4. ०४. अब्रहामकेसग् परमेश्वरके वाचा

बहिया अइलेक धेउरे वर्षपाछे, संसारमे मनइहुँकहनके संख्या बहरति गैल, ओ वैने सक्कुजाने एक्के भाषा बालैँ। मने परमेश्वरके कहल जस्ते पृथ्वीमे भरेक छोरके वैने एकथन कुरिहिया गैनै ओ एकथो शहर बनाइ लग्नै।

वैने बहुत घमण्डी रहैँ, और परमेश्वरके कहल बातके मतलबे नाइ कर्नै। वैने स्वर्गसम् पुगेक लग् ढेंग धरहरा बनाइ लग्नै। यदि वैने आउर एकसाथ खराब काम कर्ति जैलेसे वैने आउर ज्यादा अधर्मी हुई सेक्ना बात परमेश्वर देख्नै।

तबेमारे परमेश्वर वैनके भाषा अउरे धेरे भाषामे बदलदेनै और मनइहुँक्रहन तितिरबितिर पारदेनै। वैने जौन शहर बनाइ सुरु कर्ले रहैँ, ऊ शहरके नाउँ ‘बाबेल’ रहे, जेकर अर्थ ‘अलमलमे पर्ना’ कैके रहे।

सयौं वर्षपाछे, परमेश्वर अब्राम नाउँ रहल एकजाने मनइयासे बोल्नै। परमेश्वर उहिनहे कहनै, “तोर देश ओ घरानाहे छोर् ओ मई तुहिन देखैम उहे ठाउँमे जा। मई तुहिन आशिष देम ओ तुहिन देहेल ठाउँहे एकथो भारी देश बनैम। मई तोर नाउँ महान् करैम्। मई तोर नाउँहे भारी पारम। तुहिन आशिष देहुइयन मई आशिष देम ओ तुहिन श्राप देहुइयन श्राप देम। पृथवीमे रहल सक्कु घरानाहुँक्रे तोर कारण आशिषित हुइहिँ।”

तब् अब्राम परमेश्वरके बात मन्नै। ऊ आपन जन्नी साराइ, आपन नोकरहुँक्रहन ओ आपन सक्कु चीज लैके परमेश्वरके देखाइल देश ओर गइनै।

जब् अबम कनान देशमे पुग्नै, परमेश्वर कहनै, “आपन चारुओर हेर। तई ओ तोर सन्तानहे तई जत्ना देखे सेकते ओत्ना सब देश पैतृक सम्पत्तिके रुपमे तुहिन देम।” तब् अब्राम ऊ देशमे बैथे लग्नै।

एकदिन, अब्राम परमेश्वरके पुजाहारी, मल्कीसेदेकहे भेट्नै। मल्कीसेदेक अब्रामहे आशिष दैके कहनै, “आकाश ओ पृथवीके मालिक, सर्वोच्चके परमेश्वर तुहिन आशिष देईँ।” तब् अब्राम मल्कीसेमेकहे आपन सक्कु सम्पत्तिके दशांस देनै।

धेरे वर्ष बितगिल मने अब्राम ओ साराइके सन्तान नाइ रहिन्। परमेश्वर अब्रामसे बोल्नै ओ फोसे वाचा कर्नै कि ओकर एकथो छावा हुई ओ ओकर सन्तानहुँक्रे तोरैया”जस्ते धेर हुइहिँ। अब्राम परमेश्वरके वाचामे विश्वार कर्नै। परमेश्वर अब्रामहे धर्मि ठहरैनै काहेकि अब्राम परमेश्वरके वाचामे विश्वास कर्नै।

तब् परमेश्वर अब्रामसे एकथो करार(वाचा) बन्ध्नै। करार दुई पक्ष बीचके सम्झौता हो। परमेश्वर कहनै, “तोर अपने शरीरसे मई तुहिन एकथो छावा देम। कनान देश मई तोर सनतानहुँक्रहन् देम।” मने अब्रामके एकथो छावा फे नाइ रहिन्।