42. यीशु सरग के घुइर जायला

जन दिन परमेश्‍वर यीशु के मरल मइध लेक जीयँत कइर रहे, उकर दुइटा चेला गिला पास केर गाँव मेहेन जात रहयँ। चलत के उमन यीशु केर संगे जेटा हय रहे। उटाक बारे मेहेन कथा करत रहयँ, उमन के आसा रहे कि उ मसीह रहे, किन्तु तखनउ उ मराय देल जाय रहे। एधाँव उ बेटी छुवा गिला कहयलाँ कि ऊ फिन जीयँत हय जाय आहे। उमन नाइ जानत रहयँ कि कन कथाय बिसास करेक आहे।

यीशु उमनेक तहाँ आय कहन उमनेक संगे चले सुरु करलक, किन्तु उमन उके चिन्हे नाइ पालयँ। ऊ पुछलक कि उमन का केर बारे कथा करत रहयँ। उमन उके बितल दिन गिलाय यीशु केर संगे हल सउब घटना केर बारे मेहेन बतालयँ। उमन सोंचलयँ कि उमन कनअ परदेसी लेक कथा करत रही जे नाइ जानत रहे कि यरुशलेम मेहेन का हय रहे।

तखन यीशु उमन के समझालक कि परमेश्‍वर केर बचन मसीह केर बारे का कहेला। ढेइर पहिले, भबिस्यद्बक्ता गिला कइह रहयँ कि खराब लोग गिला मसीह के पीड़ित करबयँ आर माइर देबयँ। किन्तु भबिस्यद्बक्ता गिला इटाउ कइह रहयँ कि ऊ तीसर दिने जी उठी।

जखन उमन उ नगर मेहेन पहँचलयँ जहाँ उ दुइ झन ठहरेक चाहत रहयँ, तखन तक करिबन सांझ हय जाय रहे। उमन यीशु के उमनेक संगे ठहरेक तेहें कहलयँ, सेतेहें ऊ उमनेक संगे एकटा घरे गेलयँ। आपन सांझ केर खायेक टाके खायेक तेहें परमेश्‍वर केर धन्यवाद देलक, आर फिन उटा के खेंचा करलक। अचकाय, उमन जाइन गेलयँ कि ऊ यीशु रहे। किन्तु ओहे खने, ऊ उमनेक आँइख लेक छिप गेलक।

उ दुइ झन एक दसर के कहलयँ, “ऊ यीशु रहे! सेतेहें जखन ऊ हामरे के परमेश्‍वर केर बचन के समझाय रहे तो हामरे बेजाइन उत्साहित रही।” तुरतेइ, उमन निकइल कहन वापस यरुशलेम के गेलयँ। जखन उमन पहँचलयँ तो उमन चेला गिला के बतालयँ, “यीशु जीयँत आहे! हामरे उके देइख आही!”

जखन चेला गिला कथा करत रहयँ, यीशु अचकाय उमनेक कठरी मेहेन उमनेक संगे परगट हलक। ऊ कहलक, “तोहरे के सान्ति मिलुक!” चेला गिला सोंचलयँ कि ऊ कनअ भूत रहे, किन्तु यीशु कहलक, “तोहरे काहे डराताहा? तोहरे इटा काहे नाहीं सोंचताहा कि इटा सचमुच मेहेन मयँ, यीशु हेकँ? मर हाथ गिला आर गड़ गिला के देखा। भूत गिला केर एसन गात नाइ हयला जेसन मर पासे आहे।” इटा देखायेक तेहें कि ऊ कनअ भूत नाइ रहे, ऊ खायेक केर कनअ माँगलक। उमन उके माछ केर एकटा खेंचा देलयँ, आर ऊ उटा के खाय लेलक।

यीशु कहलक, “मर बारे मेहेन परमेश्‍वर केर बचन जे कनअ कहेला उटा घटित हइ। मयँ तोहरे के बताय दे रहँ कि इकर हयेक अवश्य आहे।” तखन यीशु उमन के परमेश्‍वर केर बचन बेस निहार समझालक। ऊ कहलक, “बहुत दिने पहिले भबिस्यद्बक्ता गिला लिख रहयँ कि मके, मसीह के दुख उठायेक हइ, मरेक हइ आर फिन तीसर दिने मरल गिलाक मइध लेक जी उठेक हइ।”

“उ भबिस्यद्बक्ता गिला इटाउ लिख रहयँ कि मर चेला गिला परमेश्‍वर केर बचन केर घोसना करबयँ। उमन हर एक झन के पछताप करेक तेहें बताबयँ। जदि उमन एसन करयलाँ हले परमेश्‍वर उमनेक पाप गिला के छमा करी। मर चेला गिला इ सन्देस केर परचार करेक टा यरुशलेम लेक सुरु करबयँ। तखन उ सउब जायगाय सउब जाइत केर लोग गिलाय जाबयँ। तोहरे मर हर एक कथा आर काम केर गवाह हबा जे मयँ कहलँ आर कइर रहँ, आर उ सउब कउ जे मर संगे हलक।”

आघुक चालीस दिन गिलाक दौरान, यीशु आपन चेला गिलाय कयो धाँव परगट हलक। एक धाँव तो ऊ एके समइ मेहेन पाँच सअ लेक बेसी लोग गिलाय परगट हलक! ऊ आपन चेला गिलाय कयो किसिम लेक साबित करलक कि ऊ जीयँत रहे, आर ऊ उमन के परमेश्‍वर केर राइज केर बारे मेहेन सिछा देलक।

यीशु आपन चेला गिला के कहलक, “परमेश्‍वर मके सरग आर पिरथिबी केर हर एक झने सासन करे केर अधिकार दे आहे। सेतेहें एधाँव मयँ तोहरे के कहलाँ: जाय कहन सउब जाइत केर लोग गिला के चेला बनावा। एसन करेक तेहें, तोहरे के उमन के बाप, बेटा, आर पबित्रात्मा केर नाम लेक बपतिस्मा देक आहे। जे कनअ मयँ तोहरे के आग्या दे आहँ उ सउब कथा गिला के मानेकअ तोहरे के सिखायेक आहे। याइद राखा, मयँ हमेसा तोहरेक संगे रहमु।”

यीशु केर मरल गिलाक मइध लेक जी उठेक चालीस दिन केर बादे, ऊ आपन चेला गिला के कहलक, “जखन तक कि मर बा तोहरे के सामर्थ नाइ देला तखन तक यरुशलेम मेहेन ठहरल रहबा। ऊ तोहरेक उपरे पबित्रात्मा पइठायेक दाराय एसन करी।” तखन यीशु सरग मेहेन चइल गेलक, आर एकटा बादइर उके उमने नजइर लेक छिपाय लेलक। सरग मेहेन यीशु सउब चीज गिलाय सासन करेक परमेश्‍वर केर दाहिना बाटे बइस गेलक।