17. १७. ऊदसे परमेश्वरके करार

शाऊल इस्राएलके पहिलो रजवा रहे। उहे मनैनके जस्टे माग कैले रहिँट् ओस्टे सुग्घर ओ ढेँग मनैयाँ रहे। सुरुवातके पहिलो कुछ साल शाऊल इस्राएलमे शासन कैना एक असल रजवा रहे। तब पाछे उ एक दुष्ट मनै बनल् ओ परमेश्वरके अनाज्ञाकारी हुईल्। उहेक मारे परमेश्वर दोसर मनै चुन्लाँ जे चाहिँ ओकर बडलीमे रवजा हुईटि रहे।

परमेश्वर दाऊद नाउँ कैलक् एक जवान इस्राएलीहे शाऊलके पाछे रजुवा बनक् लक् रोजलाँ। दाऊद बेथेलेहेम नाऊँ कैलक् गाऊँमे बैठ्ना एक गोठला रहे। आपन बाबाक् भेँरिन् चराह्ई बेर धेर चो उ आपन भेँरिनमे आक्रमण करे खोज्ना बाघ ओ भलुवा जैसिन जनावरहे मरले रहे। दाऊद नम्र ओ धर्मि मनै रहे जे चाहिँ परमेश्वरमे भर परे ओ ओँहाँक आज्ञा माने।

दाऊद एक महान् सिपाहि ओ अगुवा बनल्। जब दाऊद जवान रहे, उ गोल्यात नाउँ कैलक् एक जाने अजङ्गके मनैयाँसे लराई कैलस्। गोल्यात एक तालिम प्राप्त, धेर बलगर् ओ लगभक् तीन मिटर जट्ना ढेँङ्ग मनैयाँ रहे

शाऊल दाऊद ओर मनैनके प्रेम प्रति डाही हुईलाँ। धेर चो शाऊल दाऊदहे मारे खोजल्, उहेक मारे शाऊलसे नुकल्। एक दिनमे शाऊल दाऊदहे मारक् लग् ओकर खोजीमे नेँग्टी रहिँट्। शाऊल एकठो गुफा भित्तर पैठल् रहे जहाँ दाऊद शाऊलसे बचक् लग् नुक्के बैठल रहे, तर ओँहाँमे शाऊल दाऊद हे नैडेखल्। अठ्नेँहेँ दाऊद शाऊलके एक डम् लग्ग् रहे ओ उहिहे मारे फेन् सेकट्, तर दाऊद ओईसिन नै कैल्। बरटुन् दाऊद ओकर हत्या कैके आपने रजवा बने नैचाहल् कहिके प्रमाणित करक् लग् शाऊल के बस्त्रके ठन्चे भाग चिँठ्के लेहल्।

आखिरमे, शाऊल लराईमे मुँगैल् ओ दाऊद इस्राएलके रजवा बनलाँ। दाऊद एक असल राजा रहिँट्, ओ मनै उहिहे प्रेम करिँट्। परमेश्वर दाऊदहे आशिष डेलाँ। ओ उहिहे सफ लबनैलाँ। दाऊद धेर लराई लरलाँ ओ परमेश्वर उहिहे इस्राएलीनके शत्रुहे हराईक लग् सहायता कैलाँ। दाऊद यरुशलेम कब्जा कैलाँ ओ उहे ठाऊँहे ओईने राजधानी शहर बनैलाँ। दाऊदके शासनकालमे इस्रनएल शक्तिशाली ओ सम्पन्न राष्ट्र बनल्।

दाऊद एकठो मन्दिर निर्माण करक् लग् रहे जहाँ सारा इस्राएलीनके परमेश्वरके आराधना करे सेक्टाँ ओ परमेश्वरहे बलि डेहे सेक्टाँ। बरिब ४०० वर्ष टक् मनै परमेश्वरके आराधना कैना ओ बलि डेना काम भेट कैना पालमे कैटि अईलाँ, जौन मोसा निमार्ण कैले रहिँट्।

