23. २३. येशुके जलम्

योसेफ नाउँ कैलक् एकजाने धार्मिक मनैन्से मरियमके मगनी हुईल् रहिन्। जब मरियम नोडर जीउ हुइलक् योसेफ पटा पाईल्, ओकर जीउमे सहलक् बालक अपने नै हो कहिके उहिहे पटा हुइल्। योसेफ मरियमहे शर्ममे पर्न ईच्छा नैरहिन्, उहेक मारे मनमने गुप्ट रुपमे मरियमहे छोरडेहक् लग् योजना बनाईल्। तर ओकरसे कैनासे आघे, उ सपना पाईल् एकठो स्वर्गदुत ओकर ठने अईलाँ।

उहिहे स्वर्गदुत कहलाँ, “योसेफ, मरियमहे अपन् जन्नी रुपमे स्वीकार करक् लग् जिन डराओ। काकरे कि जौन ओहँकारमे रहलक् बालक पवित्र आत्मासे ऐलक् हुँइँट्। मरियम एकठो छावा जन्म डिहिँ। ओहाँक् नाउँ येशू धैहो। – ( एकर अर्थ हो, “यहोवे अपन् मनैन बचैहिँ )

उहेक् मारे योसेफ मरियमसे विवाह कैल् ओ उहिन्हे अपन् जन्नीक् रुपमे अपन् घरेमे नानल्, जबटक् बालकके जन्म नैहुइल् तबतक् योसेफ मरियमसँगे नैसुटल्।

जब मरियमके पैनाहा हस् लचक्याईल् , रोमी सरकार सक्कु जनहन्के जनगणा करक् लग् अपन् पुर्खानके बैठलक् शहरमे जैना उर्दी कैलस्। योसेफ ओ मरियम ओईन्के बैठ्लग् ठाउँ नासरतसे बेथलेहेममे जैना महा दुर यात्रा कैना रहिन्। काकरे कि ओईन्के पुर्खानके दाऊदके शहर बेथलेहेम रहे।

जब ओइने बेथलेहेममे अईलाँ, ओ टे बास बैठक्लग् कहुँ ठाउँ फेन् नैरहे। सक्कु ओर खँचा खँच् रहे, ओईने बैठ्ना ठाउँ नै पाके बार बैठे एकठो घारीम गैलाँ। उहे घारीमे बालक्के जन्म हुईल् ओ मरियम बालकहे डोँरोवाके धैलाँ, काकरे कि बालक् धैना कहुँ ठाउँ फेन् नैरहे । ओईने बालकके नाउँ येशू धैलाँ

उहे रातके, लग्य खेटवामे बर्दिवान्के अपन् बगाल्के रखैती रहिँट्। अचानक, ओज्रारार चमक्टी एक जाने स्वर्गदुट ओईन्के आघे देखा परलाँ, ऐसिन देख्के ओईने मनके डराईलाँ। स्वर्गदुत कहलाँ, “जिन डराओ, काकरेकि मोरिक् ठन् टुहुरीन्के लग् खुशीक् समाचार बा। टुहरीन्के लग बेथलेहेममे मसिह जलम लेलेबटाँ।

“बालखहे खोजे जाओ, ओ टुहरे ओँहाँहे कपरामे लटपटवाके ओ डोँरवाम् सुटल् भटैबो।” अचानक, बड्रीमे परमेश्वरके प्रशंसा कैटी स्वर्गदुतद्धारा अईसिक कहटी भरगैलाँ “सवोच्मे परमेश्वरके महिमा, ओ पृथ्वीमे जौन मनैनसे ओँहाँ प्रसन्न बटाँ, ओईनहे शान्ति

एकघचिक् पाछे, गोठालनके येशू जलम हुईलके ठाउँमे अईलाँ ओ स्वर्गदुत के कहल जैसिन ओँहाँहे डोँरवामे सुटल भटैलाँ। ओईने महा उत्साहित हुईल रहिट्। मरियम फेन धेर खुशी रहिन्। गोठालानके, ओईने डेख्लाँ–सुनलाँ ओ सक्कु चिजके लग् परमेश्वरहे प्रशंसा डेटी फेनसे आपन भेँरी हुईलक् खेटवाम् चलैलाँ।

कुछ समय पाछे, डुस्के पुर्वके ज्ञानी मनैनके बड्रीमे अनौठो टोरैया डेख्लाँ। ओकर अर्थ यहुदीनके एकजाने लावा रजवाके जलम् हुईल बा कहिके ओईने पटा पैलाँ। उहेक मारे उहे रजवाहे हेरक् लग् ओईने महा लम्मा यात्रा कैलाँ। ओईने बेथलेहेममे अईलाँ तब येशू ओ ओँहाँक् डाई–बाबा बैठल रलक् ठाउँ पत्ता लगैलाँ।

जब ज्ञानी मनैनके येशूहे ओँहाँक डाईक् सँगे डेख्लाँ, ओईने लिहुरके दण्डवत कैलाँ ओ ओँहाँक् आराधना कैलाँ। ओईने येशूहे बहरमुल्य उपहार चरह्ैलाँ। ओकर पाछे ओईने आपन–आपन घर चलैलाँ। बाइबलके कथा ः मत्ती १ ः लुका २ से