45. स्तिफनुस आर फिलिप्पुस

पहिला मसीही आगुवा गिलाक माझे स्तिफनुस नाम केर एकटा पुरुस रहे। सउब लोग गिला उकर आदर करत रहयँ। पबित्रात्मा उके बेजाइन सामर्थ आर बुद्धि प्रदान कइर रहे। स्तिफनुस ढेइरे चमत्कार केर काम के कइर रहे। जखन ऊ यीशु उपरे भरसा करे केर बारे उमन के सिछा देलक तो ढेइरे लोग गिला उकर उपरे बिसास करलयँ।

एक दिन, स्तिफनुस यीशु केर बारे सिछा देत रहे, आर थोड़ेक एसन यहूदी गिला आलयँ जे गिला यीशु उपरे बिसास नाइ कइर रहयँ आर उकर संगे बाद-बिबाद करेक सुरु कइर देलयँ। उमन बेजाइन खिंसाय गेलयँ, सेतेहें उमन धार्मिक आगुवा गिला केर पासे आर उकर बारे झूठ कहलयँ। उमन कहलयँ, “हामरे स्तिफनुस के मूसा आर परमेश्‍वर केर बारे खराब कथा गिला के कहत के सुइन आही!” सेतेहें धार्मिक आगुवा गिला स्तिफनुस के गिरफ्तार कइर लेलयँ आर उके महायाजक आर यहूदी गिलाक दसर आगुवा गिला केर पासे ले कहन आलयँ। आर झूठा गवाह आलयँ आर उमन स्तिफनुस केर बारे झूठ कहलयँ।

महायाजक स्तिफनुस के पुछलक, “का इ लोग गिला तर बारे मेहेन सच कहतहयँ?” स्तिफनुस महायाजक के जबाब देक तेहें ढेइरे कथा गिला के कहेक सुरु कइर देलक। ऊ कहलक कि अब्राहम केर समइ लेक यीशु केर समइ तक परमेश्‍वर इस्राएल केर लोग गिलाक तेहें ढेइरे अद्भुत काम कइर आहे। किन्तु लोग गिला हमेसा परमेश्‍वर केर आग्या के नाइ माइन रहयँ। स्तिफनुस कहलक, “तोहरे परमेश्‍वर केर बिरुद्ध हठीला आर बलवा करइया हेका। तोहरे हमेसा पबित्रात्मा के अस्वीकार करला, जेसन कि हामरेक पुरखा गिला हमेसा पबित्रात्मा के अस्वीकार कइर रहयँ आर हमेसा उकर भबिस्यद्बक्ता गिला के मराय दे रहा। किन्तु जेटा उमन कइर रहेयँ उकर तुलना मेहेन तोहरे आरो बेसी खराब कइर आहा! तोहरे मसीह के मराय दे आहा!”

जखन उ धार्मिक आगुवा गिला इटा सुनलयँ, तो उमन एतना खिंसाय गेलयँ कि उमन आपन कान गिला के बन्द कइर लेलयँ आर डबल आँटे चिल्‍लालयँ। उमन स्तिफनुस के घिसराय कहन नगर लेक बाहिर ले गेलयँ आर उके मरायेक तेहें पाखनाय लेबदालयँ।

जखन स्तिफनुस मरत रहे, ऊ हाँकालक, “ए यीशु, मर आत्मा के ग्रहन कर!” तखन ऊ आपन हेंठु गाइड़ कहन गिर गेलक आर फिन हाँकालक, “ए परभु, इ पाप टा उमनेक उपरे ना लगाबे।” तखन ऊ मइर गेलक।

उ दिन, यरुशलेम मेहेन रहइया बेजाइन लोग गिला यीशु केर अनुयायी गिला के सतायेक सुरु कइर देलयँ, सेतेहें बिसासी लोग गिला दसर जायगा गिलाय भाइग गेलयँ। किन्तु इकर बावजूदो, जहाँ कहीं उमन गेलयँ उमन यीशु केर बारे मेहेन परचार करलयँ।

फिलिप्पुस नाम केर यीशु केर एकटा बिसासी रहे। जेसन कि दसर ढेइर बिसासी गिला यीशु उपरे बिसास कइर रहयँ उमनउ यरुशलेम लेक भाइग गेलयँ। उ सामरिया केर इलाका मेहेन चइल गेलक। हुआँ ऊ लोग गिला के यीशु केर बारे परचार करलक। ढेइरे लोग गिला उकर उपरे बिसास करलयँ आर उद्धार पालयँ। एक दिन, फिलिप्पुस केर पासे परमेश्‍वर बाटे लेक एकटा सरगदूत आलक आर उके बन बाटे जायेक तेहें, आर एकटा सँड़क लेक चलेक तेहें कहलक। फिलिप्पुस हुआँ चइल गेलक। जखन ऊ उ सँड़के चलत रहे, तो उके एकटा अदमी के निजेक रँथ मेहेन जात के देखलक। इ अदमी टा कूश देस केर एकटा महत्वपूर्न अधिकारी रहे। पबित्रात्मा फिलिप्पुस के कहलक कि जाय कहन उ अदमी केर संगे-संगे चलिन।

सेतेहें फिलिप्पुस रँथ केर पासे गेलक। उ सुनलक कि ऊ कूशी टा परमेश्‍वर केर बचन के पढ़त रहे। जे यशायाह भबिस्यद्बक्ता लिख रहे उटा के ऊ पढ़त रहे। ऊ पढ़त रहे, “उमन उके वध करल जावइया भेड़ी केर समान ले गेलयँ, आर जेसन एकटा भेड़ा छुवा सान्त हयला, ओसने एक सब्द नाइ कहलक। उमन उकर संगे अनुचित बेबहार करलयँ आर उकर आदर नाइ करलयँ। उमन उकर परान के ले लेलयँ।”

फिलिप्पुस उ कूशी के पुछलक, “जेटा तयँ पढ़तिहिस का तयँ उटा के समझब करतिहिस?” उ कूशी टा जबाब देलक, नाहीं। जखन तक केउ इटा के मके ना समझाबयँ, तखन तक मयँ इटा के नाइ समझे पारँ। किरपा कइर कहन मर तहाँ आय कहन बइस। यशायाह इटा आपन बारे लिखत रहे न कनअ आरो दसर के?”

फिलिप्पुस रँथ उपरे चाइप कहन बइस गेलक। तखन ऊ उ कूशी अदमी टाके बताय देलक जे यशायाह यीशु के बारे मेहेन लिख रहे। फिलिप्पुस परमेश्‍वर केर बचन के ढेइरे दसर भाग गिला केरअ चर्चा करलक। इ निहार लेक, ऊ उ अदमी के यीशु केर बारे मेहेन बेस खबर सुनालक।

फिलिप्पुस आर उ कूशी चलत के पानी केर पासे आलयँ। ऊ कूशी के कहलक, “देखिन! हिआँ पानी आहे! का मयँ बपतिस्मा ले पारलाँ?” आर ऊ सारथी के रँथ के रकेक तेहें कहलक।

सेतेहें उमन पानी मेहेन चइल गेलयँ, आर फिलिप्पुस उ कूशी के बपतिस्मा देलक। जखन उमन पानी लेक बाहिर आलयँ, तो पबित्रात्मा अचकाय फिलिप्पुस के उठाय कहन कनअ दसर जायगा मेहेन ले गेलक। हुआँ फिलिप्पुस लोग गिला के यीशु केर बारे मेहेन बतायेक जारी राखलक।

उ कूशी आपन घर केर यात्राय आघु चइल गेलक। ऊ खुस रहे कि ऊ एधाँव यीशु के जानत रहे।