41. परमेश्‍वर यीशु के मरल मइध लेक जीयँत करेला

पालटन गिला केर दाराय यीशु के क्रूस उपरे चेढ़ाय देल बादे, यहूदी आगुवा गिला पिलातुस के कहलयँ, “उ झूठा, यीशु कइह रहे कि ऊ तीन दिन केर बादे मरल गिलाक मइध लेक जी उठी। केकउ के इटा निश्चित करेक तेहें मुर्दा गड़हा केर निगरानी करेक हइ कि उकर चेला गिला उकर मुर्दार के चराय कहन ना ले जाउन। जदि उमन एसन करयलाँ हले उमन कहबयँ कि ऊ मरल मइध लेक जी उइठ आहे।”

पिलातुस कहलक, “थोड़ेक पालटन गिला के ले जावा, आर जेसन तोहरे करे पारा ओसने मुर्दा गड़हा केर निगरानी करा।” सेतेहें उमन उ मुर्दा गड़हा केर समायेक दुवाइर केर पाखनाय एकटा मोहर लगाय देलयँ। उमन निश्‍चित करेक तेहें हुआँ पालटन गिला कउ बइसाय देलयँ कि केउ उकर मुर्दार टाके चराय ना पारुन।

यीशु केर मरेक बाद केर दिन सब्त केर दिन रहे। केउ सब्त केर दिने काम नाइ करे पारत रहयँ, सेतेहें यीशु केर कनअए संगी मुर्दा गड़हा तहाँ नाइ आय रहयँ। किन्तु सब्त केर बाद केर दिन, बिहान के उनगुते, थोड़ेक बेटी छुवा गिला यीशु केर मुर्दा गड़हा मेहेन जायेक तेहें तेयार हलयँ। उमन उकर मुर्दार मेहेन आरोइ मसाला गिला के लगाय चाहत रहयँ।

उ बेटी छुवा गिलाक पहँचेक लेक पहिले, मुर्दा गड़हाय एकटा बड़े भूँईडल हलक। सरग लेक एकटा सरगदूत आय कहन उ पाखना टाके लुढ़काय देलक जे मुर्दा गड़हा केर समायेक दुवाइर टा ढाँपल रहे आर उकर मेहेन बइस गेलक। इ सरगदूत टा आलो केर समान चमकत रहे। मुर्दा गड़हाय जन पालटन गिला रहयँ उमन उके देखलयँ। उमन एतना डराय जाय रहयँ कि मरल गिला निहार भूँईये गिर गेलयँ।

जखन उ बेटी छुवा गिला मुर्दा गड़हाय पहँचलयँ तो उ सरगदूत टा उमन के कहलक, “ना डरावा। यीशु हिआँ नेखे। ऊ मरल मइध लेक जी उइठ आहे, जेसन कि ऊ कइह रहे कि ऊ जी उठी! मुर्दा गड़हाय खजा आर देखा।” उ बेटी छुवा गिला मुर्दा गड़हा भीतर आर जहाँ यीशु केर मुर्दार टा राखल रहे हुआँ खज करलयँ आर देखलयँ तो उकर मुर्दार टा हुआँ नाइ रहे!

तखन उ सरगदूत टा उ बेटी छुवा गिला के कहलक, “जाय कहन उकर चेला गिला के बतावा, ‘यीशु मरल मइध लेक जी उइठ आहे आर ऊ तोहरे केर आघु आघु गलील के जाइ।’”

उ बेटी छुवा गिला अचम्भित हलयँ आर बेजाइन आनन्दित हलयँ। उमन चेला गिला के इ बेस खबर सुनायेक तेहें कुदलयँ।

जखन उ बेटी छुवा गिला चेला गिला के इ बेस खबर टाके बतायेक तेहें आपन डहरे रहयँ, तो यीशु उमनेक तहाँ परगट हलक। उमन उकर गड़ गिलाय गिर देलयँ। तखन यीशु कहलक, “ना डरावा। जाय कहन मर चेला गिला के गलील जायेक तेहें कहा। उमन हुआँ मके देखबयँ।”