14. १४. उजाड स्थानमे बौआइत रहलख

जब परमेस्वर सिनै परबतमे अपन करार देदेलख तब परमेस्वर एजराएलिसबके परतिग्याके देसके ओरी लेजाए लगलख,जेकराके कनानके देस भि कहलजाइए । बादलके खम्हा ओकनिके अगारी-अगारी कनान देसके तरफ डोरियाके लेगेल आ इजराएलिसब ओकर पछारी गेलख ।

काहेकी परमेस्वर अबरहाम,इसहाक आ याकुबसे कनान देस तोहनिके सन्तानसबके देहब कहके परतिग्या कएलेरहे । लेकिन उ समयमे यि देसमे बहुत समुदायके अदमिसब बसोबास करैत रहे । फिरभी येकनिके कनानि कहे । कनानिसब परमेस्वरके न त पुजे न त ओकर आग्याके माने । ओकनिके झुठा देबताके पुजे आ बहुत अपराधी कामसब करैत ।

ओहिसे परमेस्वर इजराएलीसबसे कहलख,“तोहनिके उहाँ रहल सभे कनानीसबके परतिग्याके देससे निकाल दिहे आ ओकनिसे कवनो किसिमके सम्झौता नकरिहे न त बियाहे करिहे । ओकनिसबके मुरतिके साफे ध्वस्त बनादिहे । यदि तोहनिके हमरा आग्या पालन नकरबे त,तोहनिके हमर सटामे तोहनिके ओकनिके मुरती पुजे लगबे ।”

जब इजराएलीसब कनान देसके सिमानामे पहुचलख, तब मोसा इजराएलके परतेक कुलसे एकएक जना कके जम्मा कैलख आ बारहगो अदमिके छनोट कैलख । तब मोसा उ अदमिसबके यि देसके भेद लेबेके लेल जासुसके रुपमे येकनिके पठैलख । काहेकी कनानिसब बहुत बौकार बा कि कैसन बा कहके चुपकेसे देखेकेलेल ओकनिके भेजले रहे ।

उ बारहु जना कनान देसमे चालिस दिनतक घुम-फिर करैत रहगेल,सेकरबाद ओकनिके लवटके ऐलख । तब ओकनिके मोसा आ अपन अदमिसबसे कहलख,“ओकनिके भुमि त बहुत उबजाहुर किसिमके जमिन बा ।

तब तुरुन्त दुगो जासुस कालेब,यहोसु अइसे कहलख,“ यि बात त सहि बा कि,कनान देसके अदमिसब बहुत ढेङ आ बौकारसब भि बा ,लेकिन हमनिके ओकनिके परास्त कर सकैत बारी ।

लेकिन अदमिसब कालेब आ यहोसुके बात नसुनलख । ओकनिके मोसा,हारुनसे खिसियाके कहे लगलख,“तोहनिके काहेला हमनिके अइसन भ्यानक जगहमे ल्यैले ? लराइमे मरेसे आ अपन जनानी,बालबच्चासबके दास बनाएसे त बरु हमनिके त मिस्र देसमे हि रहला ठिक रहे ।’’ फेरु मिस्रदेसमे घुमाके लजाएबला इजराएलिसब एकजना लयाँ अगुवाके माग कैलख ।

असन देखके परमेस्वर बहुत जोरसे खिसियागेल आ भेट करेबला पालमे ऐलख । तब परमेस्वर ओकनिसबसे कहलख,“हमर बिरोधमे बिद्रोह कएलाके कारन तोहनिके सभेजना यि उजार स्थानमे बौअएबे । कालेब आ यहोसु बाहेक २० बरिसके उपरिके सभेजना यिहबे मरजएबे आ परतिग्याके मुलुकमे परबेस नकरे सकबे ।

जब अदमिसब यि बात सुनल्लख,तब अपने पाप कएलमे ओकनिके बहुत दुखित होएलख । आ ओकनिके अपन हथियारसब लेके कनानि अदमिसब उपरी आकरमन करेकेलेल गेल । तब मोसा ओकनिके उहाँ नजो कहके चेतावनि देलख । काहेकी परमेस्वर ओकनिके सङे नरहे,लेकिन ओकनिके मोसाके बात नसुनलख ।

उ लराइमे परमेस्वर इजराएलिसबके सङे नगेलख,ओहिसे ओकनिके हार होगेल आ बहुत जना मारलगेल । सेकरबाद इजराएलिसब कनानसे लवटके अएलख आ चालिस बरिस तक उजार स्थानमे बौऐते रहगेल ।

चालिस बरिसतक उजार स्थानमे बौयाइतके समयमे परमेस्वर हि इजराएलिसबके हरेक घटिकमिके पुरा कैलख । परमेस्वर ओकनिके लेल स्वरगसे रोटी देलख,ओकराके “मन्ना”कहलख । परमेस्वर ओकनिके मास खाएके लेल बठइल चिरै देलख । निरजन जगहमे यातरा करैत बौआइत समयभर परमेस्वर ओकनिके नत लुगा फाटे देलख नत जुता ही फाटे देलख ।

परमेस्वर ओकनिके लेल चटानसे पानि देलख । येतना होते हुएभी,इजराएलिसब परमेस्वर आ मोसाके बिरोधमे आरोप लगैलख आ गनगन करे लगलख तबपरभी,अबरहाम,इसहाक आ याकुबसे कैल अपन परतिग्यामे परमेस्वर बिसबासयोग्य रहे ।

एकबार,जब अदमिसबके पास पिएकेलेल पानि नरहे,तब परमेस्वर मोसासे कहलख,“चटानमे तुअपन लाठिसे यि चटानमे मार तब उमेसे पानि निकलतौ ।” लेकिन मोसा सभे अदमिके सामने चटानमे दुबार लाटिसे मारके परमेस्वरके अनादर कैलख । चटानसे पानि त अएलख,लेकिन परमेस्वर मोसासे खिसियागेल आ मोसासे कहलख कि,“तु परतिग्याके देसमे जाए नसकबे ।

तब उजार स्थानमे बौयाइतके चालिस बरिसके बाद,परमेस्वरके बिरोधमे बिदरोह करेबला सभेजना मरगेलख । सेकरबाद परमेस्वर फेरु अदमिसबके परतिग्या कैल मुलुकके नजदिके लेगेल । तब मोसा बुरह होगेल रहे । ओहिसे परमेस्वर यहोसुके यि अदमिसबके हगुवाइ करो कहके छनलख । परमेस्वर मोसासे यि भि परतिग्या कएलख कि,एकदिन परमेस्वर मोसाके जइसन दोसर एकजना अगमबक्ता पठाएब ।

सेकरबाद परमेस्वर मोसाके पहारके टुपामे जाएकेलेल कहलख,ताकि परमेस्वरके परतिग्या कैल मुलुक देखसके । तब मोसा परतिग्या कैल मुलुकके देखलख,लेकिन परमेस्वर मोसाके परतिग्याके देसमे जाए नदेलख । सेकरबाद मोसा मरगेल,तब इजराएलिसब तिस दिनतक मोसाके लेल सोक मनैएलख । तब यहोसु ओकनिसबके लयाँ अगुवा भेल । यहोसु एक निमन अगुवा रहे,काहेकी उ परमेस्वरमे भरोसा परे ।