30. ३०. यिसु पाँच हजार अदमिसबके खिएलख

अदमिसबके परचार करेके लेल आ सिक्छा देबेके लेल यिसु अपन चेलासबके बिभिन्न जगहसबमे भेजएलख । जब ओकनिके यिसुके पास लवटके अएलख,तब ओकनिके कएल कामसबके बारेमे बतैलख । सेकर बाद यिसु ओकनिसबके अपनासङे समुन्दरके औपार सान्त जगहमे कुछ समय बिताएके लेल चेलासबके बोलैलख । ओहिसे ओकनिके डेङिमे चहरके समुन्दरके औपार गेलख ।

काहेकी उहबा बहुत अदमिसब रहे,तब जेकनिके यिसुके आ ओकर चेलासबके डेङिमे चहरके समुनदर औपार जाइत देखलख । तब उ अदमिसब भि यिसुसे पहिले समुनदरके औपार जाएके दाओसे पखे-पखे ओकनिके दौरके जाए लगलख । जब यिसु अपन चेलासबके सङे उ जगहमे पहुचलख,तब अदमिसबके बहुत बरका भिर उहबा पहिलेहिसे ओकनिके लेल असियाएल रहे ।

उ भिरमे जनानिसबके आ बच्चासबके छोरके करिब ५,००० हजारसे भि बहुत मरदुवासब रहे । यिसु यि अदमिसबके दया देखैल । काहेके यिसु यि अदमिसबके चरबाह बिनाके भेरा जइसन देखलख । ओहिसे यिसु ओकनिसबके सिक्छा देबे लगलख आ रोगी अदमिसबके निमन कएलख ।

जब बेरिया पहर होगेल तब चेलासब यिसुसे कहलख,“आब बहुत अबेर होगेलबा आ यिहा नजिकमे कवनो बस्ती भि न बा । यि अदमिसबके अपन-अपन घरे जाएके लेल कहदु,ताकी येकनिके अपन खनाके अपने बन्दोबस्त कली ।”

लेकिन यिसु चेलासबसे कहलख,“तोहनिके हि येकनिके लेल खनाके बन्दो बस्त कदे ।

यिसु भिरमे भेल सभे अदमिसबके पचास-पचास जनाके समुहमे बैठेके लेल कह,कहके चेलासबके अरहैलख ।

सेकरबाद यिसु पाच रोटी आ दुगो मसरी लेके स्वरगके ओरी देखके यि खनाके लेल परमेस्वरके धन्यबाद देलख ।

तब यिसु रोटी आ मसरिके टुकरा-टुकरा तुरदेलख । यिसु उ टुकरासब अदमिसबके परोसेके लेल चेलासबके देलख । तब चेलासब रोटी आ मसरी बाटदेलख आ अदमिसब खाके अघा गेल,फिरभी उ रोटी आ मसरी न ओरैलख ।

जब अदमिसब खालेलाके बाद उबरल रोटी आ मसरी जब जम्मा कैलख,तब बारह दउरासे भि बहुत उबर गेल रहे ।