19. १९. अगमवक्ताहुँक्रे

इस्राएलीहुँक्रहनके इतिहासभर, परमेश्वर वैनथे अगमवक्ता पठैनै। अगमवक्ताहुँक्रे परमेश्वरसे खबर सुनै”ओ उहे खबर मनइहुँक्रहन बतादेईँ।

आहाब राजा इस्राएलमे शासन कर्ना बेलामे एलिया अगमवक्ता रहैँ। आहाब एक दुष्ट मनइया रहे जे मनइनहे बाल नाउँ रहल देवताके मूर्तिपूजा करे लगाए। एलिया आहाबहे कहनै, “मोर वचनविना सक्कु इस्राएलके राज्यभर न तो शीत परि न तो पानी परि।” यि बातसे आहाबहे बरे बरे ज्यादा रिस लग्लिस्।

परमेश्वर एलियाहे आहाबसे नुकेक लग् उजाड ठाउँमे एकथो झरन रहल ठाउँमे जाई कहनै काहेकि आहाब एलियाहे मारेक लग् रहे। हरेक बिहानके ओ साँझके, कौवा हुँकार लग् रोटी ओ सिकार लानदेहे। आहाब ओ ओकर सैनिकहुँक्रे एलियाहे खाज्नै मने नाइ भेटाइ सेक्नै। वहाँ अत्ना ज्यादा सुख्खापन रहे कि ऊ झरनैह्या सुखगिल।

तबेमारे एलिया एक छिमेकी देशमे गइनै। ऊ देशमे एकजने विधुवा ओ हुँकार छावा अनिकालके कारण खइना नाइ रहिन्। मने वैने एलियाक् ख्याल रख्नै, और परमेश्वर वैनके लग् जुटादेनै। वैनके भाँरामे रहल पिठा ओ तेल कब्बु नाइ आरैनिन्। पूरै अनिकालभर वैनकेथे खइना रहिन्। एलिया वहाँ कुछ वर्षसम् रहनै।

साह्रे तीन वर्षपाछे, परमेश्वर एलियाहे इस्राएलमे लौट्के जाई ओ आहाबकेसँग बात करे कहनै काहेकि परमेश्वर फेनसे पानी वर्ष्वाइक लग् रहैँ। जब् आहाब एलियाहे देखल, ऊ कहल, “तुही हुइतो समस्या लनुइया मनइया? तब् एलिया जवाफ देनै, “मई नाइ हुँ, मने तुँ ओ तोहार बाबाक् परिवार हो।”

इस्रएल राज्यके मनइहुँक्रे, ओ बालके ४५० जाने अगमवक्ताहुँक्रे सक्कुजे कर्मेल पहारमे अइनै। एलिया मनइहुँक्रहन कहनै, “तुह्रे कहियासम् अपन मन बदलति रहबो? यहोवा परमेश्वर बाटै कलेसे हुँकार सेवा करो।”

तब् एलिया बालके अगमवक्ताहुँक्रहन कहनै, “एकथो गोरुवा मारो ओ उहिन बलिके रुपमे तयार पारो, मने उहिनहे आगीसे नाइ जरैहो। मई फे औस्तेके करम। जौन परमेश्वर आगीसे जवाफ दिहिँ उहे परमेश्वर सच्चा हुइतै।” तबे बाल पूजाहारीहुँक्रे बलि तयार कर्नै मने आगी नाइ लग्निन्।

तब् बालके अगमवक्ताहुँक्रे यैसिक कहिके प्रार्थना कर्नै, “हे बाल, हमाहान जवाफ देऊ।”

दिन ढल्ना बेला, एलिया परमेश्वरके लग् एकथो बलि तयार कर्नै। और बाह्र गग्री पानी लानके बलिके सिकासेक् उप्पर, काठी ओ भुँइयाफे ओ वेदीक् सब भाग पूरा नाइ भिजतसम् उल्द्वाइ लगैनै।

