44. पतरस आर योहन केर दाराय एकटा भिखारी के चंगा करेक

एक दिन, पतरस आर योहन मन्दिर मेहेन गेलयँ। एकटा अपंग अदमी भीख माँगेक तेहें फाटक पासे बइसल रहे।

पतरस उ लंगड़ा अदमी बाटे देखलक आर कहलक, “मर पासे तके देक तेहें पएसा तो नेखे। किन्तु जेटा मर पासे आहे उटा के मयँ तके देवलाँ। यीशु केर नाम लेक, उठ आर चइल बुलिन!”

तुरतेइ, परमेश्‍वर उ लंगड़ा अदमी के चंगा कइर देलक। उ हिन्दे-हुन्दे चलेक आर कुदेक, आर परमेश्‍वर केर स्तुति करेक सुरु कइर देलक। मन्दिर केर आन्गा मेहेन उपस्थित लोग गिला अचम्भित रहयँ।

चाँड़ेइ लोग गिला केर एकटा भीड़ जे चंगा हय जाय रहे उ अदमी के देखेक तेहें आलयँ। पतरस उमन के कहलक, “इ मानुस बेस हलक, किन्तु इ कथाय अचम्भित ना होवा। हामरे इके आपन सक्ति लेक चंगा कइर आही, चाहे एहे तेहें नाहीं कि हामरे परमेश्‍वर केर आदर करिला। बल्कि, ऊ यीशु हेके जे इ अदमी टाके आपन सक्ति लेक चंगा कइर आहे, काहेकि हामरे यीशु उपरे भरसा करिला।”

“ऊ तोहरेइ हेका जे उ रोमी राइजपाल के यीशु के माइर मरायेक तेहें कइह रहा। तोहरे उके मराय देला जे सउब के जीबन देला। किन्तु परमेश्‍वर उके मरल गिलाक मइध लेक जीयँत करलक। तोहरे नाइ समझला कि तोहरे का करत रहा, किन्तु जखन तोहरे उ काम गिला के करत रहा, तो जे भबिस्यद्बक्ता कइह रहे उटा पूरा हलक। ऊ कइह रहे कि मसीह दुख उठाइ आर मइर जाइ। परमेश्‍वर इ रकम लेक हय देलक। सेतेहें एधाँव, पछताप करा आर परमेश्‍वर बाटे घुइर आवा, ताकि ऊ तोहरे केर पाप गिला के धइ कहन साफा कइर देउक।”

जखन मन्दिर केर आगुवा गिला पतरस आर योहन केर कथा सुनलयँ, तो उमन बेजाइन डराय गेलयँ। सेतेहें उ आगुवा गिला उमन के गिरफ्तार कइर कहन जेहेल घर मेहेन डाइल देलयँ। किन्तु जे पतरस कइह रहे उटाय बेजाइन लोग गिला बिसास करलयँ। यीशु उपरे बिसास करइया गिला केर संख्या बाइढ़ कहन करिबन पाँच हजार हय गेलयँ।

आघु दिन, उ यहूदी आगुवा गिला पतरस आर योहन के महायाजक आर दसर धारमिक आगुवा गिला केर पासे ले कहन आलयँ। उमन उ अदमी कउ ले कहन आलयँ जे अपंग रहे। उमन पतरस आर योहन के पुछलयँ, “कन अधिकार लेक तोहरे उ अपंग अदमी के चंगा करला?”

पतरस जबाब देलक, “इ अदमी टा तोहरेक पासे ठाड़ आहे उके यीशु मसीह केर सामर्थ केर दाराय चंगा करल जाय आहे। तोहरे यीशु के क्रूस उपरे देढ़ाय देला, किन्तु परमेश्‍वर उके फिन जीयँत कइर देलक! तोहरे उके अस्वीकार कइर देला, किन्तु यीशु केर सामर्थ केर माध्यम केर अलावे उद्धार पाय केर कनअ दसर डहर नेखे!”

उ आगुवा गिला हैरान रहयँ कि पतरस आर योहन बेजाइन साहसी रुप लेक कथा कइर रहयँ। उमन देखलयँ कि इ गिला साधारन पुरुस रहयँ जे कि अनपढ़ रहयँ। किन्तु फिन उमन के याइद आलक कि इ पुरुस गिला यीशु केर संगे रहयँ। सेतेहें उ गिला उमन के कहलयँ, “हामरे तोहरे के बेजाइन बेसी दंड देबिक जदि तोहरे इ मानुस यीशु केर बारे मेहेन लोग गिला के कनअ आरो सन्देस देवाला।” एसन ढेइरे कहेक बादे, उमन पतरस आर योहन के जायेक देलयँ।