24. २४. युहन्ना येशुन्हे बप्तिस्मा डेहल

जकरिया ओ एलिशिवाके छावा युहन्ना भारी होके एक अगमवक्ता हुईल्। उ सुनसान उजार स्थानमे बैठे, वनमह ओ सलह खाए,ओ ऊँटक् छालासे बनल झुलुवा घाले।

धेर मनैन्के उजाड स्थानमे युहन्नाक् वचन सुने आईँट्। युहन्ना ओईन्हे ऐसिक कहिके प्रचाु करिँट, “पश्चाताप करो, काकरेकि परमेश्वरके राज्य लग्ये आसेकल बा।

जब मनैन्के युहन्नाक् शन्देश सुन्लाँ, उ मनैन् मन्से धेर मनै अपन् कैलक् पापमे पश्तावा कैलाँ, ओ ओईने युहन्नासे बप्तिस्मा लेलाँ, धेर धार्मिक अगुवानके फेन् युहन्नासे बप्तिस्मा लेहे अईलाँ, तर अगुवानके अपन् भर पाप स्वीकार ओ पश्चाताप नै कैलाँ।

युहन्ना उहे धार्मिक अगुवान्हे कहलाँ, “हे दुष्ट सन्तान हो

ओईन् मध्ये यहुदीन्के युहन्नाहे पुँछ्लाँ का यीहे मसिह हुँईट्। युहन्ना जवाफ डेठाँ, मसिह मै नै हुँ, तर महिसे पाछे ऐटि बटाँ। ओहाँ अट्रना महान बटाँ कि ओँहाँक् घालल् जुत्ताक् टेनी कुल् छुटैना योग्य फेन् नैहुँ। ”

दोसर दिन,युहन्नासे बप्तिस्मा लेहक् लग् येशू ऐलाँ, जब युहन्ना येशून्हे देखल्, तब युहन्ना कहल्, “हेरो संसारके पाप उठाके लैजैना परमेश्वरके ठुमा ”

युहन्ना येशूहे कहल्, “अपनिन्हे बप्तिस्मा डेना मै योग्य नै हुँ। बर्टुन् अपनी महिँहे बप्तिस्मा डि।” तर येशू जवाफ डेलाँ, “टुँ महिँहे बप्तिस्मा डेहिहि परी काकरे कि ऐसिक केहेँ धर्मिक बिधि पुरा कैना बढिया बा।” तब युहन्ना येशूहे बप्तिस्मा डेहल्, तथापी येशू कब्बो फेन् पाप नै कैले रहिँट्।

बप्तिस्मा लेके जब येशू पानी मन्से बाहर ऐलाँ, परमेश्वरके आत्मा कुटरीयाक् रुपमे देखा परलाँ ओ टरे उटरके ऐलाँ ओ ओहाँके कन्धम् बैठ्लाँ। उहेबेलामे स्वर्गसे परमेश्वरके बाणी ऐसिक हुईल्, “यि मोरीक् प्रिया पुत्र हुँईँट् ओ इँकहिनेसे मै महा प्रशन्न बटुँ।”

युहन्नाहे परमेश्वर कहलेरहिँट्, “पवित्र आत्मा उटरके टरे ऐहिँ ओ टुँ बप्तिस्मा डेबो टे ओहाँक् बैठ्हीँ। उहे व्यक्ति परमेश्वरके छावा रहिँहिँ। ” ओहाँ किल एक मात्रा परमेश्वरके छावा हुँइँट्। जब युहन्ना येशूहे बप्तिस्मा डेहल्, तब युहन्ना पिता परमेश्वरके बोल्लक् आवाज सुनल्, ओ परमेश्वरके छावाहे डेखल्, जौन येशू हुँइँट्, ओ युहन्ना पवित्र आत्मा डेखल्। े