3. ०३. जलप्रलय

धेउर समयपाछे, दुन्यामे बहुत धेउर मनाई हुइलेक आोरसे ओइने ज्यादै खराब हुइगिनै। यी खराब चाल चालन ज्यादा बहरलेक ओरसे परमेश्वर यी दुन्याहिन् एक्थो बर्वार बहियासे खटम करना सोच बनैनई।

मने नोआ परमेश्वरसे निगाह पइनै। खराब मनइहुँक्रहनके बीचमे ऊ एकथो धर्मि मनइया रहै। परमेश्वर नोआहे बहिया पठैना बात बतैनै। परमेश्वर नोआहे एकथो जहाज बनाइ लगैनै।

परमेश्वर नोआ हे लग्भग् १ सय ४० मिटर नम्मा, २३ मिटर चाकिल, ओ १३.५ मिटर ढेंग बरवार लाउ बनाइ कहनै। ऊ, जहाजहे कठ्रवासे ३ तल्हक् बनाइ पर्ना रहे ओ मोका फेन हुइपर्ना रहे। ऊ बरवार लाउ मे नोआ ओ हुँकार परिवार ओ हर किसिमके धर्तिमे बैथ्ना जनावर हुँक्रहन् बहियासे बचइक ओम्मे धरना रहे।

नोआ परमेश्वरके बात मन्नै। नोआ ओ हुँकार तीन थो छावाहुँक्रे परमेश्वरके कहल जस्ते बरवार लाउ बनैनै। बरवार लाउ बरे भारी रहलेक ओरसे उहिन बनैना धेरे वर्ष लागल। नोआ मनइहुँक्रहन् बहिया अइना बा कैके चेतावनी देनै और वेनहे परमेश्वरके ओर लौट्ना सजक करैनै, मने वैने हुँकार बातमे विश्वास नाइ कर्नै।

परमेश्वर नोआहे, हुँकार परिवार ओ जनावरहुँक्रहन चहना जत्ना खयना चीज जम्मा करे लगैनै। जब् सक्कु चीज तयार हुइगिल, परमेश्वर नोआहे अब् समय आइगिल कहनै ओ ऊ, हुँकार जन्नी, हुँकार तीन छावाहुँकन ओ पतोहियन सक्कुजहान जहाजमे जाइ कहनै (वैने जम्मा आठ नो रहैँ)।

परमेश्वर लवरा ओ लहुन्दी करके सक्कु किसिमके पशुपन्छीके एक–एक जोर नोआक्थे पठैनै ताकि बहियाके समयमे वैने सबजे बरवार लाउ मे सुरक्षित रहैँ। परमेश्वर बलिके लग् चहना पशुपँछी हरेकके सात–सात जोरी लवरा ओ लहुन्दी करके पठैनै। जब् वैने सक्कुजे बरवार लाउ के भित्तर गइनै, तब् परमेश्वर बरवार लाउ के दुवार बन्द करदेनै।

तब् पानी आइना सुरु हुइल। चालीस दिन ओ चालीस रातसम् लगतार पानी आइती रहल। तरेसे फेन पानी बरे जोरसे छल्कतेहे। सारा संसार ओ ढेंग ढेंग पहारहे फेन पानीमे बुरगील रहे।

सुख्खा धर्तिमे जीईना सक्कु चाीज मरगिनै, बरवार लाउ भित्तर रहल मनइ ओ पशुपंक्षीहुँक्रे किल जीत्ती रहैँ। बरवार लाउ पानीमे उत्राइल रहे ओ भित्तर रहल सक्कुहुन बुरना बचैले राखल।

पानी वर्षना थम्हलके पाँच महिनासम् जहाज पानीमे उत्राइल पलि रहल, ओ उहे बीचमे पानी सुख्ति जाइतेहे। और एकदिन एकथो पहारके टिप्पामे बरवार लाउ रुकगिल, मने पृथवी अभिनसम् पानीमे डुबल रहे। तीन महिनापाछे, आउर पहारके उप्रेक भाग देखाइ लागल रहे।

आउर चालीस दिनपाछे नोआ एकथो कौवाहे पानी सुखल बा कि नाइ कैके हेरे बाहेर पठैनै। कौवा यहरओहोर सुख्खा धर्तिके खोजीमे उरे लागल, मने कहुँ फेन नाइ भेटाइल।

पाछे नोआ एकथो ढौरी चिरैँया हे पठैनै। मने ऊ फेन सुख्खा धर्ति नाइ भेटैलस, तबेमारे ऊ नोआक्थे लौट्के आइगिल। ओकर एक हप्तापाछे नोआ फेन उहे ढौरी चिरैँया हे पठैनै, ओ ऊ चिरैया आपन ठोँरेमे एकथो जैतुनके दँहिया लैके आइल। पानी सुख्ति जाइतेहे ओ झारपात जम्ति जाइतेहे।

एक हप्ता आउर रुक्नै तब् नोआ तिसर बेर ऊ चिरैयाहे बाहेर पठैनै। यि बेरमे ऊ चिरैया आराम कर्ना ठाउँ भेटाइगिल ओ ऊ लौटके नोआक्थे नाइ आइल। पानी सुखत जैतिरहे।

दुई महिनापाछे परमेश्वर नोआहे कहनै, “तँई ओ तोर परिवार सक्कु पशुपंक्षीहुँक्रहन जहाजसे बाहेर निक्रे सेक्बो। तुह्रे धेउरे सन्तान जन्मैहो ओ फेनसे सारा पृथ्वीमे भरति जिहो।” तब् नोआअ ो हुँकार परिवार जहाजसे बाहेर अइनै।

बरवार लाउ से बाहेर अइलेकपाछे नोआ परमेश्वरके लग् एकथो पुजा करना ठाउँ (पाटा) बनैनै ओ ऊ पाटामे बलिके धारल जनावरहुँक्रहनके बलि चह्रैनै। परमेश्वर ऊ बलिसे खुशी हुइनै और नोआ ओ हुँकार परिवारहे आशिष देनै।

परमेश्वर प्रतिज्ञा कर्नै, “अब् मई कब्बु फेन मनइनके खराबिके कारण यि पृथ्वीहे श्रापित नाइ बनइम, बहियासे नाश नाइ करम, मनइनके मन छोट्टीहिसे खराब रथिन तौनफे अब् बहियासे नाश नाइ करम।”

तब् परमेश्वर प्रतिज्ञाके चिन्हके लग् इन्द्रेणी बनैनै। हरेक बेर जब् उप्पर बदरीमे इन्द्रेणी देखाइ देहेथ, परमेश्वर आपन मनयनसँग करल वाचा सम्झथैँ।