9. परमेश्वर मूसा के केड़ायाए

यूसुफ गोए जन रअ: तयोमते इनकुअ: सोबेन पेड़ा को मिस्र देश रेगी को ताइ एटेज जना, इनकु ओड़ो: इनकुअ: वंशज को ढेइर साल जकेद मिस्र देश रिगी को ताइ जना ओड़ो: इनकु ढेइर होन को पोसा केद कोअ:। इनकु इस्राएली कजियो ताइनको।

ढेइर साल रअ: तयोमते इस्राएली होड़ो कोअ: लेनेका(संख्या) ढेइर बढ़ावकन ताइ केना ओड़ो: मिस्र देश रेन होड़ो को नअ: ने कजि लाइन एहसान कको ताइन केना चि इनकुअ: देंगा मेनते यूसुफ इसु थिम्बा रिका लअ:। इनकु इस्राएली होड़ो कोएते बोरो जना को चियाची इनकु लेनेका रे इनकुएते इसु थिम्बा को ताइकेना। एनामेनते मिस्र देश रे राइज तन फिरौन इस्राएली होड़ो कोके मिस्री होड़ो कोअ: दासी बाइ केद कोअ:।

मिस्री होड़ो को इस्राएली होड़ो कोके इसु पुरअ: ओड़ा को ओड़ो: नेतअ: जकेद चि इनकु के चिमनङ गी नगर को बबाइ लाइ को मजबूर केद कोअ:। एन कठिन मेहनाइत इनकुअ: जिनगी रे मियद मरंग दुकु बाइ जना, मगर परमेश्वर इनकु के आशीष ओमद कोअ: ओड़ो: इनकुअ: हडो गी इसु थिम्बा होन को होबा जना।

फिरौन नेल केदा चि इस्राएली होड़ो कोअ: इसु थिम्बा होन को होबाव तना, नेयअ: मेनते इनि: अयअ: होड़ो कोके इस्राएली कोअ: सोबेन कोड़ा होन कोके नील नाई रे हुरङ गिड़ी केअते गोए रअ: हुकुम ओमाद कोअ:।

मियद खास इस्राएली एरा मियद खास कोड़ा होन के जनम किजअ:। आए ओड़ो: अयअ: गोमके एन होन के चिमनङ किन उकु दड़ि जना इमनङ किन उकु केअते दोहो किजअ:।

जब एन होन गअ: एंगा-अपु किन इनि: के हडो: थिम्बा ककिन उकु दड़ि जना, दो इनि: के गोजो: ते बचाव मेनते मियद उपलाओ: वाला ढौड़ा(टोकरी) रे साजू केअते नील नाई रअ: गेना रे सरकंडा झुण्ड थला रेकिन दोहो तजा। इनिअ: मरंग दइ (दीदी) ते नेयअ: नेल नङ इनिअ: पहरा केदा चि इनिअ: लोओ: ते चिनअ: होबागअ:।

फिरौन गअ: होन कुड़ी एन ढौड़ा के नेल केअते एना रअ: बितर लोडो केदा। जब इनि: मियद होन के नेल किजअ: दो इनि: के अयअ: होन कोड़ा मनातिङ केअते इदि किजअ:। इनि: मियद इस्राएली एरा के तोअ: पियाव रअ: कमि रे दोहो किजअ:। बेगर सारी केअते गी चि इनि: अयअ: सरती एंगा तनी। जब एन होन मरंग जना दो इनि: के एंगा तोअ: गअ: जरूरत का होबा जना दो इनि: फिरौन गअ: होन कुड़ी तअ: रे इनि: के जिम्मा तजाए। इनिअ: नुतुम मूसा ताइकेना।

जब मूसा दंगड़ा जनाए दो मुसिङ हुलङ इनि: नेल केदा चि मियद मिस्री होड़ो इस्राएली दासी होड़ो के बिड़ाइ तना। मूसा अयअ: गति इस्राएली होड़ो के बचाव रअ: कोशिश केदा।

जब इनि: सोचाव केदाए चि इनि: के जेतय कको नेलिअ:। दो इनि: एन मिस्री होड़ो के गोए केअते इनिअ: लाश के तोपा तदा। मगर मूसा जे रिका लअ: एना के जाए होड़ो नेल लिजअ:।

फिरौन सारी जना चि मूसा चिनअ: रिका कदा। एना मेनते इनि: मूसा के गोगोज रअ: कोशिश केदा, मगर मूसा मिस्र देश ते सुनसान ठयाद रे निर जना। फिरौन गअ: सेना को इनि: के एनता रे कको संगर दड़ि जना।

मिस्र देश ते संगीन सुनसान ठयाद रे मूसा मियद चरवाहा बाइ जना। इनि: एनता रे मियद कुड़ी लोओ: बाला जना ओड़ो: इनिअ: बरिया होन कोड़ा किन होबा जना।

मूसा अयअ: होंजार गअ: मिण्डी कोअ: झुण्ड कोए नेल बाड़ा ताइ केनाए। मुसिङ हुलङ इनि: मियद जुलो: तन झुण्ड के नेल केदा, एना ओंडोरो ताइना मगर का तोरेजो ताइना एनका गी जुलो तन ताइना। एना के नेनेल मेनते इनि: एन झुण्ड तअ: नड़े जना। जब इनि: एना रअ: थिम्बा नड़े ताइकेना दो परमेश्वर इनि: लोओ: जगर केदा। इनि: कजि केदा, “हे मूसा अमअ: जूता के खोलाव तम अम पवित्र ठयाद रे तिंगु कनाम।”

परमेश्वर कजि केदा, “अञङ अञङअ: होड़ो कोअ: दुकु कोञङ नेला कदा। अञङ अमके फिरौन तअ: कुल मेअ: चि अम इस्राएली होड़ो कोके मिस्र देश रअ: बंधुवाई ते ओडोङ आउ कोम। अञङ इनकु के कनान देश ओमा कोअञङ, एन देश रअ: जे अञङ अब्राहम, इसहाक ओड़ो: याकूब लोओ: करार लअञङ।”

मूसा कुली किजअ:, “अगर होड़ो को सरीन को सनङ रेदो ची अञङ के ओकोय कुला कदिजाँ दो अञङ चिनअ: मेनेया?” परमेश्वर कजि केदा, “जे अञङ तनिङ इनि: अञङ गी तनिङ। इनकु के कजियकोमे, ‘अञङ तनिङ इनि: अञङ के अपेतअ: कुला कदिजाँ।’ इनकु के नेयाओ कजियकोमे, ‘अञङ अपेया पुरखा अब्राहम, इसहाक ओड़ो: याकूब गअ: परमेश्वर यहोवा तनिङ।’ अञङअ: नेयअ: नुतुम नङ रअ: तनाइङ।”

मूसा बोरो ताइनाए आद् फिरौन तअ: सेन काए सनङ ताइना चियाची इनि: सोचव केदा चि इनि: बेस ते कजि काए दड़िया। एनामेनते परमेश्वर मूसा गअ: हगा हारून के इनिअ: देंगा लाइ कुल किजअ:।