32. ३२. यिसु भुतअतमा लागल अदमी आ रोग लागल स्तिरीसबके निमन कैलख

एक दिन यिसु आ ओकर चेलासब डेङिमे चहरके समुन्दरके औपार अदमिसब रहल गदरिनी एरियामे गेल ।

जब ओकनिके तालके औपार गेल तब एकजना भुतअतमा लागल अदमी यिसुके पास दौरके अएलख ।

यि अदमी बहुत बौकार रहे,काहेकी केहु भी ओकरा पकर राखे नसकैत रहे । अदमिसब ओकर हाथ आ गोर सिंकरसे बान्हके रखले रहे । लेकिन उ सिंकरके भि तुर देबे ।

उ अदमीके बास मुरघटिमे रहे । उ अदमी हरेक दिन-हरेक रात चिचियाए आ उ उघारे रहे,आ उ अपना आपके पथलसे पिटैत रहैत रहे ।

उ अदमी यिसुके पास आके ओकर गोरमे गिरगेल । तब यिसु उ भुतअतमासे कहलख,“यि मेसे निकलके बहरा आअ ।

तब भुतअतमा लागल अदमी बहुत जोरसे चिचिआइत कहलख,“अपने हमरासे कथ चाहैत बारी,“हे परमपरभु परमेस्वरके बेटा ? हमराके पिरा मत दिउ !” तब यिसु उ दुस्ट अतमासे पुसलख कि,“तोहर नाओ कथी हौ ?” तब उ उतर देलख कि,हमर नाम सेना बा,काहेकी हमनिके बहुत जना बारी ।”

उ भुतअतमासब यिसुसे बहुत बिन्ती कैलख,।“हमरा यि देससे बहरा न भेजाउ ।“तब उहबा एगो सुगरके बगाल चरैत रहे । तब यि भुतअतमासब यिसुसे बिन्ती कके कहलख कि,“ हमरा उपरी दया करु आ उ सुगरमे भेजा दुउ !” तब यिसु कहलख,“चल जोअ !”

जब उ भुतअतमासब उ अदमिमेसे नकलके बहरा अएलख आ सुगरसबके भितरी ढुकगेल । तब उ सुगरके बगाल भागे लगलख आ समुन्दरमे खसके डुबके मरगेल । उ सुगरके बगालमे करिब २,००० गो सुगरसब रहे ।

जब यि सुगरसबके देखरेख करेबला अदमी यि घटनाके देखलख,तब ओकनिके गाओके ओरी भागके गेल आ सभे अदमिसबके यिसुके कैल कामके बारेमे बतादेलख । तब उ बस्तीके अदमिसब निकलके अएलख आ भुतअतमा लागल अदमिके देखलख । यिसुके पास कपरा लगाके सान्तसे बैठल आ निमन अदमिके जइसन बातचित करैत देखलख ।

अदमिसब बहुत जोरसे डेरागेल रहे,ओहिसे अदमिसब यिसुके उहबासे निकलके चलजाए कहके बिन्ती कएलख । जब यिसु डेङिमे चहरके जाएके लेल तयार होगेल । तब भुतअतमासे निमन भेल अदमी भी यिसुके सङे जाएके लेल बिन्ती कएलख ।

लेकिन यिसु उ अदमिसे कहलख,“नअ,तु अपना घरमे लवट जोअ आ अपन दोस-महिमसबसे आ परिबारसबसे परमेस्वरके दयासे तोहरा जिबनमे कैसन काम कएलखसे उ सभे कामके बारेमे बता दे कहके हम चाहैत बारी ।”

ओहिसे उ अदमी यिसुके पाससे चलगेल आ यिसु ओकर जिबनमे कैसन काम कैलखसे उ कामके बारेमे बखान कएलख । तब अदमिसब उ बातके सुनलख तब सभेजना आसचरज मानैत छक्क परगेल ।

तब यिसु फेरुसे समुन्दरके अइपार लवटके अएलख । जब यिसु यि जग्हमे अएलख,तब बहुत बरका भिर ओकर चारुओर जम्मा होगेल आ यिसुके धकिले लगलख । उहे भिरमे एगो स्तिरी रहे । जेकराके कि,बारह बरिससे खुन गिरेबला रोगसे पिरा भोगैत रहे । उअपन सरा पैसा निमन होएके लेल बैधसबके तिर देलेरहे,लेकिन ओकर अबस्था और भि बिगरल जाइत रहे ।

ओहिसे उ स्तिरिके मालुम रहे कि,यिसु बहुत अदमिसबके निमन कैलेबा कहके सुनले रहे । तब उ सोचलख कि,“हमरा पका मालुम होगेल कि,यदी हम यिसुके खाली बस्तर सु लेहब त हम निमन हो जाएब ।

तब उ स्तिरी चपकेसे यिसुके सु लेलख,तब यिसुके मालुम होगेल कि,यिसुके सरिरसे एगो सक्ति निकल्लख । ओहिसे यिसु पछारी घुमलख आ पुसे लगलख कि,“हमरा के सुलख ?” तब चेलासब जबाफ देलख,“अपनेके चारुओर अदमिसबके भिर बा,आ अपनेके ठेल रहल बा आ अपने कहैत बारी कि,हमराके के सुलख कहके हनिसे पुस रहल बारी ?”

जब उ स्तिरी यिसुके अइसन बात पुसैत सुनके यिसुके अगारी डरसे थर-थराइत यिसुके गोरमे जाके गिरलख । आ उ कैसे अपन बिमारसे निमन होगेलीसे यिसुके बता देलख । तब यिसु ओकरासे कहलख,“तोहर बिसबाससे तोहरा निमन कलौउ सान्तिसे जोअ ।“