17. १७. दाऊदसँग परमेश्वरके वाचा

शाऊल इस्राएलके पहिला राजा रहैँ। ऊ मनइनके चाहल जस्ते ढेँग ओ सुग्धुर रहैँ। सुरुके कुछ वर्ष शाऊल इस्राएलमे शासन करुइया एक बह्रिया राजा रहैँ। मने पाछे जाके खराब बनगिनै ओ परमेश्वरके बात नाइ मन्नाहा हुइगिनै, तबेमारे परमेश्वर अउरे मनइयाहे चुन्नै जे एकदिन ओकर सट्टामे राजा बनुइया रहे।

परमेश्वर दाऊद नाउँके एकथो जवान इस्राएलीहे शाऊलपाछे राजा हुइक लग् चुन्नै। दाऊद बेथलेहेम गाउँमे बैथैँ ऊ एक भेँरहुवा रहैँ। आपन बाबाक् भेँरिहुँक्रहन चराइबेर धेरे चोट दाऊद आपन भेँरिहुँक्रहन बचाबयक लग् बरका बघुवा ओ भालुहुँक्रहनस मर्ले रहैँ। दाऊद नम्र ओ धर्मि मनइउा रहैँ, ऊ परमेश्वरमे भर परै”ओ हुँकार बात मानै“।

दाऊद एक भारी सिपाही ओ अगुवा बन्नै। जब् दाऊद जवान रहैँ, ऊ गोल्यत नाउँके एकथो मनइयासे लराई कर्नै। गोल्यत तालिम पाइल, एकदम बलगर ओ लग्भग् तीन मिटर जत्ना ढेँग मनइया रहे।

मनइहुँक्रे दाऊदके प्रसंसा ओ धेर प्रेम करत देखके शाऊलहे जलन हुइलिन्। तबे धेरे चो शाऊल दाऊदहे मारे खाज्नै, तबेमारे दाऊद शाऊलके डरे नुक्ति रहैँ। एकदिन शाऊल दाऊदहे मारेक लग् उहिन खोजे गइनै। शाऊल एकथो गुफाक् भित्तर पेल्नै जहाँ दाऊद शाऊलके डरे नुकल रहैँ, मने शाऊल उहिनहे नाइ देख्नै। वहाँ दाऊद शाऊलके अत्ना लग्गे रहैँ कि दाऊद शाऊलहे मारे फे सेक्तैँ, मने ऊ नाइ मर्नै। बरु दाऊद, शाऊलहे मारके अपने राजा बन्न नाइ चहथैँ कैके प्रमाणित करेक लग् शाऊलके लुग्गाक् टुक्रा कट्रनै। लुग्गाक् टुक्रा काटेबेर शाऊल पता नाइ पैनै।

अन्तमे शाऊल मुनै, ओ दाऊद इस्राएलके राजा बन्नै। ऊ एक बह्रिया राजा रहै, हो मनइहुँक्रे उहिन प्रेम करैँ। परमेश्वर उहिन आशिष देनै ओ उहिन सफल बनैनै। दाऊद धेरे लराई लरनै ओ परमेश्वर उहिन इस्राएलके दुस्मनहुँक्रन हिटाइक लग् मद्दत कर्नै। दाऊद यरुशलेमहे कब्जा कर्नै ओ ऊ शहरहे देशके राजधानी बनैनै। दाऊदके शासनके समयमे इस्राएल एक शक्तिशाली ओ धनी देश बनल।

दाऊद एकथो मन्दिर बनैना चहनै जहाँ इस्राएलीहुँक्रे परमेश्वरके आराधना करे सेकै और परमेश्वरहे बलि चह्राइ सेकै। करिब ४०० बर्षसम् मनइहुँक्रे परमेश्वरके आराधना कर्ना ओ बलि चह्रैना काम भेट हुइना पालमे कर्ति आइल रहैँ, जौन मोशा बनैले रहैँ।

