31. ३१. येशू पानीक् उप्पर नेङ्ग्नै

तब् भीरहे बिदा करके सेकके येशू चेलाहुक्रहन् लाउमे चहुरके समुन्द्रके उपार जाई कहनै। भीरहे बिदा करके सेकके येशू प्रार्थना करे पहारमे गइनै। येशू वहाँ अकेलि रहैँ, ओ रातके बरे बेरसम् प्रार्थना करति रहनै।

चेलाहुँक्रे लाउ चलैति रहै, बरे बेर हुलि रहे तोनफे मने वैने भर्खर समुन्द्रक् बीच्चेहि पुगल रहैँ। हावा उल्टा बहलेक ओरसे वैनहे लाउ चलैना कर्रा परतिहिन।

येशू प्रार्थना करके सेक्नै तब् चेलाहुँक्रहनथे गइनै। येशू समुन्द्रक पानीक् उप्पर नेङ्ग्ति वैनथे गइनै।

जब् चेलाहुँक्रे येशूहे देख्नै, वैने बरे जोर डरैनै काहेकि वैने उहिन भूतुवा हो कैके सोच्नै। वैने डराइल बाटै कैके येशूहे पता रहे, तबेमारे येशू वैनहे कहनै कि नाइ डराऊ, मई हुँ।

तब् पत्रुस येशूहे कहनै, “गुरुज्यू, यि तुँहि हुइबो तो, महिन तोहारथे पानीक् उप्पर अइना आज्ञा करो।” येशू पत्रुसहे आऊ कहिके कहनै।

तबे, पत्रुस लाउमन्से निक्रनै और पानीक् उप्पर येशू रहल ठाउँमे जाइ लग्नै। मने नेङ्ग्ति नेङ्ग्ति, येशूहे नाइ हेरके अन्ते समुन्द्रक् होल्कारामे ओ आँधीमे ध्यान देहे लग्नै।

तबेमारे पत्रुस डरैनै ओ डुबे लग्नै। तब गुरुज्यू, महिन बचाउ कहिके जोरसे चिल्लैनै

पत्रुस ओ येशू लाउमे चहरनै तुरुन्ते आँधी और पानी रुक्गील। चेला हुकरे अचम पर्नै। वैने यैसिक कहति येशूक् आराधना कर्नै, “जात्तिसे, तुँ परमेश्वरके छावा हुइतो।”