8. ८. परमेस्वर यिसुफके आ ओकर घरनाके बचएलख

जब समय बितैत गेल, तब याकुब बुरह्बा होगेल,तब अपन दुलरुया बेटा यिसुफके ओकर ददासबके लगे भेजलख जहाँ ओकनिके भेरा चराइत रहे । तब यिसुफके अबैत देखके येकनिके सभेभाइ मिलके योजना बनैलख कि येकराके मारके फेक दिआओ ।

काहेकी यिसुफके ओकर भाइसब घिरना करे,काहेकी याकुब यिसुफके सबसे जदा दुलार करे । आ दोसरका कारन यि रहेकी,एकदिन यिसुफ अपन भाइसब उपरी सासक होएल बारी कहके सपना देखले रहे । ओहीसे जब यिसुफ अपन भाइसबके पास अएलख,तब ओकनिके ओकरा पकरके दास बनेकेलेल ब्यपारीके हाथमे बेचदेलख ।

यिसुफके भाइसब घरे लवटेसे पहिलेही यिसुफके लुगा फारके बकरिके खुनमे बजबोर देलख । आ ओकनिके उ लबेदा अपन बाबुके लगे लेके अएलख आ अपन बाबुसे कहलख कि,यिसुफकेत जङगलके जनाबरसब मुयादेलो कहके सुनादेलख तब उ बात सुनके याकुब बहुत दुखित भेल ।

तब उ ब्यपारिसब यिसुफकेलेके मिस्र देसमे लेके चलगेल । मिस्र देस निल लदिके किनारमे रहे । यि देस बहुत बिसाल आ सक्तिसाली रास्ट रहे,उ ब्यपारिसब यिसुफके एगो धनिक आ सरकारी हाकिमके हाथमे बेचदेलख । तब यिसुफ अपन मालिकके घरपरिवारके बहुत इमानदारिके साथ रेखदेख करेलगलख तब परमेस्वर यिसुफके आसिस देलख ।

यिसुफके मलिकके जनि यिसुफकेसङे सुतेके चाहैत रहे । लेकिन यिसुफ परमेस्वरके बिरोधमे पाप करसे इनकार कैलख । उकारनसे ओकर मलकिनी खिसेयागेल आ यिसुफके बिरोधमे झुठा आरोप लगादेलख,उकारनसे यिसुफके पकरके जेलमे लेगेल । जेलमेभी यिसुफ परमेस्वरमे हि भरोसा कएलख आ परमेस्वर यिसुफके आसिस देलख ।

कुछ दिनके बाद ओकर मालिक यिसुफके जेल भेजादेख । तब यिसुफ दु बरिस,जेल काटलेलेमेभी यिसुफके जेलमेही रखले रहे । एक रात मिस्रीसबके रजा फारो दुगो सपना देखलख । तब उ सपना रजाके बहुत चिन्तामे डालदेल । ओकर कवनो भि सलहकारसब उ सपनाके रहस्य कथीबासे बताए न सकलख ।

परमेस्वर यिसुफके कैसनो सपनाके अरथ खोल देबेके लेल बरदान देलेरहे,ओहिसे फारो यिसुफसे सपनाके अरथ खोलेकेलेल जेलमेसे बोएलख । तब यिसुफ फारोके सपनाके अरथ बतादेलख आ फारोसे कहलख,”परमेस्वर सात बरिसतक यि देसमे बहुत जोरसे अन्नके उबजनी कराइ आ सेकरबाद सात बरिस तक यि देसमे अकाल परजाइ।

जब रजा अपन देखल सपनाके अरथ सुनलख । तब यिसुफसे रजा फारो बहुत खुसी भेल आ यिसुफके सरा मिस्र देसके दोसरका दरजाके सक्तिसाली हाकिमके रुपमे नियुक्त कैलख ।

तब यिसुफ यि देसके जन्तासबसे फसलके अन्न सात बरिसतक जम्मा करबैलख । जब उ देसमे सात बरिसतक अकालके समय रहलख,तबतक यिसुफ जम्मा कएल अन्नसब बेचलख ताकी अदमिसबके खाएमे कवनो किसिमके अभाव न होए ।

अनिकाल मिस्र देसमे खाली नरहे की कनान देसमे भि होएलख,जहाँ याकुब आ ओकर घरनाके अदमिसब उहबा बैठल रहे ।

ओहिसे याकुब अपन जेठ बेटाके मिस्र देसमे खाएके खातिर अन्न किनेकेलेल पठैलख । यिसुफके भाइसब अन्न किनेकेलेल मिस्रमे अएलख लेकिन यिसुफके भाइसब यिसुफके चिन्हे नसकलख,माने यिसुफ ओकनिके चिन्ह लेलख ।

जब यिसुफ हमर भाइसब परिबरतन भेलबा कि न भेल बा कहके जाच कैलख, तब यिसुफ ओकनिके कहलख,”हम तोहर भाइ यिसुफ बारी,लेकिन तोहनिके नडेरा । तोहनिके हमरा दासकेरुपमे बेचके दुस्ट काम करेके लेल खोजले,लेकिन परमेस्वर दुस्ट कामके निमन काममे बदलदेलख । तोहनिके अबैजो आ यि मिस्र देसमे रहैजो ताकी तोहनिके आ तोहर परिबारसबके खाएकेलेल हम अन्न जुटासकु ।

जब यिसुफके ददासब अपन घरमे लवटके अएलख तब यिसुफ जितेबा कहके ओकनिके अपन बाबुके खब्बर सुनादेलख तब यि खब्बर सुनके याकुब बहुत खुसि भेल ।

याकुब बुरह होगेलामेभी उअपन सभे घरनाके लेके उ मिस्र देसमे गेल आ उहबे घर बनाके रहे लगलख ।आ याकुब मरेसे पहिले अपन सभे बेटासबके आसिस देलख ।

परमेस्वर अबरहामसे परतिग्या सहितके करार कैलेरहे उ करार अबरहामसे इसहाकमे सरगेल ,इसहाकसे याकुबमे आ याकुबसे ओकर बारहु बेटामे सरगेल । तब ओकनिके सभे घरनामे भी परतिगया सहितके परमेस्वरके करार सरगेल । तब उहे याकुबके बारगो बेटाके सन्तानसे ही इजराएलके बार कुलके सुरुवात भेल ।