयँ एसन कनअ कारन नाइ पातहँ कि इ मानुस टा माइर देक लाइक हउक।” किन्तु यहूदी आगुवा गिला आर भीड़ चिल्‍लाय कहन कहलयँ, “उके क्रूस उपरे चेढ़ाय देहिन!” पिलातुस जबाब देलक, “ऊ कनअए गलत करे केर दोसीदार ना लागे।” किन्तु उमन आरो बेसी आँटे चिल्‍लाय लागलयँ। तखन पिलातुस तिसर धाँव कहलक, “ऊ दोसीदार ना लागे!”

पिलातुस डराय गेलक कि उ भीड़ केर लोग गिला दंगा करेक सुरु कइर देलयँ, सेतेहें ऊ आपन पालटन गिला केर दाराय यीशु के क्रूस उपरे चेढ़ायेक तेहें माइन गेलक। रोमी पालटन गिला यीशु के कोडराय मारलयँ, आर उके राइज पोसाक पिंधालयँ, आर उकर मुड़े काँटा गिला लेक बनाल मुकुट राखलयँ। तखन उमन इटा कइह कहन उकर मजाक उड़ाय लागलयँ, “देखा, यहूदी गिला केर राज!”