47. फिलिप्पी मेहेन पौलुस आर सीलास
जखन शाऊल गोटा रोमी साम्राज्य मेहेन यात्रा करलक तो ऊ आपन रोमी नाम “पौलुस” केर उपयोग करेक सुरु कइर देलक। एक दिन, पौलुस आर उकर संगी सीलास फिलिप्पी नगर मेहेन यीशु केर बारे मेहेन बेस खबर सुनायेक तेहें गेलयँ। उमन नगर केर बाहिरे नदी धारे एकटा जायगाय गेलयँ जहाँ लोग गिला पारथना करेक तेहें जामा रहयँ। हुआँ उमन लुदिया नाम केर एकटा बेटी छुवा लेक भेंट हलक जे एकटा बेपारी रहे। ऊ परमेश्वर लेक प्रेम करत रहे आर उकर आराधना करत रहे।
परमेश्वर लुदिया के यीशु केर बारे सन्देस मेहेन बिसास करेक तेहें सक्षम करलक। पौलुस आर सीलास उके आर उकर परिबार के बपतिस्मा देलयँ। उमन पौलुस आर सीलास के आपन घर मेहेन ठहरेक तेहें नेवता करलयँ, सेतेहें उमन हुआँ ठहइर गेलयँ।
पौलुस आर सीलास लोग गिला संगे खने खने उ जायगाय भेंट हत रहयँ जहाँ यहूदी लोग गिला पारथना करत रहयँ। प्रतिदिन जखन उमन हुआँ जात रहयँ तो एकटा धाँगरिन जे दुस्टात्मा केर दाराय नियंत्रित रहे उमनेक पीछा करत रहे। इ टुस्टात्मा केर दाराय उ लोग गिला के भबिस्य के बतात रहे, सेतेहें ऊ भबिस्य बताइया केर रुप मेहेन आपन मालिक गिला केर तेहें बेजाइन धन कमात रहे।
उमन केर जात समइ इ धाँगरिन टा चिल्लात रहे, “इ पुरुस गिला परम परधान परमेश्वर केर सेवक हेकयँ। इ गिला तोहरे के उद्धार पायेक डहर बताय देन्ला!” ऊ प्रतिदिन एसनेइ करत रहे जेटा लेक कि पौलुस नाराज हय रहे।
आखिर मेहेन, एक दिन जखन उ धाँगरिन टा चिल्लायेक सुरु करलक, तो पौलुस उकर बाटे मुहाय कहन उकर भीतर केर दुस्टात्मा के कहलक, “यीशु केर नाम लेक इकर लेक निकइल जाहिन।” ओहे समइ उ टुस्टात्मा उके छोइड़ देलक।
ऊ धाँगरिन केर मालिक टा बेजाइन खिंसाय गेलक। उमन के पता हय गेलक कि बिना उ दुस्टात्मा केर उ धाँगरिन टा लोग गिला के भबिस्य नाइ बताय पारत रहे। इकर मतलब रहे कि लोग गिला एधाँव उकर मालिक गिला के पयसा नाइ देइ कि ऊ उमन के भबिस्य कइह देइ कि उमनेक संगे का हइ।
सेतेहें उ धाँगरिन केर मालिक टा पौलुस आर सीलास के रोमी अधिकारी गिला केर पासे ले गेलक। उमन पौलुस आर सीलास के पिटलयँ, आर फिन उमन के जेहेल घर मेहेन डाइल देलयँ।
उमन पौलुस आर सीलास के जेहेल घर केर एसन हिस्सा मेहेन राखलयँ जहाँ सउब लेक बेसी सिपाही गिला रहयँ। हिआँ तक कि उ गिला उमनेक गड़ गिला के बड़े काठी गिलाय जोइड़ देलयँ। किन्तु पौलुस आर सीलास आधा राइत केर समइ, परमेश्वर केर स्तुति केर गीत गीतकात रहयँ।
अचकाय, एकटा भयानक भूँईडल हलक! जेहेल घर केर सउब दुवाइर खुइल गेलक, आर सउब कैदी गिला केर सिकड़ गिला खुइल कहन गिर गेलक।
तखन दरोगा जाइग गेलक। ऊ देखलक कि जेहेल घर केर दुवाइर खुलल रहे। ऊ सोंचलक कि सउब कैदी गिला बाँइच कहन भाइग गेलयँ। ऊ डराय गेलक कि उमनेक भाइग जायेक चलते रोमी अधिकारी गिला उके मराय देबयँ, सेतेहें ऊ खुद के मराय देक तेहें तेयार हय गेलक! किन्तु पौलुस उके देइख कहन चिल्लालक, “रुइक जावा! खुद के नकसान ना पहँचावा। हामरे सउब हिंयाइ आही।”
उ दरोगा टा काँपत के पौलुस आर सीलास केर पासे आय कहन पुछलक, “उद्धार पायेक तेहें मयँ का करमु?” पौलुस जबाब देलक, “परभु यीशु उपरे बिसास करिन, हले तयँ आर तर घर केर सउब लोग गिला उद्धार पाबयँ।” तखन ऊ दरोगा टा पौलुस आर सीलास के आपन घर ले गेलक आर उमनेक घाव गिला के धइ देलक। पौलुस उकर घर कर सउब लोग गिला के यीशु केर बारे बेस खबर सुनालक।
दरोगा आर उकर घर केर सउब लोग गिला यीशु उपरे बिसास करलयँ, सेतेहें पौलुस आर सीलास उमन के बपतिस्मा देलक। तखन दरोगा पौलुस आर सीलास के खाना खियालक, आर उमन एके संगे आनन्दित हलयँ।
आघु दिन नगर केर आगुवा गिला पौलुस आर सीलास के जेहेल घर लेक आजाद कइर देलयँ आर फिलिप्पी लेक चइल जायेक तेहें कहलयँ। पौलुस आर सीलास लुदिया आर थोड़ेक दसर संगी गिला संगे भेंट करलयँ आर उकर बादे नगर लेक निकइल गेलयँ। यीशु केर बारे बेस खबर टा फयलते गेलक, आर कलीसिया बाढ़ते गेलक।
पौलुस आर दसर मसीही आगुवा गिला ढेइरे नगर गिला केर यात्रा करलयँ। उमन लोग गिला के यीशु केर बारे मेहेन बेस खबर सुनालयँ। ऊ कलीसिया केर बिसासी गिला के उत्साहित करेक आर सिछा देक तेहें कयोटा चिट्ठी गिला के लिखलक। इमनेक मइध लेक थोड़ेक चिट्ठी गिला बाइबल केर किताब गिला बइन गेलक।
प्रेरित गिलाक काम 16:11-40 लेक बाइबल केर एकटा कहनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।