6. परमेश्वर इसहाकके दई

अब्राहाम बुढों भओ बेरा, बोको लौणा, इसहाक, एक तगडो आदमी हुईगओ रहए। जहेमारे अब्राहम अपन एक नोकरके अपनो देशमे इसहाकके ताहीं एक बैयर ढुणनके पठाएई।

अब्राहम अपनो बैठनबारो देशघेन लम्बो डगर पणत् रहए। परमेश्वर बो नोकारके रिबेका नामकि एकजनाई लौणिया ठिना लाई। बो अब्राहामको भैयाकी नतनिया रहए।

रिबेका अपन घरबारेनके छोडके बो नोकर संग इसहाकके घरमे जानके राजी हुईगई। बो पुगीखिना इसहाक बोकेसंग बेहा करलई।

गजब समय पिछ्छु, अब्राहामको मृत्यु हुईगओ तओ परमेश्वर बोकोसंग बधो भओ सब करार अब इसहाकमे सरिगओ। परमेश्वर अब्राहामको अनगिनती सन्तान होमंगे कहीके प्रतिज्ञा करी रहए, पर इसहाक कि बैयर रिबेकाको सन्तान हुई नाएपाई रहए।

इसहाक रिबिकाकी ताहीं प्रार्थना करी, तओ परमेश्वर बोके कोखमे जुरिया बच्चा दई। बे दुई बच्चा रिबेकाको पेटभितर रहए। तभी एक दुसरेसे लणन लागे, जहेमारे रिबेका परमेश्वरसंग जा का होत हए कहीके पुछी।

परमेश्वर रिबेकासे कही, “तिर भितर जे दुई लौणासे दुई राष्ट्र होमंगे। बे एक दुसरेसे लड़ंगे और बणो लौणा छोटे लौणाको सेवा करैगो।”

जब रिबेकाको लौणा जल्मी गओ, बणो लौणा लाल और बारए बार रहए। तओ बे बोको नाम एसाब धरी। पर छोटोचाही अपन हात बणो लौणाको यणी पकणके निकरो और बे बाको नाउं याकुब धरी।