4. अब्राहम सी परमात्मा रौ वायदा

हौल्ड का बादौ बौरौश पिछु, संसार गाश बादौ मानुषा थाकदै थै, आई हौतैनोरिए फिरी परमात्मा रौ आई ऐक-आईक रौ खिलाप पाप खौटी। क्यु बौलता हौतैनोरी सैब ऐखै काद कै बाताईदै थै, तै हौतैनोरी साथ कौठा फिरुन्दै आई परमात्मा रौ संसार भौरयानौ हुकुम रौ बजाए ऐक नगर जुरयाऊन्दौ।

हौतैनौरी वाल शैखी स्या थै, आई हौतैनौरी ला क्यौ जिन्दगी ज्युनौ चान्दौ हौई पाठिए हौतैनोरी परमात्मा रौ हुकुम मौनयानौ नाचाएन थै। होतैनोरिए ऐक हौयौ बि मिनार जुरयानौ शुरु कौरी जून स्वर्ग सैग पोछैस। परमात्मा ऐ शाव कि आगर हौतैनोरी कौठा फिरी बुराई कौरैन थाकता, तै हौतैनोरी बादौ पापी काम खौटी बौलसा।

हौतिरौ तैईए परमात्मा ऐ हौतैन रौ काद ला बादौ आईक-आईक काद कै बौदल्याऊन्दौ आई हौतैनोरी ला सैब संसार गाश फैलायाऊन्दौ। जून नगर ला हौतैनौरीए जुरयानौ शुरु कौरी थयौ हौतिल्ला बाबेल बौलदै, जिर रौ मौतलब “वामंग-थामंग”।

बादौ रा बौरौष पिछु, परमात्मा ऐ ऐक अब्राम नाव रौ मानुष सी बातै बातावी। परमात्मा ऐ हौतिन ला बौली, “आपरौ देश सी खानदान ला शौठयाई हौसौ देश कै नाश जिनचै हांऊ तांऊला दैखासु। हांऊ तांऊला आशिरबाद दिसु आई तांऊका ऐक बौडौ जाति जुरयासु। हांऊ तैरौ नाव महान कौरसु। जून तांऊला आशिरबाद दैस हांऊ हौतिन ला आशिरबाद दिसु, आई जून तांऊला शराप दैस हांऊ हौतिन ला शराप दिसु। तैरौ तैईए संसार रौ सैब कुल आशिरबाद पाया सा।”

तै अब्राम ऐ परमात्मा रौ बातै मौन्याई। हौतिनै आपरौ सैब सेवक हौरी आई आपरौ सैब जैजाद हौरी, आपरौ देन सारै ला गिनुई हौसौ देश कै, कनान देश कै नाशुदौ जून परमात्मा ऐ हौतिन ला दैखाई थयौ।

जैतरै अब्राम कनान पौछौ तै परमात्मा ऐ हौतिन ला बौलुन्दौ, “आपरौ चारै बिलै शाव। हांऊ तांऊला हौई सैब देश दिसु आई तैरौ वंशज हौरी सौदा ला हौज गाश आकत्यार जाग सा।” तै अब्राम हौसौ देश कै बौसुन्दौ।

मलिकिसिदक नाव रौ ऐक मानुष थयौ जून सैबका बौडौ परमात्मा रौ यहुदी याजक थयौ। ऐक दयार जैतरै अब्राम लडाई कौरी आछैन थयौ तै हौसौ सी अब्राम बैठुई। मलिकिसिदिक ऐ अब्राम ला आशिरबाद दैऊन्दौ आई बौलुन्दौ “सैबका बौडौ परमात्मा जून स्वर्ग सी संसार रौ मालिकस हौसौ तांऊला आशिरबाद दैन्नौ चान्दौ।” तै अब्राम ऐ लडाई कै जितिउन्दौ सैब चीज रौ दसवां भाग मलिकिसिदक ला दैऊन्दौ।

बादौ बौरौष बिति, पौर आई बी अब्राम सी सारै रौ ऐक बी छैल्डु नाई थयौ। परमात्मा अब्राम सी बातै बातायुन्दौ आई दुबारा वायदा कौरुन्दौ कि अब्राम रौ ऐक छैल्डु फिरैस आई जैव आसमान कै तारौ हौरीस हौतयौए अब्राम रौ बादौ वंशज हुसा। अब्राम ऐ परमात्मा रौ वायदा गाश बिश्वास कौरुन्दौ। परमात्मा ऐ घोषणा कौरुन्दौ कि अब्राम ऐक धौरमी मानुष थयौ क्यु बौलता हौतिनै परमात्मा रौ वायदा गाश बिश्वास कौरुन्दौ।

तै परमात्मा अब्राम सी ऐक वायदा कौरुन्दौ। आम बोलचाल कै, वायदा रौ मतलब दुई पालटी माज ऐक आईक ला काम खौटमै ला ऐक फैसला थाकदौ। परमात्मा ऐ अब्राम सी वायदा हौतरै कौरी जैतरै अब्राम गैहरा नीज कै सुती थयौ, पौर तै बी अब्राम परमात्मा ला शुनी बौलदौ थयौ। परमात्मा ऐ बौलुन्दौ, “ हांऊ तैरौ देन सारा का पैदा कौरी तांऊना ऐक तैरौ आपरौ छैलडु दिसु। हांऊ तैरौ वंशज हौरला हौई कनान देश दैनसू।” पौर आई बी अब्राम रौ ऐक बी छैलडु नाई थयौ।