तब् एलिया प्रार्थना कर्नै, “यहोवा अब्राहाम, इसाहाक ओ याकूबके परमेश्वर, तुहि हमार परमेश्वर हुइतो ओ मई तोहार दास हुँ। महिन उत्तर देऊ ताकि यि मनइहुँक्रे जानै कि तुँ हि एक्केथो सच्चा परमेश्वर हुइतो।”

तब् तुरुन्ते, बद्रीमन्से आगी गिरल ओ सिकार, काठी, पथ्रा, माटी और वेदीक् आँजरपाँजर रहल पानी सहित जरादेहेल। जब् मनइहुँक्रे यि सब् देख्नै, वैने भुईँयामे घोपट्या पर्नै ओ कहनै, “यहोवा परमेश्वर हुइतै।”

तब् एलिया कहनै, “बालके कौनोफे अगमवक्ताहुँक्रहन भागे नाइ देऊ।”

तब् एलिया राजा आहाबहे कहनै, “तुरुन्ते शहरमे लौट जाऊ, काहेकि पानी वर्षेक लग् बा।” एक्केघचिपाछे बद्री करिया हुइगिल, ओ बरे भारी पानी वर्षे लागल। यहोवा खडेरीके अन्त्य कर्नै, उहे किल एक्केथो सच्चा परमेश्वर हुइतै कैके प्रमाणित कर्नै।

एलियाके समयपाछे, परमेश्वर एलिशा नाउँके मनइया हुँकार अगमवक्ताके रुपमे छान्नै। परमेश्वर एलिशाद्वारा धेउरे अचम्मके काम कर्नै। ऊ अचम्मके काममध्ये एक अचम्के काम नामानके सँग हुइल। नामान दुस्मन देशके सेनापति रहैँ, उहिन छालाक् रोग लागल रहिन्। ऊ एलिशाक् बारेमे सुन्ले रहै तबे ऊ एलिशाक्थे गइनै ओ निक पारेक लग् बिनति कर्नै। एलिशा नामानहे यदैन लदियामे जाके रात चोट डुब्की लगाई कहनै।

सुरुमे तो नामान रिसैनै और यैसिक नाइ करे मन कर्नै काहेकि यि काम मूर्खता जस्ते लग्लिन्। मने पाछे नामान आपन मन बदल्नै ओ अपनहिन् सात चोट यर्दन लदियामे डुबैनै। जब् नामान अन्तिम चोट डुब्की लगाके उप्पर अइनै, हुँकार छालाक् रोग पूरा निक हुइगिल रहिन्।

परमेश्वर आउर फे धेउरे अगमवक्ताहुँक्रहन पठैनै। वैने सक्कुजे मनइहुँक्रहन मूर्तिपूजा छोरे ओ आउर मनइनमे न्याय ओ दया देखाइ कहनै। अगमवक्ताहुँक्रे मनइहुँक्रहन चेतावनी देनै कि यदि तुह्रे खराब काम करे नाइ छोरबो ओ परमेश्वरके बात नाइ मन्बो कलेसे, परमेश्वर तोहोन दोषि ठहरैहि ओ सजाय दिहि।

मनइह“ुके्र परमेश्वरहे नाइ सुन्नै। वैने जब्फेन अगमवक्ताहुँक्रहनसे नाइ मजा व्यवाहार कर्नै ओ किहिनो–किहिनो तो मार देनै। एकचोट, यर्मिया अगमवक्ताहे सुख्खा कू“वामे धारदेनै ओ मुएक लग् वहैँ छार्देनै। यर्मिया कू“वक् हिल्लामे धसगिनै, मने राजा हुँकारमे दाया कर्नै ओ आपन नोक्रहुवन् यर्मियाहे कू“वामन्से निकारे लगैनै।

मनइहुँक्रे अगमवक्ताहुँक्रहन्हे घृणा कर्लेसे फेन वैने परमेश्वरके लग् बोल्ति रहनै। पश्चताप नाइ करुइया मनइहुँक्रहन् परमेश्वर नाश करिहि कैके चेतावनी देति रहनै। वैने मनइहुँक्रहन् मसिह अइना प्रतिज्ञा फे सम्झना करवैनै।