18. १८. खण्डाइल राज्य

धेरवर्षपाछे, दाऊदके मृत्यु हुइल और हुँकार छावा सोलोमन इस्राएलमे शासन करे लग्नै। परमेश्वर सोलोमनसँग बोल्नै ओ उहिन सबसे जयादा का चीजके चाहाना बा कैके पुछ्नै। सोलोमन ज्ञान–बुद्धि मँग्नै और परमेश्वर खुशी हुइनै ओ उहिन संसारके सबसे बुद्धिमान मनइया बनैनै। सोलोमन धेरे बात सिख्नै ओ एक बुद्धिमान न्याय करुइया हुइनै। परमेश्वर उहिनहे सम्पन्न बनैनै।

यरुसलेममे, सोलोमन ऊ मन्दिर बनैनै जौन हुँका् बाबा दाऊद बनैना योजना कर्ले रहैँ ओ ओकर लग् बनैना सामान जम्मा कर्ले रहैँ। मनइहुँक्रे अब् परमेश्वरहे पूज्ना ओ भेट हुइना पालके सट्टा मन्दिरमे बलि चहै्रनै। परमेश्वर ऊ मन्दिरमे रहैँ। और परमेश्वर आपन मनइनसँग रहनै।

मने सोलोमन अउरे देशके लहुन्दीहुँक्रहनसे प्रेम कर्नै। ऊ लग्भग् १००० जहानसे भोज कर्नै, ओ परमेश्वरके अनाज्ञाकारी हुइनै। हुँकार जन्नीहुँक्रे आपन देवताहुँक्रहन अपनसँग अन्ले रहैँ जिहिन वैने पूजै“। जब् सोलोमन बुह्रैनै, ऊ आपन जन्नीन्के देवताहुँक्रन पूजे लग्नै।

परमेश्वर सोलोमनकेमे रिसाइल रहैँ और और ओकर अविश्वनीयताके कारण सजायके रुपमे, परमेश्वर सोलोमनके मृत्युपाछे इस्राएलहे दुई राज्यमे खण्डा देना प्रतिज्ञा कर्नै।

सालोमनके मृत्युपाछे हुँकार छावा, रहावाम, इस्राएलके राजा बन्नै। रहोवाम एक मूर्ख मनइया रहैँ। इस्राएलके सक्कु मनइहुँक्रे उहिन राजा अभिषेक करेक लग् एकसाथ भेला हुइनै। वैने रहोवामहे सोलोमन राजा एकदम ज्यादा मिहिनेत ओ धेउर कर तिरेक लगाइल कैके गुनासो कर्नै।

रहोवाम मूर्खतासे वैनहे जवाफ देनै, “मोर बाबा एकदम ज्यादा मेहेनत करे लगैले बाटैँ कैके तुह्रे सोच्ले बाटो मने मई तोहोन हुँकारसे आउर ज्यादा मेहेनत करे लगैम ओ हुँकारसे ज्यादा सजाय देम।”

इस्राएल देशके कुलहुँक्रेमध्ये दश कुलहुँक्रे रहोवामके विरुद्धमे विदा्रेह कर्नै। दुई कुल किल हुँकारमे विश्वासयोग्य रहल। यि दुईथो कुल यहूदा देश बनल।

रहोवामके विरुद्धमे विदा्रह करुइया इस्राएलके आउर कुल, यरोबाम नाउँके एकजाने मनइयाहे आपन राजा बनेक लग् चुन्नै। वैने आपन राज्य देशके उत्तरओर बनैनै, और उहिन इस्राएल कहागिल।

यरोबाम परमेश्वरके विरुद्धमे विदा्रह करके मनइनहे पाप करे लगैनै। यहूदाके राज्यमे रहल मन्दिरमे जाके परमेश्वरहे आराधना क्र्वाइक छोरके ऊ मनइनके लग् आराधना करेक लग् दूर्यथो मूर्ति बनादेहेल।

यहूदा ओ इसएल दुस्मन हुइगिनै ओ घरीघरी एक–दोसरसे लर्ति रहनै।

इसाएलके लावा राज्यमे, सक्कु राजाहुँक्रे खराब रहैँ। यि राजाहुँक्रहनमध्ये धेउरे जाने अउरे इस्राएलीहुँक्रहनसे मुवायागिनै जे वैनके ठाउँमे राजा बन्ना चहाले रहै।

इस्राएल राज्यके सक्कु राजाहुँक्रे ओ धेर जैसिन मनइहुँक्रे मूर्तिपूजा करैँ। वैनके मूर्तिपुजाक् कामहुँक्रहनमे धेर जैसिन व्यभिचार ओ कबुबकु छोटछोट लरकन्के बलि सामिल करैँ।

यहूदाके राजाहुँक्रे दाऊदके सन्तानहुँक्रे रहैँ। यी राजाहक्रनमध्ये कोईकोई मजा मनइ रहै जे न्यायसे राज्य कर्नै ओ परमेश्वरहे पुज्नै। मने यहूदाके धेर जैसिन राजाहुँक्रे खराब रहैँ और वैने फेन मूर्तिपूजा कर्नै। काईकोई राजाहुँक्रे तो झुठा देवतनके लग् अपने बालबच्चनके बलि देनै। यहूदाके धेर जैसिन मनइहुँक्रे फेन परमेश्वरके विरुद्धमे विदा्रेह कर्नै ओ अउरे देवतन पूज्नै।