तर ओँहाँमे परमेश्वर नातान नाउँ कैलक् एक जाने अगम्वक्ता हे दाउलदके ठने ऐसिन खबर पठैलाँ।, टै लराईके मनै हुईलक् ओरसे, मोरीक् लग् टैं यी मन्दिर निमार्ण जिन करिस्। यकर निमार्ण टोरीक् छावा करी। तर मै टुहिँहे प्रशस्त आशिष डेबुँ। टोरीक् सन्तान मध्ये एक जाने चाहिँ सदाके लग् राजाके रुपमे मोरीक मनैनमे राज्य कैहिँ।

जब दाऊद यी बाट् सुनल्, उ तुरुन्ते परमेश्वरहे धन्यवाद डेहल् ओ ओँहाँक् प्रशंशा कैल काकरे कि ओँहाँ दाऊदहे महान् आदर ओ धेर आशिषके प्रतिज्ञा कैले रहिँट्। दाऊदहे यी बाट् कहिया हुई कहिके ठाह नैरहिन् तर जब यी बाट् हुईल्, इस्राएलीनहे मसिह अईना आघे करिब १,००० वर्ष समय टक् रुके पर्ना रहे।

दाऊद धेर वर्ष टक् न्याय ओ विश्वास योग्यके साथ राज्य कैल्, तब परमेश्वर उहिहे आशिष् डेलाँ। तब्बो पर आपन जीवन कालके अन्तिम ओर दाऊद परमेश्वरके विरुद्धमे डरलग्टिक् पाप कैल्।

एकदिन, जब दाऊदके सैनिक लराईके लग् आपन घरसे दुर गैल रहिँट्, उ आपन दरबारसे बाहर हेरल् ओ एकजाने सुन्दरी स्त्रीहे लहैटी देखल्। ओकर नाउँ बेतशेबा रहिस्।

दोसर ओर हेर्ना छोरके, दाऊद किहुहे उहे स्त्रीहे आपन ठन् लानक् लग् पठाईल्। दाऊद ओकरमे सुटल् ओ उहिहे ओकर घरमे फिर्ता पिठाडेहल्। ओकर कुछ् समयपाछे बेतशेबा दाऊदहे मै दुई जिउक् सुईल बटु कहिके सन्देश पठाईल्।

बेतशेबाके ठरुवा, उरिया नाउँ कैलक् मनै,दाऊदके सेना मध्ये से एक बढीयाँ सैनिक रहे। दाऊद उरियाहहे लराई मनसे फिर्ता बलाईल् ओ उहिहे आपन जन्नीक जाई कहिके अनुरोध कैल्। तर उरियाह, लराईमे बाँकी रलक् आपन सिपाहिनहे छोरके आपन जईन इन्कार कैलस्। उहेक मारे दाऊद उरियाहहे लराईमे फिर्ता पठाईल् ओ प्रधान सेनापतिहे जहाँ शत्रुन्के सबसे बलगर बटाँ ओँहाँमे उहिहे ढैना आदेश डेहल ताकि उ मर्जाए।

उरियाह मुँअल तब पाछे दाऊद बेतशेबाहे विवाह कैल। पाछे बेतशेबा दाऊदके लग् छावा पाडेहल्। दाऊदके कैलक् काम डेख्के परमेश्वर धेर क्रोधित हुईलाँ। उहेक मारे ओँहाँ नातान अगमवक्ताहे ओकार पाप कट्ना दुष्ट बटिस् कहिके बटाईक् लग् दाऊदके ठन् पठैलाँ। दाऊद आपन पापके पश्चाताप कैलस् ओ परमेश्वर उहिहे क्षमा डैडेलाँ। आपन बाँकी जीवन भर दाऊद दुःख कष्टके घडीमे फेन् परमेश्वरहे पछ्याके आज्ञाकारी हुईलस्।

तर दाऊद कैलक् पापके दण्ड स्वरुप, ओकर छुटी बालखमे छावा मुँगैल्। दाऊदके बाँकी जीवनभर ओकर परिवारमे झगरा–झाँटी रहल कैलिस्। ओ दाऊदके तागत फेन हरागैलिस्, जेकर कारणसे उ महा कमजोर हुईलस्। दाउलद परमेश्वरमे विश्वास योग्य नैहुईले से फेन् परमेश्वर आपन प्रतिज्ञा अभिन विश्वास योग्य रहिँट्। पाछे दाऊद ओ बेतशेबाके डोसर छावा हुईलिस् ओ ओईने ओकर नाउँ सोलोमन ढैलाँ।