20. २०. निर्वासन ओ फिर्ती

इस्राएलके राज्य ओ यहूदाके राज्य, दुनुजे परमेश्वरके विरुद्धमे पाप कर्नै। परमेश्वर वैनसँग सिनै पहारमे बाँधल वाचा वैने भंग कर्नै। परमेश्वर वैनहे पश्चताप करे ओ अपनहे पूजे कैके चेतावनी देहेक लग् अगमवक्ताहुँक्रहन पठैनै मने वैने आमवक्तहुँक्रहनके बात नाइ मन्नै।

तबेमारे परमेश्वर दुनु राज्यहुँक्रहन् वैनके दुस्मनद्वारा नाश हुईदेनै। एक शक्तिशाली ओ क्रूर देश अश्शूरी राज्य इस्राएलके राज्य नाश पारदेहेल। अश्शूरीहुँक्रे इस्राएल देशके धेरे मनइहुँक्रन मर्नै, ओ वैनके महंगा महंगा सामान सक्कु लैगिनै और देशके धेउरे ठाउँ जरादेनै।

अश्शूरीहुँक्रे सक्कु अगुवा, धनी मनइ, रसीप रहल मनइहुँक्रहन जम्मा करके वैनहे अश्शुरके देशमे लैगिनै। नाइ मारगिल गरिब इस्राएलीहुँक्रे किल इस्राएलमे बाँकी रहिगिनै।

तब् अश्शूरीहुँक्रे इस्राएलके राज्यमे विदेशीहुँक्रहन लानके धर्नै। विदेशीहुँक्रे भत्कल शहरहे फेनसे बनैनै ओ इस्राएलीहुँक्रहनसे भोज कर्नै। विदेशीहुँक्रहन् भोज करुइया इस्राएली सन्तानहुँक्रहन ‘सामरी’ कहागिल।

यहूदाके मनइहुँक्रे परमेश्वरमे विश्वास नाइ कर्लेक ओ हुँकार बात नाइ मन्लेक कारण कैसिके इस्राएलीहुँक्रहन् सजाय देनै कैके देख्नै। तभुनफे वैने कनानी देवताहुँक्रहन पूज्ती रहनै। परमेश्वर वैनहे चेतावनी देहे अगमवक्ता पठैनै, मने वैने सुनेक मन नाइ कर्नै।

अश्शूरीहुँक्रे इस्राएल नाश कर्लेक १०० वर्षपाछे परमेश्वर बेबिलोनके राजा, नबूकदनेसरहे यहूदाक् राज्यमे आक्रमण करे पठैनै। बेबिलोन एक शक्तिशाली देश रहे। यहूदाके राजा नबूकदनेसरके दास हुइना ओ हरेक वर्ष उअिन धेउरे पैसा तिर्ना सहमत हइनै।

मने कुछ वर्षपाछे, यहूदाके राजा बेबिलोनके विरुद्धमे विदा्रेह कर्नै। तबेमारे, बेबिलोनीहुँक्रे फेन अइनै ओ यहूदाके राज्यहे आक्रमण कर्नै। वैने यरुशलेमके शहर कब्जा कर्नै, मन्दिर भत्कादेनै, और शहर ओ मन्दिरमे रहल सक्कु सम्पत्ति लैगिनै।

विदा्रेह कर्लेक कारण यहूदाके राजाहे सजायके रुपमे नबूकदनेरसके सिपाहीहुँक्रे हुँकार छावाहे हुँकारे आघे मारदेनै और उहिन आँधर करादेनै। ओकरपाछे, वैने राजाहे झ्यालखानामे दारे बेबिलोन लैगिनै।

नबूकदनेसर ओ हुँकार फौज खेतवक् काम करेक लग् गरीब मनइहुँक्रहनभर वहैँ खेतवक् काम करेक लग् छोरदेनै ओ बाँकी सक्कुजहान वेबिलोन लैगिनै। यिहे समयमे परमेश्वरके मनइ प्रतिज्ञाके देश, कनान छोर्ना बाध्य हुइनै, यिहिने निर्वासन कहल हो।

परमेश्वर मनइहुँक्रहन् वैनके पापके कारण निर्वासनमे दुर लैजाके सजाय देनै, मने वैनहे ओ आपन करल प्रतिज्ञा नाइ बिस्राइल रहैँ। परमेश्वर आपन मनइनके रेखदेख कर्ना ओ वैनसे बात कर्ना काम आपन अगमवक्ताहुँक्रहन् पठाके यि काम जारी रख्नै। सत्तरी वर्षपाछे फेनसे प्रतिज्ञाके देश लौटीहि कैके परमेश्वर प्रतिज्ञा कर्नै।

सत्तरी वर्षपाछे फारसीहुँक्रहनके राजा, कोरेस बेबिलोनहे लराईमे हितैनै, तबेमारे फारसी साम्राज्य बेबिलोनी साम्राज्यहे प्रतिस्थापित कर्नै। अब् इस्राएलीहुँक्रहन् ‘यहूदीहुँक्रे’ कैके कहैँ ओ वैने आपन जीवन बेबिलोनेमे बितैनै। कौनो कौनो यहूदीहुँक्रे किल आपन यहूदा देशहे सोचैँ।

फारसी साम्रमज्य एक शक्तिशाली साम्राज्य रहे मने वैने आपन कब्जा करल मनइहुँक्रहनमे दया करै वैने दयालु रहैँ। कोरेस फारसीहुँक्रहनके राजा हुइलेक कुछ समयपाछे, ऊ जौन–जौन यहूदी यहूदा जइना चाहता कलेसे फारसी देशहे छोरके यहूदा लौटे सेक्बो कैके आदेश जारी करदेहेल। राजा वैनहे मन्दिरहे फेनसे बनाइक लग् रुपिया–पैसा देहल।

जब् मनइहुँक्रे यरुशलेम अइनै, वैने मन्दिर ओ शहरके भिात फेनसे बनैनै। वैनेके उप्पर अभिन फे अउरे राज्य शासन करतेहे तौनफे फेनसे वैने प्रतिज्ञाके देशमे बैथे ओ ऊ मन्दिरमे आराधना करे पइनै।