9. परमेश्वरसे मोशाकी बोलाही

योसेफको मृत्यु पिछ्छु, बिनके सब नातेदार मिश्र देशमे बैठन लागे। बिनको सन्तान फिर गजब बर्षतकले लगातार हुनए बैठन लागे और बिनके गजब सन्तान हुइगए।

सयों बर्ष पिछ्छु इस्राएलीनको संख्या गजब बढीगओ रहए। मिश्र योसेफ और बो बिनको करो काम सब भुलगए रहए। बे इस्राएलीसंग डरान लागे कहेकी बिनको संख्या गजब रहए। तही बो समयमे मिश्रदेशमे राज्य कारनवालो फारो इस्राएलीनके मिश्रनके दास बनाई।

मिश्रवाले इस्राएलीनके गजब घर और पुरा सहर समेत बनान लगाई। कर्रो कामसे बिनको जीवन अगठो बनाईदई, पर परमेश्वर बिनके आशिष दई, और बिनको सन्तान और बढत् गए।

इस्राएली गजबसे गजब बच्चा जन्माई रहेहए कर्के फारो देखि, तही बो अपन मनईनके सब इस्राएलीन के बच्चाके नील नदियामे मारन आदेश दई।

कोई एक इस्राएली बैयर एक लौणा जन्माई। बो और बोकि लोगा अपन सक्दो समयभर बो बच्चाके लुकायके धरी।

जब बो बच्चाको अैया-दौवा बोके और समय लुकान नासिके, बोके मरनसे बचान बे एक डलैया बनाई के बो बच्चाके बहेभितर धरदई और नील नदियाकी किनारे नर्कुटिकी झड्मदियारोकी बीचमे छोड दई।

फारोकी लौडीया बो डलैयाके देखी तओ बो भितर का हए कहिके खोलके देखी। हब बो बच्चाके देखी, बो बहे बच्चाके अपनी लौणाके रुपमे धरी। बो एक इस्राएली बैयरके बो बच्चाको रेखदेख कारन तानी रुपैया दईके रखाई पर बो बियर बच्चाको अपनी अैया रहए कर्के बुक पता नाहोत हए। जब बो बच्चा अब दुध खान नापडन जित्तो बडो भओ, बो बैयर बोके फारोकि लौडीया ठीना पठाई दई जो बोको नाम मोशा धरी।

एकदिन, जब मोशा बडो हुई गओ रहए, एक मिश्र एक इस्राएली दासके मारत देखी। मोशा अपन इस्राएली मनईके बचान डुडी।

जब मोशा अपनएके कोइ नादेखत हए करके सोची और बो मिश्रीके मार्के बोके गाडदई। पर मोशा बो मिश्रके मारी तओ कोइ नादेखि रहए।

जब फारो मोशाकी करो भओ हत्याकी बारेमे पता पाई, बो मोशाके मारन खोजी। तही फारोकि सेनासे बचनके मोशा मिश्रदेशसे उजाड स्थानमे आइगओ।

मिश्रदेशसे दुर बो उजाड स्थानमे मोशा एक गोठालो बनो। बो हुनाकी एक लौदियासे बिहा करलई।

एकदिन जब मोशा अपन भेडानकी लाख्बारी करत् रहए, बो एक झुडा देखि जो आगी लगत रहए। पर बो झुडा जलके भसम नाभओ। बो झुडाके और अच्छेसे देखन तानी मोशा बुक डिगई गओ। जब बो बहे ढुगनवालो झुडाकी ठिना पुगो, परमेश्वर कही, “मोशा, तिर जुता खोल। काहेकी तय पबित्र जमिनमे ठाडो हए।”

परमेश्वर कही, “मए अपन आद्मिनके कष्टमे देखो हओ। मए तुक फारो ठिन पठामंगो ताकी इस्राएलीनके मिश्रदेशकि दासत्वसे छुटाएके लाबैगो। मए बिनके कनानको देश देमंगो, बो देश मए अब्राहाम, इसाहक और याकुबसंग प्रतिज्ञा करो रहओ।”

मोशा पुछी, “ आदमी मूस कौन पठाई हए करके पुछंगे, मए का कयहओ?” परमेश्वर कही, “मए हओ, जो माए हओ। बिनसे अइसे कही दिए, ‘मए हओ’ कहानवालो मोके तुमहर ठिन पाठाइ हए। बिनके जा फिर कहीए, ‘याहोवे, तुमहार दौवाक पुर्खा अब्राहाम, इसहाक और याकुबके परमेश्वर’। मिर नाओ सदा-सर्बदाको ताही जहे हए।”

मोशा डरानो रहए और फारो ठिन जानके नाचाहत रहए कहेकी अपनए ठिकसंग मस्कन नासिकन बो सोची रहए, तही परमेश्वर मोशाको भैया हारुनके बुक संगए सहायताको तही पठाई। फारो कर्रो हे कहीके परमेश्वर मोशा और हारुनके सचेत कराई।