12. १२. निर्गमन

इस्त्राएली लोक मिस्त्रामेने निगीन खूब खुश आथा. ते आमी दास (गुलाम) नाय आथा, आन तें प्रतिज्ञा देसाय जाता आथी, जों का इस्त्राएल्याहाय मांगल मिसरी लोकां हाय बादो काय देदो, इंही लुग की होना चांदी आन बाकी किंमतीवान वस्तूबी बिहीरी देसा काही केअयो लोका हाय परमेश्वरावे विश्वास (थवले) आन जहा मिसरा मेने ते लोक निग्या तहा ते लोक बी तीयाहां आरी निग्या.

दिहा वादलं तियाहा आगाडी खांब बनी गियो. आन रातीवेल ओ आगी खांब बनी गियो. परमेश्वर वादला खांबामेने आन आगी खांबाम आथो. हमेशा (कायम) तियाहा आरी-आरी आथो. आन तियाय यात्रा समय तियाहा आगाळी वाट देखावा. की तियाहान फक्त इं केअनु थो की तिया फाचाडी चालतू.

थोडाका वेळाकी, फारो आन तिया लोकाहाय मन बदली लेदो. ते इस्त्राएलाहान फाची गुलाम केरा मागतला. तियाल तियाहांय इस्त्राएलीहां फाचाडी लाग्या. ओता परमेश्वर आथो जियाय तियाहा मन बदलुलं आथो तियाय इया खातोर ऐहकी केअल की तिया इच्छा आथी की हर एक फारोले आन मिसरी बादी देवी-देवता से तोअ, यहोवा खुब शक्तीशाली हाय.

जाहां इस्त्राएली लोकाहाय मिसरी सेनाल देखीता, तो तियाहा न मालूम वेअयो की ते फारो सेना आन लाल समुद्रा निसमे फसी गेहला आया. ते खुब धाकाय गिया आन येडा लाग्या. “ आमाहाय मिसरों कहा सोडयं? आया मोअनारा हाय.”

मुसाय इस्त्राएलीहान आख्य “ बिया बंद केरा. परमेश्वर आन तुमा खातोर लढाई केरी. आन तुमाहान वाचावी नाहा परमेश्वरा मुसाल आख्य “ इया लोकाहान लाल समुद्रावेल आमाडी यालाआंख.

ताहां परमेश्वराय तिया वादला खांबाल इस्त्राएलीयाहां आन मिसरी लोकाहा निसमे थवी देदो. ताकी मिसरी लोक इस्त्राएलीहान देखी नाय सेक.

परमेश्वराय मुसाल समुद्रावे तिया आथ केरा आख्य फाची परमेश्वराय नारा की समुद्रा पांय हुदी आन डावी वेबीवेल किई देद, जियाकी समुद्राय एक रस्तो बनी गियो.

इस्त्राएली लोक तियाहा बेनीवेल पांया थिंनीही आरी हुकाली जमिनीवेने आगाडी चालता आथा.

ताहां परमेश्वराय तियों वाटीवेने वादलाल इसी लेदो की मिसरी लोक इस्त्राएलीहान वाचायन जाता देखे. मिसरी लोकाहाय तियाहान तेअरा खातोर तियाहा फाचाडी लागनू निर्णय लेदो.

शेवटी तियाहाय समुद्रा रस्तामेने तियाहा पिछो केअयो, पेन परमेश्वराय मिसरी लोकाहन काबरावी देदा. आन तियाहा रथाहान ओटकावी देदा. तेअ बोंबला लाग्या, “ नाहा इस्त्राएलीहावेलने परमेश्वर लढाई केहे.”

बादा इस्त्राएली समुद्रा बिहरी वेल पोची गिया, ताहां परमेश्वराय मुसाल आख्य की तूं फाची पांयावे हाथ फिरवे. जांहा मुसाय ऐहेकी केअयो, ता पांय मिसरी सेना उपे आवी पडयो आन तियाहा हाल सामान्य वि गियो. बादी मिसरी सेना डुबी मोअयी.

जांहा इस्त्राएली लोकाहाय देख्यो की मिसरी लोक मोय गिया ताहा तियाहांय परमेश्वरावे विश्वास केअयो. तियाहांय विश्वास केअयो की मुसा परमेश्वरावेलने भविष्यवक्ता आथो.

इस्त्राएली लोक तियाल खुब खुश आथा की काहाकी परमेश्वराय तियाहान मोअनुसे आन गुलाम वेअनुसे वाचावी लेदला आथा. आमी ते परमेश्वरा आराधना केरा आन तिया आदन्या पालन केरा खातोर ते अलग वेअला आथा. इस्त्राएलीहांय तियाहा स्वतंत्रता सण मनावा खातोर आन परमेश्वरा वाहावा केरा खातोर काहीक गाने बी आख्यें. काहाका तियाहान मिसरी सेनाइहीने वाचावले आये.

परमेश्वराय इस्त्राएली लोकाहान प्रत्येक वोराहाल एक सण मनावा आदेश देदो इं इत केरा खातोर की केह्की परमेश्वराय मिसरी लोकाहान हारावी देदला आन तियाहान गुलाम बननू से अलग की देदा. ओ उनकाल (वल्हाडन) नू सण आखवाम आलो इयाय तियाहान एक वगर गुना मेढो बलि केअनू आथो. तियाल पुजनू आथो आन तियाल वगर खारा माडों आरी खावनू आथों.