21. २१. परमेश्वर मसीहके प्रतिज्ञा कैलाँ

सक्कु चिजके सुरुवाट् हुईल रहे टब्बेँहेँसे, परमेश्वर मसिहहे पठैना योजना कैले रहिँट्। मसिह अईना बारे सबसे पहिले आदम ओ हव्वाक् ठन् प्रतिज्ञा आईल्। परमेश्वर प्रतिज्ञा कैलाँ कि हव्वाके वंशसे एक जाने सन्तान जलाम लिँहिँ जे चाहिँ सँपवाक शिर कुच्याई। हव्वाहे छलकैना उहे सँपवा शैतान रहे। उहे प्रतिज्ञाके अर्ठ चाहिँ मसिहके आगमनसे शैतानहे पुर्णरुपसे परास्त कैना रहे।

परमेश्वर अब्राहमहे प्रतिज्ञा कैलाँ कि ऊ द्धारा संसारके सक्कु जाटिक मनै आशिष पैहिँ। उहे आशिष मसिहके आगमन से पक्का हुईना रहे। ओँहाँ संसारके सक्कु जाटिक् मनैनहे उद्धारके प्रदान कैना रहिँट्।

परमेश्वर मोशाहे भविष्यमे ओँहाँ मोशा जैसिन डोसर अगमवक्ताहे खडा कैन प्रज्ञिा कैलाँ। यी मसिह ओ ओँहाँके आगमनके सम्बन्धमे डोसर एकठो प्रतिज्ञा रहे।

दाउद रजवाहे परमेश्वर प्रतिज्ञा कैलाँ कि ओकर आपन वंशके सन्तान मनसे परमेश्वरके मनैनमे सदा–सर्वदा राज्य कैहिँ। ओकर अर्थ मसिह दायदके वंशसे किल एक जाने रहिँहिँ।

यर्मिया अगमवक्ताद्धारा, परमेश्वर प्रतिज्ञा कैलाँ कि ओँहाँ एकठो लावा करार स्थापना कैहिँ, जौ चाहिँ ओँहाँ सिनै पर्वतवामे स्थापित कैल् जैसिन करार नैरहे। यी लावा करार मे, परमेश्वर आपन व्यवस्था मनैनहे ह्रदयमे लिख् डिहिँ, मनैन परमेश्वरहे आपन व्यक्तिगत रुपमे चिन्हिँ, ओईने ओँहाँक मनै रहिँहिँ, ओ परमेश्वर ओईनके पाप क्षमा कैडिहिँ। मसिह लावा करारके सुरुवात कैहिँ।

परमेश्वरके अगमवक्तानहे अईसिक् फेन कहिके कहलाँ कि मसिह एक अगमवक्ता, एक पुजाहरी ओ एक रजवा हुँइँहिँ। अगमवक्ता कहलक् उ मनैयाँ हो जे परमेश्वके वचन सुनठ ओ परमेश्वरके वचन मनैनके सामु घोषणा कैडेठाँ। परमेश्वरके प्रतिज्ञा कैलक् पठईबुँ कहिक सिरिप एकठो सिद्ध अगमवक्ता रहिँट्।

इस्राएली पुजाहारीनके मनैनके ओर से ओईनके पापके खाटिर दण्डके बडलामे क्षेमाके लग् बलिदान डैडिँट्। मनैनके लग् पुजेह्रुवानके परमेश्वरसे प्रार्थना फेन कैडिँट्। सिरिप मसिह किल एक सिद्ध प्रधान पुजाहारी रहिँट् जे आपन आपहे एक सिद्ध बलिके रुपमे परमेश्वरके ठन् अर्पण कैना रहे।

