46. ४६. पावल विश्वासी बन्नै।

शाऊल एक जवान मनइया रहे जे स्तिफनसहे मरुइयनके देखरेख करे। ऊ येशूहे विश्वास नाइ कर्ले रहे, तबे ऊ विश्वासीहुँक्रहन सताए। उ येरुशलेमके घर घर मे जाके थारु और जन्नी दुृन्हुन् पकरके झ्यालखानामे दारदेहे। मुख्य पुजारी शाऊलहिन, दमस्कसके शहरमे जाके विश्वासीहुकाहान पकर्के यरुशलेममे लन्ना अनुमति देले रहे।

जब् शाऊल दमस्कसओर जाइतेहे तब् स्वर्गसे एक्थो ओज्रार ज्योति ओकर आन्जर पान्जर चम्कल। ऊ भुँइयामे गिरगिल और ऊ यैसिक कहत सुनल सुनल, “शाऊल, शाऊल, तुँ काहे महिनहे सतैथो? शाऊल पुछल, “प्रभु तुँ के हुईतो”? तब् यी अवाज शाऊल सुन्नै कि, “मई येशू हुँ, जिहिन तुँ सतइथो। मनो उठ्के सहरमे जाऊ, तुहिन् का करेक परि ऊ मई बतइम”।

जब् शाऊल उठ्नै, ऊ कुछ फे नाइ दखे लग्नै। हुँकार संघरियन उहिन दमस्कससम् डोरयैति लैगिनै। शाऊल तीन दिनसम् न कुछ खैनै न पिनै।

दमस्कसमे हननिया नाउँके एकजाने चेला रहैँ। परमेश्वर उहिन कहनै, “ऊ घरमे जाऊ जहाँ शाऊल बैथल बाटैँ। तोहार हात हुँकारमे धरोहो ताकि ऊ फे देखे सेकैँ।” मने हननिया कहनै, “प्रभु, यि मनइया तो विश्वासीह“ुक्हन सतैले बाटैँ कैके मई सुन्ले बाटुँ।” परमेश्वर उहिन कहनै, “जाऊ, काहेकि अन्यजाति ओ राजान् ओ इस्राएलके सन्तान हुँक्रहनके आघे मोर नाउँके परचार करेक लग् चुनागिल बाटैँ।”

उहेमारे हननिया शाऊलकेथे गइनै, आपन हात हुँकारमे धर्नै, ओ कहनै, “येशू,जिहिन तुँ डगरीमे देख्लो, उहे महिन तोहारथे पठैनै ताकि तुँ फेनसे देख्नाहा हुइ जाऊ ओ पवित्र आत्मासे भरजाऊ।” शाऊल तरुन्ते फेनसे देख्नाहा हुइगिनै, ओ हननिया उहिन बप्तिसमा देनै। शाऊल कुछ खैना खैनै तब् ताकत अइनिन।

ओकर लगत्तै, शाऊल दमस्कसमे रहल यहूदीहुँक्रहन यैसिक परचार करे लग्नै, “येशूहि परमेश्वरके छावा हुइतैँ।”

धेरि दिन पाछे, यहूदीहुँक्रे शाऊलहे मर्ना योजना बनैनै। उहिन मारेक् लग् वैने शहरके दुवार–दुवारमे मनइन नुकके बैथे लगैनै। मने शाऊल ऊ योजनाक् बारेमे सुन्नै ओ हुँकार संघरियन उहिन वहाँसे भगनामे मदत कर्नै। एक रात वैने उहिन डालोमे दारके शहरके भितामन्से तरे उतारदेनै। शाऊल दमस्कससे भागके सेकके फे निरन्तर येशूक् बारेमे परचार कर्ति रहनै।

शाऊल चेलाहुँक्रहन भेछटे यरुशलेम गइनै, मने वैने उहिनसे डराइल रहैँ काहेकि पहिले तो शाऊल विश्वासीहुँक्रहन पिट्ना काम करैँ। बरनाबास नाउँके एकजाने विश्वासी शाऊलहे प्रेरितहुँक्रहनथे लैगिनै ओ शाऊल कैसिके साहासके साथ दमस्कसमे परचार कर्नै कैके वैने प्रेरितहुँक्रहनथे बतैनै। तब्, चेलाहुँक्रे शाऊलहे स्वीकार कर्नै।

यरुशलेममे हुइल सतावतसे भागके कुछ विश्वासीहुँक्रे एन्टिओखियाके शहरमे गइनै ओ येशूक् बारेमे परचार कर्नै। एन्टिओखियके धेउरे मनइ विश्वास कर्नै। बरनाबास ओ शाऊल यी लावा विश्वासीहुँक्रहन येशूक् बारेमे आउर धेर बात सिखाइ ओ मण्डलीहे बलगर बनाइ गइनै। येशूमे विश्वास करुइयन सुरुमे यिहे एन्टिओखियामे ‘ ख्रिष्टियान ’ कहनै।

एकदिन, जब् एन्टीओखियामे रहल ख्रिष्टियानहुँक्रे उपवास ओ प्रार्थना, तब् पवित्र आत्मा वैनहे कहनै, “मोर लग् बारनाबास ओ शाउ,ल हे ऊ कामके लग् अलग् करो, जौन कामके mग् मई वैनहे बोलैले बाटुँ।” उहेमारे एन्टिओखियाके मण्डली बरनाबास ओ शाऊलके लग् वैने प्रार्थना कर्नै ओ आपन हात दुनुहुकेमे धर्नै। ओ वैनहे येशूक् बारेमे आउर धेर ठाउँमे सु–समाचार सुनाइ पठैनै। बरनाबास ओ शाऊल धेरे जातजातिक् मनइहुक्रहन शिक्षा देनै, ओ धेरे मनइहुँक्रे येशूमे विश्वास कर्नै।