12. १२. प्रस्थान

इस्राएलीहुँक्रे मिश्र देश छोरके जाई पाइति कैके बरे खुशी रहँ। वैने अब् दास नाइ होईँ ओ वैने प्रतिज्ञा करल देशमे जाइतहैँ।

परमेश्वर दिनके बद्रीक खम्भा बनके डोरयैनै, ओ रातके आगीक् खम्भा बनके, ऊ वैनके आघेआघे जाए। परमेश्वर वैनके सँगे रहैँ और यात्राके समयमे वैनहे डगर देखैनै। इस्राउलीहुक्रहन करे पर्ना एक्के काम उहिन पछ्यैना रिहिन बस्।

ओकर कुछ समयपाछे, फारो ओ ओकर मनइहुँक्रे आपन मन फेन बदल लेनै ओ इस्राएलीहुँक्रहन फेनसे आपन दास बनैना चहनै। परमेश्वर फारो राजाक् मन कठोर बनादेनै ताकि मनइहुँक्रे उहे किल एक्केथो सँच्चा परमेश्वर हुइतै कैके देखैँ ओ यि जानैँ कि उहाँ अर्थात यहोवा, फारो ओ फारोक् देवीदेवतनसे ज्यादा शक्तिशाली बाटैँ।

उहेमारे फारो ओ ओकर फौज इस्राएलीहुँक्रहन फेनसे आपन दास बनाइक् लग् वैन खेद्ति अइनै। जब् इस्राएलीहुँक्र मिश्री फौजहे आइत देख्नै, वैने अपनहे फारोक् सेनाहुँक्रहन ओ लाला समुन्द्रक् बीचमे फँसल देख्नै। तभे वैने डरैनै ओ यैसिक कहिके चिल्लैनै, “हम्रे काहे मिश्र देश छोरके अइलि? अब् हम्रे मुबि।”

मोशा इस्राएलीहुँक्रहन कहनै, “नाइ डराऊ

तब् परमेश्वर बद्रिक् खम्भाहे इस्राइली ओ मिश्रीन्के बिच्चे धारदेनै ताकि मिश्रीहुँक्रे इस्राइलीहुँक्रहन नाइ देख पाईँ।

परमेश्वर मोशाहे मोशाक् हात उठाके पानीहे दूई भाग पारदेनै। तब् परमेश्वर दाहिन ओ बाहिनहोर शक्तिशाली हावा चलाके समुदूके बिच्चेसे एकथो डगर बनैनै।

इस्राएलीहुँक्रे पानीक् बिच्चे बनल सुख्खा जमिनके डगर नेँति उपार गैनै।

तब् परमेश्वर ऊ बद्रीहे डगरीमन्से हटादेनै ताकि मिश्रीहुँक्रे इस्राएलीहुँक्रहन भागत देखे सेकैँ। मिश्रीहुँक्रे वैनके पाछे लग्ना निर्णय कर्नै।

तबेमारे वैने समुद्रक् डगर हुइति इस्राएलीहुँक्रहनके पाछे लग्नै, मने परमेश्वर मिश्रीहुँक्रहन हद्बद्वा देनै ओ वैनके घोडचढीहुँक्रहन अत्क्वादेनै। वैने चिल्लाके कहनै, “भागो।”

सक्कु इस्राएलीहुँक्रे मजैसे समुद्रके उपार पुगके सेक्नै तब् परमेश्वर फेनसे मोशाहे मोशाक् हात पसारे कहनै। जब् ऊ वैसिक कर्नै, फेनसे समुद्र जस्तेक रहे ओस्तेक हुइगिल। तब् इस्राएलीहुँक्रहन पछ्छुइया मिश्री फौजहुँक्रे डुबके मरगिनै।

जब् इस्राएलीहुँक्रे सक्कु मिश्रीहुँक्रहन मुवल देख्नै, वैने परमेश्वरमे भर पर्नै ओ मोशा एक अगमवक्ता होईँ कैके विश्वास कर्नै।

इस्राएलीहुँक्रे जोशके साथ खुशी फे मनैनै काहेकि परमेश्वर वैनहुक्रहन मृत्यु ओ दासत्वसे बचैले रहैँ।

इस्राएलीहुँक्रहन परमेश्वर मिश्रीन्के उप्पर जीत देनै ओ वैन दासत्वसे बचैलेक सम्झनामे निस्तार तिउहार मनाइ कहनै। वैने ऊ तिउहार एकथो चोखा तुमा मारके उहिन खमिर नाइ दारल रोटीसँग खाके मनैनै।