रजवा महलक् उ हो जौन राज्यक उँप्पर शासन करठ् ओ मनैन हे न्याय कै डेहठ्। मसिह किल एक सिद्ध रजवा रहिँट् जे आपन पुर्खानके दाउदके सिंहासनमे बैना रहिँट्। ओँहाँ सदा–सर्वदाके लग सारा संसार उप्पर राज्य कैना रहिँट्, ओ सदैव इमान्दारी ओ सही निर्णयके साथ न्याय कैना रहिँट्।

परमेश्वरके अगमवक्तानके मसिहके बारेमे आकुर धेर बाटक् बारेमे भभिष्यवाणी कैलाँ। मलाकी अगमवक्ता मसिह अईनासे आघे एक जाने महान अगमवक्ता अईहिँ कहिके भविषवाणी कैलाँ। यशैया अगमवक्ता मसिह कन्यासे जलम् लेहिँ कहिके भविष्यवाणी कैलाँ। मीका अगमवक्ता चाहिँ ओँहाँ बेथलेहेमके गाउँमे जलम् लिहिँ कहिके कहलाँ।

यशैया बगमवक्ता कहलाँ कि, मसिह गालीलमे बैठ्हिँ, टुटल मनहे अशान्त ह्रदयहे बान्धडिँहिँ, बन्धनमे रकलक् स्वतन्त्र कैडिहिँ, ओ कैदमे रलक् के छुटकार कैडिहिँ मसिह रोगी–बिरामीनहे ओ सुन्ना, डेख्ना, बोल्ना ओ नेँगे नै सेक्नान्हे निको कैहिँ कहिके भविष्यवाणी कैलाँ।

यशैया अगमवक्ता यी फेन अगमवाणी कैलाँ कि मसिह विनाकारण घृणा तिरस्कार कै जाई। आकुर अगमवक्तानके मसिहहे मरुईयानके ओँहाँक् लुग्राक लग् चिठ्ठा डरहिँ ओ एक जाने ओँहाँक् सँघरिया धोखा डि कहिके भविष्यवाणी कैल्। जकरीया अगमवक्ता उहे सँघरीया, मसिह हे धोखा डेलक बापट् तीस चाँदीक सिक्का भुक्तानी स्वरुप तिर डि कहिके भविष्यवाणी कैल।

अगमवक्तानके कसिहके मृत्युके सम्बन्धमे भविष्यवाणी कैलाँ। यशैया ऐसिक भविष्यवाणी कैलाँ कि मनै मसिह हे ठुक्हीँ, खिझ्वाईहिँ, ओ मरहिँ। ओईने भालासे गोझहिँ ओ धेर कष्टके साथ ओ पिडाके साथ ओँहाँ मुँहिँ, तथापी ओँहाँ कौनो किसिमके खराब कसुर नै कैले रहिँट्।

अगमवक्तानके यी फेन कहलाँ कि ओँहाँ कौनो पाप नै कैलाक् सिद्ध रहिँहिँ। ओँहाँ दोसर मनैनके पापके दण्ड पैनाके खातिर मुँना रहिन्। ओँहाँक् दण्डसे लेनासे मनै ओ परमेश्वरके बिचमे शान्ति लन्ना रहे।उहे कारणसे, मसिह हे कुचल्ना परमेश्वरके चाहना रहे।

अगमवक्तानके भविष्यवाणी कैलाँ कि, मसिह मुँहिँ पर्ना रहे ओ परमेश्वर नै ओँहाँहे मृत्युसे बौरी उठैना रहे। मसिहके मृत्यु ओ बौरी उठाईसे परमेश्वर पापीनहे बचाई ओ लावा करारके थालनी कैना ओँहाँक् योजना पुरा कैना रहिँन्।

परमेश्वरक मसिहके सम्बन्धमे अगमवक्तानहे धेर बाट् प्रकट मैलाँ, तर मसिह उ कौनो अगमवक्तान समयमे नै अईलाँ। यी अन्तिम भविष्यवक्तानहे डेलक् ४०० वर्ष से फेन् ज्यादा समयक् पाछे परकमेश्वर मसिह हे संसारमे पठैलाँ। े