15. १५. वाचाके देश

अब्, इस्राएलीहुँक्रे वाचाके देशमे भित्तर पेल्ना समय आइगिल रहे। यहोशू दुईजहान जासूसहुक्रन कनानके शहर यरीहोमे पठैनै, जौन शहरहे एकदम बलगरसे सुरक्षित करल रहे। ऊ शहरमे एकथो व्यभिचारी जन्नी रहे जे जासूसहुँक्रहन नुक्न ओ भगनमे मदत कर्निन्। ऊ जन्नी परमेश्वरमे विश्वास कर्लेक ओरसे मदत कर्निन्। तबे जासूसहुँक्रे यरीहो शहरहे नाश पारेबेर ऊ जन्नी ओ हुँकार परिवारहे नाश नाइ पर्ना वाचा कर्नै।

इस्राएलीहुँक्रे वाचाके देशके भित्तर पेलनासे आघे लदिया पार कना रहे। परमेश्वर यहोशूहे कहनै, “सुरुमे पूजाहारीहुँक्रहन जाई देऊ।” जब् पूजाहारीहुँक्रे यर्दन लदियामे पेल्नै, तब् लदिया बहना बन्द हुइगिल और वैने नेंगे उपार गैनै।

यर्दन लदिया पार करके सेकके, परमेश्वर यहोशूहे यरीहोके शहरहे आक्रमण कर्ना तरिका बतादेनै। मनइहुँक्रे परमेश्वरके बात मन्नै। परमेश्वरके बताइल जस्ते, सिपाहीहुँक्रे ओ पूजाहारीहुँक्रे ६ दिनसम् लगातार यरीहो शहरहे घेरके ओकर आँजरपाँजर घुम्नै।

तब् सातौँ दिनमे इस्राएलीहुँक्रे सात चोट आउर शहरहे द्दुम्नै। जब् वेने अन्त्मि चोट शहरहे घुमतहै, सैनिकहुँक्रे जोरसे चिल्लैनै ओ पुजाहारीहुँक्रे आपन तुरही फुक्नै।

तब् यरीहोके चारोओरिक पक्की भिता ढलगिल। इस्राएलीहुँक्रे परमेश्वरके कहल अनुसार शहरमनिक सक्कु चीज नाश करदेनै। राहाब, जे जासूसहुँक्रह नबचैले रहे, ओ हुँकार परिवारहे छोरदेनै, वैने इस्राएलीन्मे मिलगिनै। जब् कनानमे बेथुइया आउर मनइहुँक्रे इसएलीहुँक्रहन द्धारा यरीहो शहर नाश पारल पता पैनै, इस्राएलीहुँक्रे हब् आउर शहरहुँक्रहनफे आक्रमण करिहि कैके वैने डरेनै।

परमेश्वर इस्राएलीहुँक्हन कनान देशके कौनो फेन मनइनसँग कौनो सम्झौता नाइ कर्ना आज्ञा देले रहैँ। मने कनानके एक गिबोनी नाउँके जातिके मनइ यहोशूक्स“ग छल कर्नै ओ औरे देशसे आइल बाटी कैके ठग्नै। वैने यहोशूक्सँग शान्ति–सम्झौताके बात धर्नै। यहोशू ओ इस्राएलीहुँक्रे परमेश्वरहे ऊ गिबोनीहुँक्रे कहाँसे अइनै कैके नाइ पुछ्नै। और यहोशू वैनकेसँग शान्ति–सम्झौता कर्नै।

जब् इस्राइलीहुँक्रे अपनहे ऊ गिबोनीहुँक्रहनसे ठग्वा पाइल पता पैनै, वैने एकदम जोरसे रिसैनै, मने वैनके सँग करलि सम्झौता नाइ तुर्नै काहेकि ऊ परमेश्वरके आगे करल वाचा रहे। कुछ समयपाछे, कनानमे रहुइया औरे जातिके राजाहुँक्े, अम्मोनीह्ँक्रे, गिबोनीहुँक्रे इस्राएलीहुँक्रहनसँग शान्ति–सम्झौता करल सुन्नै, उहेमारे वैने आपन सेनाहुँक्रहन भेला कराके भारी फौज बनैनै ओ गिबोनीन्के उप्पर आक्रमण कर्नै। गिबोनीहुँक्रे यहोशूहे मद्दतके लग् खबर पठैनै।

तबेमारे यहोशू इस्राएलके सेनाहुँक्रहन भेला कर्नै ओ गिबोनीहुँक्रनथे पुगेक लग् पूरा रात ने·नै। झिसमिसे ओज्रारमे वैने अचानक अम्मोनी फौजके उप्पर आक्रमण कर्नै।

ऊ दिन परमेश्वर इस्राएलीहुँक्रहनके लग् लरदेनै। परमेश्वर अम्मोनीहुँक्रहन दोधारमे पारदेनै ओ भारी भारी पथ्रा पानी वैनमे वर्षादेनै, जेकर कारण धेरे अम्मोनीहुँक्रे मुनै।

परमेश्वर सूर्यहे बद्रीमे एकथो ठाउँमे रोकदेनै, ताकि इस्राएलीहुँक्रहनथे अम्मोनीहुँक्रन हिटाइक लग् धेर समय रहे। ऊ दिन, इस्राएलहे परमेश्वर बहुत भारी जित देनै।

परमेश्वर अम्मोनी फौजहुँक्रहन हिटाके सेक्नै तब् कनानके आउर जातिहुँक्रे एक होके इस्राएलहे आक्रमण कर्नै। यहोशू ओ इस्राएलीहुँक्रे फे आक्रमण कर्नै ओ वैन नाश पारदेनै।

यि लराईपाछे परमेश्वर इस्राएलके सक्कु कुलहुँक्रहन वैनहे कनान देशके अलग अलग प्रदेश देनै। तब् परमेश्वर सक्कु इस्राएलमे शान्ति देनै।

जब् यहोशू बुह्राइगिनै, ऊ इस्राएलके सक्कु मनइनहे एक्केथे भेला करैनै। तब् यहोशू वैनहे सिनै पहारमे वैनकेसँग करल परमेश्वरके आज्ञाके सम्झना करवैनै। इस्राएलीहुँक्रे परमेश्वरमे विश्वास कर्ना ओ हुँकार आज्ञा मन्ना वाचा कर्नै।