6. परमात्मा इसहाक ला इन्तजाम कौरदौ स

जैतरै अब्राहम बादौ बुडौ फिरी थयौ हौतरै हौतिन रौ छैल्डु, इसहाक, एक पुंशा रौ ऊमौर रौ फिरी थयौ। हौतिर रौ तेईए अब्राहम ऐ आपरौ ऐक नुकुर ला आपरौ छैल्डु इसहाक ला ऐक देन आनमै ला हौसौ देश कै भैजी जिन्चै हौतिन रौ पैरैजोरे थाकदै थै।

जिन्चै अब्राहम रौ पैरैजोरे थाकदै थै हौसौ देश कै नानौ रौ ऐक लामौ सफर पिछु परमात्मा ऐ हौसौ नुकुर ला रिबका सी मिलायाऊन्दौ। हौसौ अब्राहम रौ आते रौ कानाल्डी थी।

रिबका ऐ आपरौ पैरै ला शौठयाई हौसौ नुकुर सी वापिस नाशमैला मौन्याई। जैवे हौतैने पौछै इसहाक ऐ हौतैस सी शादी कौरुन्दौ।

बादौ बौरौश पिछु, अब्राहम मौरुन्दौ। तै परमात्मा ऐ आब्राहम रौ छैल्डु इसहाक ला, अब्राहम सी कौरुन्दौ वायदा रौ तैईए आशिरबाद दैऊन्दौ। हौसौ वायदा कै परमात्मा रौ ऐक प्रतिज्ञा थयौ कि अब्राहम रौ बादौ वंशज फिरसा। पौर इसहाक रौ देन रिबका रौ छैल्डु पैरै निफरुन्दै।

इसहाक ऐ रिबका रौ तैईए प्रार्थना कौरून्दौ, आई परमात्मा ऐ हौतेस ला जुडवा छौकुर पैरै रौ गर्भ धारण कौरनौ लायक जुरयाऊन्दौ। जैतरै हौसौ छौकुर पैरै रिबका रौ गर्भ कै हे थै हौतैन दुई आपुरी माज लौसेन थै, हौतिज रौ तैईए जिबी फिरैन थैव रिबका ऐ हौसौ परमात्मा ला बौलुन्दौ।

“परमात्मा ऐ रिबका ला बौलुन्दौ,” “तु दुई छैल्डु पैरै ला जौन्म दिसै। हौतैन रौ वंशज दुई खैची खैची जाति हौरी फिरसा। हौतैनौरी आपु माज लौसीसा। पौर बौडौ छैल्डु का जौनमुदै जाति ला लौऊडौ छैल्डु का जौनमुदै जाति रौ आज्ञा मौन्यानौ फिरैस।”

जैतरै रिबका रौ छैल्डु पैरै जौनमुदै, तै बौडौ छैल्डु रातौ आई रोएंदार थयौ, आई हौतैनौरिए हौतिन रौ नाव एसाव जागी। तै लौऊडौ छैल्डु एसाव रौ ऐडी पाई जौनमुदौ, आई हौतैनौरिए हौतिन रौ नाव याकूब जागी।