10. १०. दाहा विपत्ती, (संकट)

परमेश्वराय मुसा आन हरुनाल चेतावनी देदी की फारो हट्टी वि जाय जांहा ते फारो इंही गिया ता तियाहाय आख्य, “इस्त्राएला परमेश्वर रं आखेह, यांआ लोकाहान जां दे.” पेन फारोज तियाहा कायज नाय उनांय आन इस्त्रालाहान नाम जा देसा तियाहान आजी करीन काय केरा खातोर मजबुर केअतलं.

फारो इया लोकाहान जा दा लगातर नकार देतलं आथो. तीमाल परमेश्वराय मिसराम दाहा भयंकर विपत्ती मोकल्या. इयो विपत्तीद्वारे, परमेश्वराय फारोल आन मिसरा देवताहा से आंय अधिक शक्तीशाली हाय इं देखाव्य.

परमेश्वराय नाईल खाडील रक्ताम बदली देदी, पेन फारोय तेबी बी इस्त्राएल लोकाहान नाय जां देदा.

परमेश्वराय पुरा मिसराम डेटके मोकल्यें. डेटकाहान दुर केरा खातोर मुसाल विनंती केअयी पेन बादा डेटकाहान मरा बाद, फारोंय तिया मन कठोर कीई लेदो आन इस्त्राएलाहा मिसरामेने नाय जां देदे.

फाची परमेश्वराय कुटकिया विपत्ती मोकली. तियो बाद तियाय डासाहा विपत्ती मोकली. फारोय मुसा आन हारुनाल हादीन आखेह जर इयो विपत्तीहीन बंद केअहा ता इस्त्राएल लोक मिसर सोडीन जाय सेकताह. जाहा मुसांय प्रार्थना केअयी ता परमेश्वराय मिसरामेने डासाहान दुर केअया. पेन फारोय तिया मन कठीन कीई लेदो आन लोकाहान अलग विईन नाय जां देदा.

इया नंतर परमेश्वराय मिसरा बादा पालतु जनावराहान बिमार किईन माय लाग्य. पेन फारो मन कठोर विई गियो आन तियाय इस्त्राएल लोकाहान जा नाय देदा.

परमेश्वराय मुसाल वाराम खाआ फेका आख्य. जाहा तियाय ऐहकी केअयो ता मिसरा लोकाहा शरीरावे दुख देनारा फोड निगी आला, पेन इस्त्राएली लोकाहान कायज नाय वेअयो. परमेश्वराय फारो मन कठीन की देदा आन फारोय इस्त्राएली लोकाहान अलग विईन नाय जा देदा.

तियानंतर, परमेश्वराय ओले पाडये आन मिसरा खुबज पिके नारा वि गिमे. आन जो केडो बोर निग्यो तियाल माय टाक्यो. फारोय मुसा आन हारुनाल हादीन आख्यों, “ मांयुय पाप केअयोह. तुमा जाय सेकताहा.” शेवटी मुसाय प्रार्थना केअयी की, आकासामेने ओले पडा बंद विई गिये.

पेन फारोय फाची पाप केअयो आन तिया मन कठीण कीई लेदों. तियाय इस्त्राएलाहा अलग विईन नाय जा देदा.

शेवटी परमेश्वराय मिसरावे टिडाहा टला-टला आवा देदा. इया टिडाहांय बादा पिकाहन खाय गिये जियाहान ओलाकी कायज नुकसान नाहा वेअयो.

वापस देवाय आंदाये किई देदो, जों तीन दिही लुग बनलो आथो. इं ओतो आंदारो आथो की मिसरी लोक वोंगा बारे नाहा निग्या. पेन जिही इस्त्राएली लोक आथा तिही उजवडो आथो.

इयो नौव विपत्तीबाद बी, फारोय इस्त्राएली लोकाहां अलग विईन जावनू से नकार देदो. की फारों नाय उनातलं आथो. तियाल परमेश्वराय एक अंतिम (शेवटली) विपत्ती मोकला योजनो बनावी इ फारो मन बदली टाकी.