14. उजडो ठाउमे घुमत पेती

सिनै पर्वतमे अपन करार दईके फिर परमेश्वर इस्राएलीनके प्रतिज्ञाके देश घैन लैजान लग्गओ, जौनके कनान देश फिर काहात रहए। बादरकी खम्बा बिनकी अग्गु-अग्गु कनान घैन लैजात रहए और इस्राएली बुक पछ्याई।

परमेश्वर अब्राहामके, इसहाक और याकुबसंग बो देश बिनकी सन्तानके देमंगो कहीके प्रतिज्ञा करी रहए, पर बो समयमे हुना गजब समुदायके आदमी बैटत रहए। बिनके कनानी काहात रहए। कनानी परमेश्वरके पुजत नारहए और बाकी आज्ञा फिर नामानत रहए। बे ठग्ना देब्तनके पुजत रहए और गजब अधर्मी काम करत् रहए।

परमेश्वर इस्राएलीनके कही, “बे हुना राहानवाले सबए कनानीनके प्रतिज्ञाकी देशसे हटानके और बिनकीसंग कोई मेलक सम्झौता या बिहा नाकारन। बिनकी मुर्तीनके पुरा रुपसे खतम कारनके। अगर तुम मेरी आज्ञा नामानईगे तओ, तुम मिर सट्टामे बिनकी मुर्ति पुजईगे।”

जब इस्राएली कनानकी सिमानामे पुग्गए, मोशा इस्राएलको सब कुलसे एक-एक करके बारा जना आद्मिनके छानी। बा बे आद्मिनके बो देशकी खबर बुझनके जासुसके रुपमे पठाई। कनानी तगडे रहए या निर्धा हए कहेसे बिषयमे चियो कारन तानी फिर बिनके पठाई रहए।

बे बारा जना आदमी चालिस दिनसम कनानमे घुमतए रहे और तओफिर बे घुमक आइगए। बे आद्मिनके कही, “हुनाकी भुमि त गजब मलिलो और गजब फसल होन खाल रहए।

तओ तुरंतए दूस्रे दुई जासुस, कालेब और यहोश चाही यैसे कही, “जा सही हए कि कनानके आदमी ढेगे और तगडे हए, पर गौसय हम बिनके परास्त कारन सिखंगे

पर आद्मि कालेब और यहोशुकी बात ना सुनीअ बे मोशा और हारुनसंग गुस्सई गए और कही,“तुम कहे हमके अैसो डरौनो ठाउमे लाए? लडाईमे मरन और अपन बैयर और बच्चनके दास बनानसे त बरु मिश्रदेशमे बैठते तओ हुईजैतो।” फिर मिश्रदेशमे घुमाएके लैजान तनी एक जना नया अगुवा माग करी।

जा देखके परमेश्वर गजब सिखाई और भेटनबालो पल्लीमे आइगओ। परमेश्वर कही,“ मेरी बिरुद्धमे बिद्रोह कारनकी कारणसे तुम सब जना जा उजाड स्थनमे भौतारत नेगैगे। कालेब और यहोशु बाहेक २० बर्षसे उपरके सब हिनई मरंगे और प्रतिज्ञाकी मुलुक भितर छिरन नापाबैगे।”

जब आदमी जा बात सुनी, अपनए पाप करो समझके बे गजब दुखि हुइगाओ। बे अपन हतियार लई और कनानके आदमी आक्रमण कारन गए। मोशा बिनके हुना नाजानके चेतावनी दई काहेकी परमेश्वर बिनकी संगमे रहए, पर बे बाकि बात नासुनी।

हुना लडाईमे परमेश्वर इस्राएलीनके संग नागओ, तही बे पराजित हिगए और गजब जनई मरे। तओ इस्राएली कनानसे घुमीगए और चालिस बर्ष समले उजाड स्थानमे घुमतए रहे।

चालिस बर्ष समले उजाड स्थानमे घुमत पेटी परमेश्वर इस्राएलीनके झुटाई दई। बा बिनके स्वर्गसे रोटी दई, बो रोटीके “मन्न” काहात रहए। बा बिनकी राहान बालो पालमे खान तानी बुट्टी फिर होए हेतु बट्टाईकी भिड फिर पठाई। बे सब समय भर परमेश्वर बिनकी कपडा और जुत्ता फटनसे बचाई।

परमेश्वर बिनके चट्टानसे पानी दई। इत्तो होतए सोत फिर, इस्राएली परमेश्वर और मोशाकी आरोप लगाई बो फिर, अब्राहाम, इसाहक और याकुबसंग अपनी बाधो भओ प्रतिज्ञामे परमेश्वर विश्वासयोग्य रहए।

एकचोटी, जब आद्मिनसंग पिनके ताही पानी नारहए, परमेश्वर कही,“चट्टानसे कही और बो मैसे आबैगो।” पर मोशा सब आदमीकि अग्गु मस्कनकी सट्टामे दुई चोटी लट्ठीसे मारके परमेश्वरकि अनादर करी। चट्टानसे पानी त आओ पर परमेश्वर मोशासे गुस्साई गओ और कही, “ तए प्रतिज्ञाकी मुलुक भितर घुसन नापाबईगो।”

उजाड स्थानमे घुमत पेति चालिस बर्ष पछ्छु, परमेश्वरकी बिरुद्धमे बिद्रोह कारन सब इस्राएली मरी गए रहए। तओ फिर परमेश्वर फिर आदमीनके प्रतिज्ञा करो मुलुककी टिकारे लईगओ। मोशा सब बुड्डा हुईगओ रहए, तही परमेश्वर यहोशुके बे आदमी नेतृत्व कारन छानी। परमेश्वर मोशाके जा फिर प्रतिज्ञा करी कि एकदिन मोशा जैसो दुस्रो एक जनई अगमवक्ता पठामंगो।

तओ परमेश्वर मोशाके पहाडकी चुतियामे जानके कही, ताकी बा प्रतिज्ञा करो मुलुक देखन सिकए। मोशा प्रतिज्ञा करो मुलुक देखन पाई पर परमेश्वर मोशाके घुशन नादई। तओ फिर मोशाकि मृत्यु हुइगाओ, और तिस दिनसमले इस्राएली बाकि तही शोक मनाई। यहोशु बिनकी नया अगुवा हुइगाओ। यहोशु एक अछ्छो अगुवा रहए काहेकी परमेश्वरमे भर परत रहए।