13. १३. इस्राएलकेसँग परमेश्वरके वाचा
इस्राएलीहुँक्रे लाल समुद्र पार कसके सेक्नै तब्, परमेश्वर वैनहे मरुभुमि होके सिनै पहाडमे लैगिनै। यि उहे पहाड रहे जहाँ मोशा जर्तिरहल झ“ख्रा देख्ले रहैँ। इस्राएलीहुँक्रे आपन पाल उहे पहारके तरे टँग्नै।
परमेश्वर मोशा ओ यस्राएलके मनइन कहनै, “यदि तुह्रे मोर बात मन्बो ओ मोर वाचा पालन कर्बो कलेसे, तुह्रे मोर सम्पत्ति, पूजाहारीहुँक्रहनके एक राज्य ओ पवित्र जाति बन्बो।”
तीन दिनपाछे, मनइहुँक्रे अपनेआहे आत्मिक रुपमे तयार पारके सेक्नै तब्, परमेश्वर गजैन, चट्याङ, धुँवा ओ जोर विगुलके आवाजके साथ सिनै पहारके टिपुन्निमे अइनै। ऊ पहारके उप्पर जैना अनुमति मोशाहे किल रहिन्।
तब् परमेश्वर वैनहे ऊ वाचा देनै ओ कहने, “मई यहोवा हुँ, तोहोनके परमेश्वर, जे तोहोनहे मिश्र देशके दासत्वमन्से बचाइल। तुह्रे औरे कौाने देवीदेवताहुँक्रहन नाइ पूजोहो।”
“कौनो किसिमके मूर्ति नाइ बनैहो ओ वैन नाइ पूजोहो, काहेकि मई, याहोवा, डाह करुइया परमेश्वर हुइतुँ। मोर नाउँ व्यर्थमे नाइ लेहो। शबाथ दिनहे पवित्र मनोहो। ६ दिनसम् काम करके, सातौँ दिन आराम कर्ना ओ महिन सम्झना दिन उहे शबाथ दिन हो।”
“आपन दाई–बाबान्के आदर करोहो। हया नाइ करोहो। व्यभिचार नाइ करोहो। नाइ ठगोहो। आपन छिमेकीके जन्नीक्, घरके,कौनो फेन चीजके लालच नाइ करोहो।”
तब् परमेश्वर यि दशथो आज्ञा दुईथो पथ्राक् पाटीमे लिख्नै ओ मोशाहे देनै। परमेश्वर आउर फे धेउरे व्यवस्था ओ नियमपालन करेक लग् देनै। यदि वैने यि व्यवसथा पालन करिही कलेसे परमेश्वर वैनहे आशिष देना ओ वैनके रक्षा कर्ना प्रतिज्ञा कर्नै। यदि वैने यि आज्ञा भ“ग् करिही कलेसे परमेश्वर वैनहे सजाय देहिँ।
परमेश्वर इस्राएलीहुँक्रहन आपन चाहल जस्ते पाल बनाइक लग् नमूना देनै। उहिन भेट हुइना पाल कहैँ ओ एकर दुईथो कोन्टी रहे, जौन एकथो भारी पर्दासे छुट्ट्याइल रहे। मूख्य पूजाहारी ऊ पर्दाक् पाछेक् वला कोन्टीमे जाई पाईँ, कहेकी वहाँ परमेश्वर रहैँ।
कौनो फेन मनइया परमेश्वरके आज्ञा भंग कर्लेसे एकथो जनावर भेट हुइना पालके आगे रहल वेदीमे लानके परमेश्वरहे बलिके रुपमे चह्रैना रहे। एकथो पूजाहारी ऊ जनावरहे मारे ओ वेदीमे धारके जरादेहैँ। बलि चह्राइल जनावरके रगत ऊ मनइयक पाप छोपे ओ परमेश्वरके नजरमे ऊ मनइया शुद्ध हुईजिना रहे। परमेश्वर मोशाक भइया हारुन ओ हुँकार सन्तानहे आपन पूजाहारी हुइक लग् चुन्नै।
सक्कु मनइनहे परमेश्वर आज्ञा देनै कि खालि एक्केथो परमेश्वरहे पूजोहो और वैने हमरे अलग करल मनइ हुई कहिके मान लेनै। मने वाचा करल कुछ दिनपाछे वैने डरलग्तिक पाप कर्नै।
धेरे दिनसम्, मोशा परमेश्वरसँग बातचित करेक लग् सिनै पहारके टिप्पामे गइल रहैँ। मनइहुँक्रे हुँकार लौट्ना आश लागत लागत मिच्छाई गैनै। उहेमारे वैने हारुनकेथे सोन लन्नै ओ मूर्ति बनाइ लगैनै।
हारुन बछुवा जस्ते सोनेक मूर्ति बनैनै। मनइहुँक्रे ऊ मूर्तिहे पूजे लगनै ओ बलि चह्राइ लग्नै।
मोशा तरे अइनै तब् मूर्ति देख्नै, मोशा अत्ना जोरसे रिसैनै कि परमेश्वरके देहेल दशथो आज्ञाके पाटी फकाके फुटादेनै।
तब्, मोशा ऊ मूतिहिन कुटके खुर्बुस्नी करादेनै, और खुर्बुस्नी पानीमे दरनै ओ मनइहुँक्रहन ऊ पानी पिएक कहनै। परमेश्वर मनइनमे महामारी पठादेनै और धेउरे जाने मुनइ।
मोशा फेनसे पहारके उप्पर गइनै ओ इस्राएलीहुँक्रहन क्षमा करदेहेक लग् परमेश्वरसे प्रार्थना गरे। परमेश्वर मोशाके बिन्ती सुन्नै ओ वैनहे क्षमा करदेनै। आपन फुटाइल दश आज्ञाके पाटीहुँक्रन मोशा फेनसे पथ्राक् एकथो लावा पाटीमे लिखके फेनसेस्थापित कर्नै। तब् परमेश्वर इस्राइलीहुँक्रहन सिनै पहारसे वाचा करल देशओर लैगिनै।
बाइबलके कथा: प्रस्थान १९–३४
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।