मने परमेश्वर नातान नाउँके एकथो अगमवक्ताहे दाऊदकेथे यि खबर पठैनै, “तईँ लराई करुइया मनइया हुइलेक ओरसे तईँ मन्दिर नाइ बनैबे। तोर छावा मन्दिर बनाई। मने, मई तुहिन फालाफाल आशिष देम। तोर सन्तानहुक्रनमध्ये एकजाने सदाके लग् राजाके रुपमे मोर मनइनमे राज्य करि।”

जब् दाऊद यि बात सुन्नै। ऊ तुरुन्ते परमेश्वरहे धन्यवाद देनै ओ हुँकार प्रशंसा कर्नै काहेकि दाऊदहे परमेश्वर महान् आदर ओ धेरे आशिषके वाचा कर्ले रहैँ। दाऊदहे यि बात कहिया हुई कैके पता नाइ रहिन, यि बात पूरा हुइक लग् इस्राएलीहुँक्रहन मसिह अइनासे आघे लग्भग् १००० वर्षसम् असरा लग्ना रहिन्।

दाऊद धेरे वर्षसम् न्यनय ओ विश्वासयोग्यताके साथ राज्य कर्नै, तब् परमेश्वर उहिन आशिष देनै। मने, दाऊद परमेश्वरके विरद्धमे डरलग्तिक पाप कर्नै।

एकदिन, जब् दाऊदके सक्कु सैनिकहुँक्रे लराई करेक लग् घरसे दूर गइल रहैँ, ऊ आपन दरबारसे बाहेर हेर्नै तो एकथो सुग्घुर जन्नीहे लहाइत देख्नै। ऊ जन्नीक् नाउँ बतशेबा रहे।

दाऊद कहिनो कहिके बतशेबाहे आपनथे लाने पठैनै। दाऊद ओकरसँग सुत्नै और उहिन ओकर घर पठादेनै। कुछ समयपाछे, बतशेबा दाऊदहे अपने गर्भवती रहल खबर पठैनिन्।

बतशेबाक् थर्वा, उरियाह जाउँके मनइया, दाऊदके सेनाहुँक्रहनमध्ये एक बह्रिया सैनिक रहैँ। दाऊद उरियाहहे लराइमन्से फिर्ता बोलैनै ओ उहिन ओकर जन्नीक्थे जाई कहनै। मने उरियाह आपन सिपाही संघरियिन छोरके घरे जाइक् मन नाइ कर्नै। तब् दाऊद उरियाहाहे लराइमे फिर्ता पठैनै, ओ मूख्य सेनापतिहे जहाँ बलगर बलगर दुस्मनहुँक्रे बाटै वहै उरियाहाहिन् धारेक् कहनै, ताकि उरियाहा लराईमे मरजाए कैके वैसिक दाऊद सेनापतिहे कहनै।

उरियाहा मुवल तब् दाऊद बतशेबासे भोज कर्नै। पाछे, बतशेबा छावा जन्मइनिन्। दाऊदके करल काममे परमेश्वर बरे जोर रिसैनै, तबे परमेश्वर नातान अगमवक्ताहे दाऊदके पाप कत्ना खराब रहे कैके बताइक् लग् पठैनै। दाऊद आपन पापाके पश्चताप कर्नै ओ परमेश्वर उहिन क्षमा कर्नै। आपन बाँकी जीवनभर दाऊद दुखके बेलामे परमेश्वरहे पछ्यइनै ओ आज्ञाकारी रहनै।

मने दाऊदके करल पापके सजाय स्वरप, हुँकार छावा मुगिल। दाऊदके बाँकी जीवनभर हुँकार परिवारमे अशान्ति हुइति रहनिन् और दाऊदके ताकत फे हेराइगिनिन्। दाऊद परमेश्वरमे विश्वासयोग्य नाइ हुइलेसेफे परमेश्वर आपन प्रतिज्ञामे विश्वासयोग्य रहैँ। पाछे, दाऊद ओ बतशेबाक् अउरे छावा हुइनिन् और ओकर नाउँ सोलोमन धर्नै।