45. ४५. फिलिप ओ इथियोपियाके उच्च पदाधिकारी

शूरुके मण्डलीके अगुवान मध्ये स्तिफनस नाउँ कैलक् एक जाने मनै रहिँट्। उ एक असल ओ पवित्र आत्मा ओ बुद्धिसे भरपुर हुईलक् मनै रहिँट्। स्तिफन महा धेर आश्चर्यकर्म कैले रहिँट् ओ मनैनके येशूमे विश्वास करे परि कहिके सशक्त प्रकारसे तर्क करिँट्।

जब एकदिन, स्तिफनस येशूके विषयमे शिक्षा डेटिरहिँट्, येशूमे विश्वास नै कैना यहुदीनके स्तिफनस से विवाद करे लग्लाँ। ओईने धेर रिसईलाँ ओ स्फिनस सम्बन्धमे धार्मिक अगुवानके झँुठ् गवाही डेलाँ। ओईने कहलाँ, “उ मोशा ओ परमेश्वर बारेमे दुष्ट बाट् कहलक् हम्रे सुन्ली

प्रधान पुजहारीन्के स्तिफनसहे पुँछ्लाँ, “का यी सत्य बाट् हो ?” स्फिनस ओईनहे परमेश्वरके अब्राहमसे लेके येशूके पालाके समयसम्मे कैलक् कयौं महान् काम, ओ कैसिक परमेश्वरके मनैनके निरन्तर रुपमे ओँहाँक् आज्ञापान् नै कैलक् कहिके सम्झना कैटी जवाफ डेलाँ। तब स्तिफनस कहलाँ, “अपनिनके हठी ओ विड्रोहि मनैनके हरडम पवित्र आत्माहे ईन्कार कैठी, जस्टे कि अपनिक् परखानके हरडम परमेश्वरहे इन्कार कैलाँ ओ अगमवक्तानहे मरलाँ। तर अपनिनके टे आउर धेर बाट् कैली, जौन ओईनके कैलकले आउर खराब रहे।

जब उ धार्मिक अगसवानके यी बाट् सुने, ओइने अट्ना क्रोधिट् हुईलाँ कि ओईने अपन कान छोपके ओ मनके आवाज निकारके चिल्लैलाँ। ओईनके स्तिफनसहे शहर बाहर घिँस्याके लै गैलाँ ओ स्तिफनसहे मुँओँईक लग् ढुङ्गासे मरलाँ।

जब स्तिफनस मुँएँ लागटिहिँट्, तब स्तिफनस चिल्लाके कहलाँ, “ येशू, मोरीक आत्माहृ ग्रहण करी।” तब स्तिफनस अपन ठेहुनी टेक्लाँ ओ मनके चिल्लाके ऐसिक कहिके आवाज निकरलाँ, “प्रभु, यी पापके दोष येइनके उप्पर नालाग्।” तब पाछे स्तिफनस मुँलाँ।।

शाउल नाउँ कैलक एकजाने जवान मनै स्तिफनसहे मुँवाईना मनैनसे सहमत रहे ओ ओईने ढुङ्गासे मारेबेर ओईनके झुलुवा हेरुईया रहे। उहे दिनसे, यरुशलेममे धेर मनैनहे येशूके चेलानहे सतावात करेलगलाँ, उहेक मारे विश्वासीनके भागके डोसर ओर चलागैलाँ। तर अइसिन हुईलेसे फेन ओईने जौन ठाउँमे गैलाँ, उहे ठाउँमे येशुके बारेमे प्रचार कैलाँ।

फिलिप नाउँ कैलक येशूके एकजाने चेला रहिँट् जौन सतावतके समयमे यरुशलेमसे भाग्के जैना विश्वासी मध्ये एक रहिँट्। फिलिप सामारियामे गैलाँ जहाँ येशूक बारेमे प्रचार कैलाँ ओ ओँहाँमे धेर मनैनके बाँचल रहिँट्। तब एकदिन, परमेश्वरके एक दुत फिलिपहे मरुभुमिके सडकमे जाई कहलाँ। जस्ट् फिलिप उहे डग्रेमे नेँङ्ग्टी रहिँट्, इथियोपियाके एकजाने महत्वपुर्ण सरकारी कर्मचारीहे अपन रथमे चौह्उरके जैटि कैलक् फिलिप डेख्लाँ। तब पवित्र आत्मा फिलिपहे जाके उ मनैयाँहे बाट् करे कहलाँ।

जब फिलिप उहे रथके लग्ये गैलाँ, फिलिप उहे इथियोपियाली मनैयाँहे यशैया अगमवक्ताक लिखल पत्र से पह्र्टी कैलक् सुनलाँ। उ मनैया, पह्रल्, “जैसिक भेरी काटे लै जैठाँ, ओस्टके उ अपन मुँह् नै खोलल्। ओकर अपमानित अवस्थामे फेन् उहिहे न्याय नै मिलल्। काकरे कि ओकर जीवन पृथ्वीसे हराण हुईलस्।”

जब फिलिप उ इथियोपियाली मनैयाहे पुँछ्लाँ, “अपनी जौन पढ्ती बटी का अपनि बझ्ठी ?” उ इथोपियाली मनैयाँ जवाफ डेहल्, “नाहिँ। केक्क्रो नै बटाईल् मै कैसिक बुझे सेकम् टे ? कृपया यहाँ आई ओ मोरीक लग्य बैठी। का यशैया अपन बारेमे लिख्ले रहिँट् कि डोसर जनहनके बारेमे ?”

फिलिप उ इथियाृपियाली मनैयाँहे यशैया, येशूक् बारेमे लिखल् रहे कहिके व्याख्या कैडेलाँ। फिलिप उहिहे येशूक् बारेमे सु–समाचार सुनाईक लग् आकुर पत्र फेन् प्रयोग कैलाँ

जब फिलिप ओ उहे इथियोपियाली मनैयाँ यात्रा कैटि रहिँट्, ओइृने पानी हुईलके ठाउँमे अईलाँ। उ इथियापियाली मनैयाँ कहल्, “यहाँ हेरी

जब ओइने टरे पानी हुइलक् ठाउँमे गैलाँ, तब फिलिप उ इथियोपियालीहे बप्तिस्का डेलाँ। ओइने पानीसे बाहर आ सेक्लाँ तब पाछे, अचानक पवित्र आत्मा फिलिपहे डोसर ओर लै गैलाँ जहाँ फिलिप मनैनहे येशूक बारेमे बटैटि रहिँट्।

तब उ इथियोपियाली मनैयाँ अपन घरओर जैना अपन निरन्तर यात्रा कैल ्। उ येशूनहे चिन्हलक्मे उ धेर खुश रहे।