18. विभाजित राज्य

गजब बर्ष पिच्छु, दाऊदकी मृत्यु भओ और बाको लौणा सोलोमन इस्राएल उपर शासन कारन लागे। परमेश्वर सोलोमन संग बोली और बाके सबसे जध्धा का बात कि चाहाना हए कहीके पुछी। सोलोमन ज्ञान-बुद्धि मागी तओ परमेश्वर प्रसन्न हुईगओ और बाके संसारको सबसे जध्धा बुद्धिमान आदमी तुल्याई। सोलोमन गजब बात सिकी और एक बुद्धिमान न्यायकर्ता भओ। परमेश्वर बाके गजब सम्पन्न फिर बनाई।

यरुशलेममे, सोलोमन बा मन्दिरकि निर्माण करी जौन बाको दौवा दाऊद बनानके योजना करी रहए और बाकि ताही समान जम्मा करे रहए। आदमी अब परमेश्वरके पुजन और भेट होन बालो पल्लीको सट्टा मन्दिरमे बलि चढाई। परमेश्वर बो मन्दिरमे उपस्थित रहए। तओ बा अपन आद्मिन संग रहो।

पर सोलोमन दुसरे देशके लौडीयानसे प्रेम करी। बा करिब १,००० जना लौडीयन संग बिहा करी, और परमेश्वरकी अनाज्ञाकारी हुईगओ। जे लौदिया मध्धे जब जनई दुसरे देशसे आए रहए तओ अपन संग अपनी देवता लाई रहए बाके बे पुजतए रहे। जब सोलोमन बुढ्डा भओ, बो फिर बिनकी देवताके पुजन लागो।

परमेश्वर सोलोमन संग गुस्सनो रहए तओ बाको अविश्वासनियताकी कारण दण्ड स्वरूप, बा सोलोमनकी मृत्यु पश्चात इस्राएल राष्ट्रके दुई राज्यमे बिभाजन कारन प्रतिज्ञा करी।

सोलोमनकी मरो तओ बाको लौणा, रहोवाम, इस्राएलको राजा बने। रहोवाम एक मुर्ख आदमी रहए। इस्राएल राष्ट्रको पुरा आद्मि बाके राज्याभिषेक करन एकसाथ भेला हुई गए। बे रहोवामके सोलोमन राजा कर्रो परिश्रम कारन लागो और कर तिरन लगाओ कहीके गुनासो करी।

रहोवाम मुर्खतापुर्वक बिनके जवाफ दई, “ मिर दौवा कर्रो परिश्रम कारन बालो हए कहीके तुम सोचत हओ, पर मए तुमके बिनसे जध्धि परिश्रम करन मगामंगो और बासे जध्धा सजाय देमंगो।”

इस्राएल राष्ट्रके कुल मध्ये दश कुल रहोवामकि बिरुद्धमे बिद्रोह करी। केवल दुई कुल ईकल्लो बाके विश्वास करी। जे दुई कुल यहूदाके राष्ट्र भए।

रहीवामके बिरुद्धमे बिद्रोह कारन बालो इस्राएलको और दश कुल, यारोवाम नाउ कहान बालो एक जनई आदमीके अपन राजा होनके नियुक्त करी। बे अपनो राज्य देशकी उत्तरी भागमे खडा करी और बाके इस्राएलकी राज्य बनाई।

यरोबाम परमेश्वरकी बिरुद्धमे विद्रोह करी और आदमीनके पाप कारन लगाई। यहूदाकी राज्यमे रहो मन्दिरमे जाएके परमेश्वरकी आराधना कारनको सट्टा बा आद्मिनकी ताही आराधना कारन बालो दुई मुर्ति बनाई दई।

यहूदा और इस्राएलराज्य दुश्मन हुई गए और घरीघरी एक दुस्रेक बिरुद्धमे लडाई करतए रहे।

इस्राएलकि नया राज्यमे, सब राजा दुष्ट रहए। जे राजा मध्य गजब जनई दुसरे इस्राएलनसे मरे जो बिनकी ठाउमे राजा होनचाहत रहए।

इस्राएल राज्यके सब राजा और गजबसे आदमी मुर्तिपुजा करी। बिनकी मुर्तिपुजाके काम गजब व्यभिचार और कभी कभा त बलि बलि समेत सामिल करी

यहूदाको राजा दाऊदकी सन्तान रहए। जे राजा मध्ये कोई अछ्छे आदमी रहए जौन न्यायपुर्वक राज्य करी और परमेश्वरके रोजी। पर यहूदाके कोई राजा दुष्ट और भ्रष्ट रहए तओ बे फिर मुर्तिपुजा करी। कोई राजा त ठगो देवताकी ताही अपनी बालबच्चाके समेत बाली चढाई। यहूदा प्राय गजब आदमी फिर परमेश्वरकी बिरुद्धमे बिद्रोह करी और दुसरे देवतनके पुजी।