38. ३८. येशूहे धोखा करल

हर साल, यहूदीहुँक्रे निस्तार तिउहार मनाईँ। यि एकथो खुशीयाली रहे। परमेश्वर वैनके पूर्खन् मिश्रदेशके कर्मया मन्से छुटैले रहै, तो उहे छुटकाराके तिउहार सम्झनाके रुपमे मनाईँ। येशू आपन चेलाहुक्रहन् वैनसँग निस्तार तिउहार मनइना बात कहनै।

येशूक् चेलवन्मध्येसे यहूदा नाउँ रहल एकथो चेलवा रहे। यहूदा चेलवनके पैसा धरना काम करे, ऊ पैसाहे प्रेम करे ओ थैलीमन्से पैसा चोराए। येशू ओ चेलचहुँक्रे यरुशलेममे अइनै तब्, यहूदा यहूदी अगुवाहुक्रहनथे गइल ओ र्पसा लेके येशूहे वैनथे पका्रदेना बात करल। यहूदी अगुवाहुँक्रे येशू, मसिह हुइतै कैके विश्वार नाइ करैँ ओ येशूहे मर्ना जुगार लगैति रहैँ। ओ यि बात यहूदा जन्ले रहे कि वैने येशूहे मारेक् लग् बाटैँ।

मूख्य पूजाहारी ओ यहूदी अगुवाहुँक्रे येशूहे पक्रवाइक् लग् यहूदाहे तीस चाँदीक् सिक्का देनै। अगमवक्ताहुँक्रे भविष्यवाणीबरल बात पूरा हुइक लग् यि सब हुइल। यहूदा पैसा लेहेल ओ येशूहे पक्र्वादेहेक लग् मनैका हेरति रहे।

यरुशलेममे, येशू आपन चेलाहुँक्रहनसँग निस्तार तिउहार मनैनै। निस्तारके बेला,येशू रोटी लेनै ओ उहिन तुर्नै। येशू कहनै, “यि लेऊ ओ खाऊ। यि मोर शरीर हो, जौन तोहोनके लग् देहेल बा। यि मोर सम्झनामे करोहो।” यसिके, येशू कहनै, कि हुँकार शरीर वैनके लग् बलिदान हुइ।

तब् येशू खोरया लेनै ओ कहनै, “यि पिओ। यि नया”वाचाके मोर रगत हो, जौन पाप क्षमाके लग् बहल बा। जब्जब् तुह्रे यि पिबो मोर सम्झनामे कराहो।”

ओकरपाछे, येशू चेलाहुँक्हन कहनै, “तोहोनमधयेसे एकजाने महिन धोखा दि।” चेलाहुँक्रे अचम पर्नै ओ पुछ्नै कि के तुहिन धोखा दि। येशू कहनै, “जिहिन मई रोटीक् खण्डा देम, हे विश्वासघाती हो।” तब् येशू रोटीक् खण्ढा यहूदाहे देनै।

यहूदा रोटी लैके सेकल तब् ओकरमे शैतान पेलगिल। यहूदा वहाँसे निकरके येशूहे पक्र्वायक् लग् यहूदी अगुवाहुँक्रहनथे गइल। यि सब रातिक बात रहे।

खाना खाके सेकके, येशू ओ हुँकार चेलाहुँक्रे जैतुन पहारमे नेङ्ग्ति गैइनै। येशू कहनै, “तुह्रे आज रातके महिन छोरदेबो। जैसिन लिखल बा, ‘ मइृ गोठालाहे हम्ला करम ओ सब भेँरिहुँक्रे छिदिर–बिदिर हुइजिहिँ।’”

तब् पत्रुस कहनै कि प्रभु औरे जाने तुहिन छोरदिहिँ मने मइृ तुहिन नाइ छोरम।

ओ पत्रुस येशूहे यि फे कहनै, “महिन मूये परि तभुन मइ तुहिन नाइ छोरम।”

येशू आपन चेलाहुँक्रहनसँग गेतसमनी कहना ठाउँमे गइनै। येशू हुँकार चेलाहुँक्रहन परीक्ष्ाँमे नाइ परेक लग् प्रार्थना करोहो कैके कहनै। ओ येशू अपने प्रार्थना करे गइनै।

येशू तीन चोट प्रार्थना कर्नै, “हे बाबा, हुइसेकी कलेसे, यि दुख दुर करदेऊ। मने मनइनके पाप क्षमाके लग् औरे कौनो डगर नाइ हो कलेसे, तोहार इच्छा पूरा हुये।” येशू बरे ज्यादा दुखी हुइगिल रहैँ, हूँकार पस्ना रगतके थोपा जस्ते भुइयामे गिरतहे। तब् परमेशवर स्वर्गदूतहे येशूहिन् बल देहेक लग् पठैनै।

प्रार्थना करके सेकके, येशू हुँकार चेलाहुँक्रहनथे अइनै,तो वैन सुतत देख्नै। जब् येशू तिसर बेर प्रार्थना करके खइनै, तब् वैन उठो कैके कहनै।

यहूदी अगुवाहुँक्रे, सैनिकहुँक्रे ओ तरवार ओ भठ्ठा लेहेल मनइ यहूदाक् सँगे अइनै। यहूदा येशूक्थे आके येशूहे चुमल। ष्हिे मनइयाहे पक्रना हो कैके यहूदी अगुवाहुँक्रहन जनाइक लग् यहूदा येशूहे चुमल। तब् येशू यहूदाहे कहनै, “यहूदा, तुँ महिन चुमके धोखा देहेतो?”

जब् सेनाहुँक्रे येशूहे पकरनै, पत्रुस तवारसे मूख्य पूजाहारीक् एकथो नोकरहुवक् कान काटदेनै। मने येशू कहनै कि तरवार नाइ चलाऊ। ओ ऊ नोकरहुवक् कान जोटादेनै।