43. कलीसिया केर सुरुआत

यीशु केर सरग घुरेक बादे, चेला गिला यरुशलेम मेहनेइ रुकलयँ जेसन कि यीशु उमन के करेक केर आदेस दे रहे। हुआँ केर बिसासी लोग गिला लगातार एक संगे पारथना करेक तेहें जामा हत रहयँ।

हरेक बछर, फसह केर परब केर 50 दिन केर बादे, यहूदी लोग पिन्तेकुस्त नामेक एकटा महत्वपूर्न दिन के मानत रहयँ। पिन्तेकुस्त उ समइ रहे जखन यहूदी लोग गिला गहम केर कटनी केर परब मनात रहयँ। गोटा संसार लेक यहूदी लोग गिला पिन्तेकुस्त केर दिन के एक संगे मनायेक तेहें यरुशलेम मेहेन आय रहयँ। इ बछर, पिन्तेकुस्त मनायेक केर समइ यीशु केर सरग के चइल जायेक करिबन एक सप्‍ताह केर बादे आय रहे।

जन समइ सउब बिसासी लोग गिला एके संगे जामा रहयँ, तो जन घर मेहेन उमन रहयँ अचकाय उटा तेज हवा केर आवाज लेक भइर गेलक। तखन आइग केर लव निहार देखइया कनअ सउब बिसासी गिला केर मुड़ उपरे परगट हलक। उ सउब पबित्रात्मा लेक भइर गेलयँ आर अन्य भासा गिलाय परमेश्‍वर केर स्तुति करलयँ। इ गिला उ भासा गिला रहे जेटा के बोलेक तेहें उमन के पबित्रात्मा ने सक्षम कइर रहे।

जखन यरुशलेम मेहेन रहइया लोग गिला उ हल्‍ला के सुनलयँ, तो उमन भीड़ केर रुप मेहेन इटा देखेक तेहें एके संगे आलयँ कि का हत रहे। उमन बिसासी गिला परमेश्‍वर केर दाराय करल बड़े-बड़े काम गिला केर घोसना करत के सुनलयँ। उमन बिस्मित रहयँ काहेकि उमन उ काम गिला के निजेक भासा गिलाय सुनत रहयँ।

इमनेक लेक थोड़ेक लोग गिला कहलयँ कि इ चेला गिला नसा मेहेन रहयँ। किन्तु पतरस ठाड़ हलक आर उमन के कहलक, “मर कथा के सुना! इ लोग गिला नसा मेहेन नेखयँ! इकर उलटा, जेटा तोहरे देखताहा उटा ओहेटा हेके जेके योएल भबिस्यद्बक्ता कइह रहे कि हइ: परमेश्‍वर कहलक, ‘आखरी केर दिन गिलाय, मयँ आपन आत्मा उझलमु।’”

“ए इस्राएली पुरुस गिला, यीशु एकटा एसन मानुस रहे जे इटा देखायेक तेहें कि ऊ के रहे ढेइरे अद्भूत काम कइर रहे। ऊ परमेश्‍वर केर सामर्थ लेक बेजाइन अद्भुत काम गिला के कइर रहे। तोहरे इटा जानाला, काहेकि तोहरे इ काम गिला के देइख आहा। किन्तु तोहरे उके क्रूस उपरे चेढ़ाय देला!”

“यीशु मइर गेलक किन्तु परमेश्‍वर उके मरल गिलाक मइध लेक जीयँत कइर देलक। ऊ इ कथा के पूरा कइर देलक जेटा के एकटा भबिस्यद्बक्ता लिख आहे: ‘तयँ आपन पबित्र अदमी के मुर्दा गड़हाय सड़े नाइ देइ।’ हामरे गवाह हेकी कि परमेश्‍वर यीशु के फिन जीयँत कइर देलक।”

“परमेश्‍वर बाप एधाँव यीशु के आपन दहिना बाटे बइसाय कहन उके आदर दे आहे। आर यीशु हामरेक तेहें पबित्रात्मा के पइठालक जेसन कि उ परतिंगा कइर रहे कि ऊ पइठाइ। पबित्रात्माइ उ काम गिला के हय देतेहे जेटा के तोहरे देखताहा आर सुनताहा।”

“तोहरे उ मानुस, यीशु के क्रूस उपरे चेढ़ाय देला। किन्तु निश्‍चित रुप लेक जाइन लेवा कि परमेश्‍वर यीशु के सउब चीज गिलाय परभु आर मसीह दुइयो ठहराय आहे!”

पतरस सुनोइया लोग गिला उकर दाराय कहल कथा गिला लेक भीतर तक हिल जाय रहयँ। सेतेहें ऊ पतरस आर चेला गिला के पुछलयँ, “ए भाई सउब, हामरे के का करेक चाही?”

पतरस उमन के जबाब देलक, “तोहरेक मइध लेक हर एक आपन पाप केर तेहें पछताप करा ताकि परमेश्‍वर तोहरेक पाप गिला के छमा करुक, आर यीशु मसीह केर नाम लेक बपतिस्मा लेवा। तखन ऊ तोहरे के बरदान स्वरुप पबित्रात्माउ देइ।”

पतरस जे कहलक उटाय करिबन तीन हजार लोग गिला बिसास करलयँ आर यीशु केर चेला बइन गेलयँ। उमन बपतिस्मा लेलयँ आर यरुशलेम केर कलीसिया केर हिस्सा बइन गेलयँ।

जखन प्रेरित गिला उमन के सिछा देलयँ तो बिसासी गिला लगातार सुनलयँ। उमन खने-खने जामा हत रहयँ आर एके संगे खावा दावा करत रहयँ, आर उमन खने खने एक दसर केर तेहें पारथना करलयँ। उमन मिल कहन परमेश्‍वर केर स्तुति करलयँ आर जे कनअ उमनेक पासे रहे उमन एक दसर केर संगे साझा करलयँ। नगर केर हर एक अदमी उमनेक तेहें बेस बिचार राखत रहयँ। प्रतिदिन, बेसी लेक बेसी लोग गिला बिसासी बनते गेलयँ।