3. हौल्ड

बादौ बेला का पिछु, संसार गाश बादौ मानुषा थाक्दै थै। हौतैने वाल मारे आई रौल्टु फिरी थै। हौई हौतेग मारे थयौ कि परमात्मा ऐ एक बौडौ हौल्डे सैब संसार ला खौत्म कौरमै सुनचुई।

पौर परमात्मा नूह का खुश थयौ। हौसौ मार मानुषा माज थाक्दौ एक धर्मी मानुष थयौ। परमात्मा ऐ नूह ला बौलुन्दौ कि हांऊ ऐक वाल बौडौ हौल्ड आन्दौ स्यासु। हौई कारण ऐ, परमात्मा ऐ नूह ला ऐक बौडौ नाव जुरयामै ला बौलुन्दौ।

परमात्मा ऐ नूह ला लगभग रा यौ दुई बीशे मीटौर लामौ, बीशो त्रोन मीटौर ब्युलौ आई तेराह यौ आधौ मीटौर ऊशटौ नाव जुरयामै ला बौलुन्दौ। नूह ला हौसौ नाव दुरारौ जुरयानौ स्या थयौ आई हौतिज कै त्रोन तल, बादौ कौमरा हौरी, एक छापार आई एक खिडकी जुरायानौ स्या थयौ। हौसौ नाव नूह, हौतिन रौ पैरैहौरी, आई माटी गाश रै सैब किस्म रौ पशुहौर ला हौसौ बाढ का बौचाएस।

नूह ऐ परमात्मा रौ बातै ला मौन्याऊन्दौ। हौतिनै आई हौतिन रौ छैल्डुपैरै ऐ हौत्यौ ऐ नाव जुरयाऊन्दौ जैव परमात्मा ऐ बौलुन्दौ थयौ। क्यु बौलता हौसौ नाव बादौ बौडौ थयौ हौतिर रौ तैईऐ हौतिज ला जुरयामै ला बादौ बौरौष लागुन्दौ। नूह ऐ मानुषा ला आछदौस्या हौल्ड रौ बारै कै चेतायाऊंदौ आई हौतैन ला परमात्मा बिलै फिरमै ला बौलुन्दौ, पौर हौतैनोरिऐ हौतिन गाश विश्वास नौकौरुन्दौ।

परमात्मा ऐ नूह आई हौतिन रौ पैरै ला आपरौ तैईऐ आई पौशुहौर रौ तैईऐ क्यालाखो खाऊ कौठा कौरमै ला हुकूम बि दैऊन्दौ। जैतरै सेब त्यार थयौ, तै परमात्मा ऐ नूह ला बौलुन्दौ कि हौई बेला हौतिन रौ, हौतिन रौ देन रौ, हौतिन रौ त्रोन छैलडु पैरै रौ, आई हौतैन रौ देनीपैर रौ-पुरा मिलायाई आठ मानुषा रौ नाव कै नाशनौ स्या थयौ।

परमात्मा ऐ सैब पौशु सी पक्षी रौ बिज सी पौशौ ला नूह गाच्छै बैजुन्दौ ताकि हौतैने नाव कै नाशसा आई हौल्ड रो बेला कै बौचसा। परमात्मा ऐ हौयौ सैब किस्म रौ पौशु हौर रौ सात पौशौ सी सात बिज ला बैजुन्दौ जून बलि बैजमै काम आच्छेस। जैतरै हौतैनै सैब नाव कै बितै पोच्छै तै परमात्मा ऐ आपुए नाव रौ दवार ला बौन्द कौरून्दौ।

तै गौएन लागनौ शुरु फिरुन्दौ, आई गौएन लागैन थाकुन्दौ, लागैन थाकुन्दौ। दुई बिशौ दयार सी दुई बिशौ राच बिना रुकुई गौएन लागैन थाकुन्दौ। संसार गाश रौ सैब चीज, हौन्चै सेग कि ऊशटौ का ऊशटौ पर्वत बी पानी कै डुबुन्दौ।

जून मानुषा सी पौशु हौरी नाव कै थै हौतैन ला शौठयाई, शुकौ जागा गाश थाकदै सैब जीव मौरुन्दै। हौसौ नाव पानी गाश तैरयाइएन थाकी आई नाव बितैरौ सैब चीज ला डुबनौ का बौचाउन्दौ।

गौएन रुकुई पिछु, पांच मास सैक हौसौ नाव पानी गाश तैरयाइएन थाकी, आई हौतादु काल पानी काम फिरैन थयौ। तै ऐक दयार हौसौ नाव ऐक पर्वत रौ चोटी गाश नाशी टेकयाई, पौर संसार आई भी पानी कै डुबी थयौ। त्रोन मास पिछु, उतुरतुरी पर्वतहौर रौ चोटीहौरी देखनौ आच्छी।

तै आई दुई बिशौ दयार तादु, नूह ऐ ऐक काव ला पानी शुकिया कि नुशुकि शामैला बाए बैजुन्दौ। हौसौ काव शुकौ जागा लोरैन औरु-पौरु उडयान थाकुदौ, पौर काव ला शुकौ जागा किन्चे नौपौरुदौ।

तै पिछांए का नूह ऐ एक चाकुर ला बाए बैजुन्दौ। पौर चाकुर ला बी शुकौ जागा नौपौरुन्दौ, तै हौसौ नूह गाच्छै वापिस आच्छुन्दौ। एक साप्ता पिछु हौतिनै हौसौ चाकुर ला फिरी बैजुन्दौ, आई हौसौ चाकुर आपरौ खाक्कै एक जैतून रौ बारचौ गिनुई वापिस आच्छुंदी। पानी गौटैन थयौ, आई बोटा हौरी फिरी राजैन थयौ।

नूह ऐ एक सप्ता आई पौखुन्दौ आई त्रोन बैरै हौसौ चाकुर ला बाए बैजुन्दौ। ईमबरी, हौसौ चाकुर ला बैशमै जागा पौरुन्दौ आई हौसौ वापिस नाछुन्दी। पानी शुकैन थयौ!

परमात्मा ऐ दुई मास पिछु नूह ला बौलुन्दौ, “ऐ तु सी तैरौ पैरै आई सैब पौशु हौरी नाव का बाए निकलौ। ग्याक छैलडु पैरै, कानालडु पैरै–कौ कानालडु पैरै पैदा कौरौ आई संसार ला भौरयाव।” तै नूह सी आपरौ पैरै नाव का बाए आछुन्दै।

नूह नाव का बाए आच्छी पिछु, हौतिनै ऐक वेदी जुरयाई आई बलि रौ सैब किस्म रौ पौशु हौरका एक्या ला बलि चढायाई। परमात्मा हौसौ बलि का खुश फिरुन्दौ आई नूह सी आपरौ पैरै ला आशिरबाद दैऊन्दौ।

परमात्मा ऐ बौलुन्दौ, “हांऊ प्रतिज्ञा कौरसु कि मानुषा ऐ खौटुदौ मार कौरौम रौ तैईए हांऊ ऐ कादुई माटी ला शराप नैदैऊ आई हौल्ड ऐ संसार ला खौत्म नौकौरू, मानुष ता लौऊडी बैरै काए पापीस।”

तै परमात्मा ऐ आपरौ वचन रौ निशान रौ रुप कै पेहला तिरालमैच ला जुरयाऊन्दौ। जैतरै बी आसमान कै तिरालमैच दैखनौ आछैस, तै परमात्मा याद कौरैस कि आपुए की वायदा कौरिस आई हौतयौए आपरौ मानुषा बि याद कौरसा।