5. वायदा रौ छैलडु

अब्राम सी सारै कनान पोछी दौश बौरौश पिछु, आई बी हौतैन दुई रौ ऐक बी छेल्डु नाई थयौ। तै अब्राम रौ देन सारै ऐ अब्राम ला बौलुन्दौ, “ परमात्मा ऐ मा ला ईमबऱी सेग छेल्डु जागनौ लायक नुजुरयाईस आई ऐ हांऊ छैल्डु जागमै ला बादौ बुडी सु, शाव, मैरौ दासी हाजिरा ईनचैस। हौस सी बी शादी कौर ताकि हौई माना ऐक छैल्डु जागी बौलैस।”

तै अब्राम ऐ हाजिरा सी शादी कौरुन्दौ। हाजिरा रौ ऐक छैल्डु फिरुन्दौ, आई अब्राम ऐ हौतिन रौ नाव इश्माएल जागुन्दौ। पौर सारै हाजिरा का नौशौंगमाईएन थी। जैतरै इश्माएल तेरह बौरौश रौ थयौ, परमात्मा फिरी अब्राम सी बातायुन्दौ।

परमात्मा ऐ बौलुन्दौ, “हांऊ सैब शक्ति स्या परमात्मा सु। हांऊ तांऊसी ऐक वायदा कौरसु।” तै अब्राम ऐ माटी गाश जुकी दंडवत कौरुन्दौ। परमात्मा ऐ अब्राम ला हौई बी बौलुन्दौ, “ तु बादौ जाति हौररौ बा फिरसै। हांऊ तैरौ सी तैरौ वंशज ला हौतैन रौ आपरौ जागा रौ तैईए कनान देश दिसु आई हांऊ सौदा ला हौतैन रौ परमात्मा थाकसु। तांऊला आपरौ खानदान रौ सैब मानुषा रौ खतना कौरनौ स्या।”

“तैरौ देन सारै रौ ऐक छेल्डु फिरैस—हौसौ वायदा रौ छैल्डु हौएस। हौतिन रौ नाव इसहाक जागै। हांऊ हौतिन सी आपरौ समझौता ला कायम जागसु आई हौसौ ऐक बादौ बौडौ जाति फिरैस। हांऊ ईश्माएल ला बी ऐक बौडौ जाति जुरयासु, पौर मैरौ वायदास इसहाक सी थाकैस।” तै परमात्मा ऐ अब्राम रौ नाव बौदल्याई अब्राहम जागुन्दौ, जिररौ मौतलब “ बादौ मानुषा रौ बा।” परमात्मा ऐ सारै रौ नाव बी बौदल्याई सारा जागुन्दौ, जिररौ मौतलब “बादौ मानुषा रौ माँ या मूलमाता।”

हौतादु अब्राहम ऐ आपरौ खानदान रौ सैब पुंशा पैर रौ खतना कौरुन्दौ। लगबग ऐक बौरौष पिछु, जैतरै अब्राहम रा बौरौष रौ उमौर रौ थयौ आई सारा चार बिशौ दौश बौरौष रौ थी, तै सारा ऐ अब्राहम रौ छैल्डु ला जौनम दैऊन्दौ। जैव परमात्मा ऐ हौतैन ला बौली थयौ हौतैनोरीए हौतिन रौ नाव इसहाक जागी।

जैतरै इसहाक जवान फिरून्दौ तै परमात्मा ऐ हौई बौली अब्राहम रौ बिश्वास रौ परिक्षा मागुन्दौ कि ,“ आपरौ ऐकलौता छैल्डु ला मैरौ तैईए बलि दै।” तै फिरी अब्राहम ऐ परमात्मा रौ बातै मौन्याई आई आपरौ छैल्डु ला बलि चढायामै तैयार कौरी।

जैतरै अब्राहम सी इसहाक बलि चढायानौ जागा कै नाएन थै तै इसहाक ऐ पुछुन्दौ, “ हे बा, तामौर कै बलि ला दुरा हौरी ता हुन्दौ, पौर बलि ला गाबलु किनचैस?” अब्राहम ऐ बौलुन्दौ, हे मैरौ छैल्डु, परमात्मा बलि ला गाबलु रौ ईनजाम आपु कौरैस।”

जैतरै हौतैन दुई बलि चढायानौ जागा कै पोछै, तै अब्राहम ऐ इसहाक ला भानी वेदी गाश लेटायाऊन्दौ। हौसौ आपरौ छैल्डु ला मारदौ स्याए थयौ कि परमात्मा ऐ बौलुन्दौ ,“रुक्यु! छैल्डु ला नुकसान नौकौरै! ऐ हांऊ जानीसु कि तु मुका डौरदौ सै क्यु बौलता तैईए आपरौ एकलोता छैल्डु ला बी मुका बौचाई नाजागी।”

अब्राहम ऐ हौतिनचै नेरे ऐक गाबलु दैखी जून जाखार हौरकै फौसी थयौ। परमात्मा ऐ इसहाक रौ बौदला कै बलि ला गाबलु सरौ ईनजाम कौरी थयौ। अब्राहम ऐ खुसी-खुसी ऐ गाबलु रौ बलि चढायाऊन्दौ।

तै परमात्मा ऐ अब्राहम ला बौलुन्दौ, “ क्यु बोलता तु माना सैब दैमै ला तेयार थयौ, ईनचै सेग कि आपरौ ऐकलौता छैल्डु ला बी, तै हौई बातै गाश हांऊ तांऊला आशिरबाद दैमै ला वायदा कौरसु। तैरौ वंशज आसमान रौ तारौ का बी बौदी फिरसा। क्यु बौलता तैईए मैरौ आज्ञा ला मौन्याऊन्दौ तै हौई बातै गाश हांऊ तैरौ पैरै द्वारा संसार रौ सैब जाति ला आशिरबाद दिसु।