40. यीशु के क्रूस उपरे चेढ़ाल जातेहे

यीशु केर ठट्ठा करेक बादे, पालटन गिला उके क्रूस उपरे चेढ़ायेक तेहें ले गेलयँ। उमन क्रूस टाके उकेइ उठवालयँ जेटाय ऊ मरी।

उ पालटन गिला यीशु के उ जायगा मेहेन ले कहन आलयँ जे “मुड़ेक हाड़” कहायला आर उकर हाथ आर गड़ गिला के क्रूस मेहेन ठोंइक देलयँ। किन्तु यीशु कहलक, “ए बा, इमन के छमा करिन, काहेकि इ गिला नाइ जानतहयँ कि इ गिला का करतहयँ।” उमन एकटा तख्ता कउ उकर मुड़ केर उपरे टाँइग देलयँ। उटाय लिखल रहे, “यहूदी गिलाक राजा।” पिलातुस उमन लेक एहे टाइ लिखेक तेहें कइह रहे।

तखन पालटन गिला यीशु केर लूगा गिलाक तेहें चिट्ठी गिला डाललयँ। जखन उमन एसन करलयँ तो उमन उ भबिस्यद्वानी के पूरा करलयँ जे कहत रहे, “उमन मर लूगा गिला के आपस मेहेन बाँइट लेलयँ, आर मर लूगा केर तेहें चिट्ठी गिला डालयँ।”

हुआँ दुइटा डाकू गिलाउ रहयँ, जे गिला के पालटन गिला ओहे समइ मेहेन क्रूस उपरे चेढ़ाय रहयँ। उमन उ दुइयो के यीशु केर दुइयो बाटे राइख रहयँ। उमनेक मइध लेक एकटा डाकू यीशु के मजाक उड़ालक, किन्तु दसर टा कहलक, “का तयँ नाइ डराइसला कि परमेश्‍वर तके दंड देइ? हामरे ढेइरे खराब काम गिला के करेक केर दोसीदार आही, किन्तु इ मानुस टा निर्दोस आहे।” फिन ऊ यीशु के कहलक, “जखन तयँ आपन राइज मेहेन आबे हले किरपा कइर कहन मके याइद राखबे।” यीशु जबाब देलक, “आइजे तयँ मर संगे सरगलोक मेहेन हबे।”

यहूदी आगुवा गिला भीड़ केर दसर लोग गिला यीशु के मजाक उड़ालयँ। उमन उके कहलयँ, “जदि तयँ परमेश्‍वर केर बेटा हेकिस, हले क्रूस लेक हेंठे उतइर आइन आर खुद के बाँचाय लेहिन! तखन हामरे तर उपरे बिसास करबिक।”

तखन उ गोटा देस केर आकास पूरा पूरी करिया हय गेलक, भलेइ उ दिन केर दुपहर केर समय रहे। इ दुपहर केर समइ करिया हय गेलक आर तीन घन्टा तक एसने रहले रहे।

तखन यीशु डाइक कहन कहलक, “पूरा हलक! ए बा, मयँ आपन आत्मा तर हाथ मेहेन सोंइप देवलाँ।” तखन ऊ आपन मुड़ के झुकालक आर आपन परान के तेयाग देलक। जखन ऊ मरलक तो एकटा भूँईडल आलक। उ बड़े परदा जे परमेश्‍वर केर उपस्थिति लेक लोग गिला के अलग करत रहे ऊपर लेक हेंठ बाटे फाइट कहन दुइ भाग हय गेलक।

आपन मृत्यु केर दाराय, यीशु लोग गिलाक तेहें परमेश्‍वर केर पासे आय केर डहर खइल देलक। जखन यीशु केर निगरानी करइया एकटा पालटन जे कनअ हय रहे इ सउब के देखलक तो ऊ कहलक, “निश्‍चित रुप लेक, इ मानुस निर्दोस रहे। इ परमेश्‍वर केर बेटा हेके।”

तखन यूसुफ आर नीकुदेमुस नामेक दुइ झन यहूदी आगुवा गिला आलयँ। उमन बिसास करत रहयँ कि यीशुवे मसीह रहे। उमन पिलातुस लेक यीशु केर मुरदा के माँगलयँ। उमन उकर मुरदा टाके लूगा मेहेन लेपटालयँ। तखन उमन उके एकटा चट्‍टाइन मइधे काइट कहन बनाल जाय रहे मुरदा गड़हा मेहेन ले गेलयँ आर उकर भीतर राइख देलयँ। तखन उमन उ मुर्दा गड़हा केर दुवाइर के बन्द करेक तेहें एकटा बड़े पाखना के लुढ़काय देलयँ।