46. पौलुस मसीही बिसासी बइन जायला

शाऊल नाम केर एकटा अदमी रहे जे यीशु उपरे बिसास नाइ कइर रहे। जखन ऊ जुवान रहे, तखन ऊ स्तिफनुस के मराइया लोग गिला केर लूगा गिला केर निगरानी कइर रहे। बाद मेहेन, ऊ बिसासी गिला के सताय रहे। ऊ यरुशलेम मेहेन घर-घर जाय कहन पुरुस आर बेटी छुवा दुइयो के गिरफ्तार कइर कहन जेहेल घर मेहेन डाइल दे रहे। तखन महायाजक शाऊल के दमिश्क नगर मेहेन जायेक केर अनुमति देलक। ऊ हुआँ केर मसीही गिला के गिरफ्तार करेक आर उमन के यरुशलेम ले कहन आनेक तेहें शाऊल के कहलक।

सेतेहें शाऊल दमिश्क जायेक केर यात्रा सुरु करलक। उ नगर के पहँचेक लेक तनिक पहिले, उकर चाइरो बाटे आकास लेक एकटा चरका आलो चमकलक, आर ऊ भूँईये गिर गेलक। शाऊल केकउ के कहत के सुनलक, “ए शाऊल! ए शाऊल! तयँ मके काहे सतातिहिस?” शाऊल पुछलक, “ए परभु, तयँ के हेकिस?” यीशु उके जबाब देलक, “मयँ यीशु हेकँ। तयँ मके सतातिहिस!”

जखन शाऊल उठलक तो ऊ देखे नाइ पात रहे। उकर संगी गिला उके दमिश्क मेहेन ले कहन गेलयँ। शाऊल तीन दिन तक कनअ खायो चाहे पिबो नाइ कइर रहे।

दमिश्क मेहेन हनन्याह नाम केर एकटा चेला रहे। परमेश्‍वर उके कहलक, “उ घर मेहेन जाहिन जहाँ शाऊल ठहरल आहे। आपन हाथ उकर उपरे राखिन ताकि ऊ फिन देखे पाउक।” किन्तु हनन्याह कहलक, “ए परभु, मयँ सुइन आहँ कि इ अदमी टा बिसासी गिला के केसन सताय आहे।” परमेश्‍वर उके जबाब देलक, “जाहिन! मयँ उके यहूदी गिलाय आर दसर जाइत केर लोग गिला मेहेन मर नाम केर घोसना करेक तेहें चुइन ले आहँ। ऊ मर नाम केर तेहें बेजाइन कस्टो सही।”

सेतेहें हनन्याह शाऊल केर पासे गेलक, आपन हाथ के उकर उपरे राखलक, आर कहलक, “यीशु, जे हिआँ आयेक तर डहर मेहेन तर तहाँ परगट हय रहे, मके तर तहाँ पठाय आहे ताकि तयँ फिन देखे पाइन, आर पबित्रात्मा लेक तके भइर देउक।” तुरतेइ शाऊल फिन देखेक मेहेन सक्षम हय गेलक, आर हनन्याह उके बपतिस्मा देलक। तखन शाऊल खालक आर फिन बलवन्त हय गेलक।

तखन लेक, शाऊल दमिश्क मेहेन रहइया यहूदी गिलाय परचार करेक सुरु कइर देलक। ऊ कहलक, “यीशुवे परमेश्‍वर केर बेटा हेके!” यहूदी लोग गिला अचम्भित रहयँ, काहेकि शाऊल तो बिसासी गिला के मरायेक केर प्रयास कइर रहे, किन्तु एधाँव ऊ यीशु मेहेन बिसास कइर रहे। शाऊल यहूदी गिला केर संगे बाद-बिबाद करलक, ऊ देखालक कि यीशुवे मसीह रहे।

ढेइर दिन केर बादे, यहूदी गिला शाऊल के मराय दे केर जोजना बनालयँ। उमन उके मराय देक तेहें नगर केर फाटक पासे लोग गिला के पठालयँ कि उकर निगरानी करुन। किन्तु शाऊल उ जोजना केर बारे सुइन लेलक, आर उकर संगी गिला बाँइच कहन निकलेक मेहेन उकर साहेता करलयँ। एक राइत के उमन उके खाँची मेहेन बइसाय कहन नगर के पाचीर लेक उके हेंठे उतराय दे रहयँ। दमिश्क लेक बाँइच कहन निकलल बादे शाऊल यीशु केर बारे मेहेन परचार करेक जारी राखलक।

शाऊल प्रेरित गिला संगे मुलाकत करेक तेहें यरुशलेम गेलक, किन्तु उमन उकर लेक डरात रहयँ। तखन बरनबास नाम केर एकटा बिसासी शाऊल के प्रेरित गिलाक पासे ले कहन गेलक। ऊ उमन के बतालक कि शाऊल केसन साहसी हय कहन दमिश्क मेहेन परचार कइर रहे। उकर बादे, प्रेरित गिला शाऊल के स्वीकार कइर लेलयँ।

थोड़ेक बिसासी गिला जे यरुशलेम केर सताव केर चलते भाइग जाय रहयँ उमन दूर अन्ताकिया नगर मेहेन चइल जाय रहयँ आर यीशु केर बारे मेहेन परचार करत रहे। अन्ताकिया मेहेन रहइया लोग गिला अधिकतर यहूदी नाइ रहयँ, किन्तु पहली बार, उमनेक मइध लेक ढेइर लोग गिला बिसासी बइन गेलयँ। बरनबास आर शाऊल इ नावा बिसासी गिला के यीशु केर बारे मेहेन आरो बेसी सिखायेक तेहें हुआँ गेलयँ आर कलीसिया के मजबूत करलयँ। यीशु उपरे बिसास करइया के पहली बार अन्ताकिया मेहनेइ “मसीही” कहालयँ।

एक दिन, अन्ताकिया केर मसीही लोग गिला उपास केर संगे पारथना करत रहयँ। पबित्रात्मा उमन के कहलक, “मर तेहें बरनबास आर शाऊल के उ काम के करेक तेहें अलग कइर देवा जेटा के करेक तेहें मयँ उमन के डाइक आहे।” सेतेहें अन्ताकिया केर कलीसिया बरनबास आर शाऊल केर तेहें पारथना करलयँ आर उमनेक उपरे आपन हाथ के राखलयँ। तखन उ गिला उमन के दसर ढेइर जायगा गिलाय यीशु केर बारे मेहेन बेस खबर केर परचार करेक तेहें पइठाय देलयँ। बरनबास आर शाऊल अलग-अलग जाइत गिला केर लोग गिला के सिछा देलयँ, आर ढेइर लोग गिला यीशु मेहेन बिसास करलयँ।