18. १८. वाटालों राज्यों

दाऊद राजांय चालीस वोरेहें राज्य केअयी राज्य केअयो तांहा तोअ मोय गियो आन तिया पोयर सुलैमानाय इस्त्राएलावे राज्य केरा शुरवात केअयी परमेश्वराय सुलैमान आख्यों का तूकाय केरा मागतोंह जो परमेश्वर तोअ खातोर केअ. सुलैमानाय परमेश्वरावे खुब बुध्दी मागी. इयो गोठीका परमेश्वराल खुश केअयो तियाल परमेश्वराय सुलैमानाल जगाम बादाहार बुध्दीमान पुरुष बनाव्यो. सुलैमान खुबुज गोठ्या हिक्यों आन तो एक बुध्दीमान राज्यकर्ता आथो परमेश्वराय तियाल खुब धनवान बी बनाव्यो.

यरुशलेयाम सुलैमानाय तिया मंदीराल बनाव्यो जिया खातोर तिया बाहाकाय योजना बनावली आथी आन सामान बी एकहो केअयो. आनी लोक मिलापवाला तंबूसे मंदीराम आराधना केअयो आन तिया खातोर बली चढवूतला आथा परमेश्वर मदिराम आवतलो आथो आन तिही तोअ तिया लोकाही आरी रेवलो आथो.

परंतु सुलैमानाय बिहारा दोसा स्त्रियाहावे प्रेम केअयो तियाय खुबुज म्हणजे लगभग १००० स्त्रियो आरी वोराड किईन परमेश्वरा अवज्ञा केअयी. तियोह मेने खुबुज बिहीरा देसामेने आन तियोह (सेवा चाकरी) केरा लाग्या . जाहा सुलैमान जायो विई गियी ताहा तोअ बी तियोह देवताहा सेवाचाकरी केरा लाग्यो.

इयो करणाकी परमेश्वर सुलैमानासे क्रोधीत आथो तियाम आरो का तो इस्त्राएलादेसा बेन राज्याम वाहीन तियाल दंड दिही. तो सुलैमाना मोअनू बाद एहकी केरी.

सुलैमाना मोअनू बाद रहबाम राजा बन्यो. इस्त्राएल देसा बादा लोक तियाल तिहाहा राजा रुपाम स्वीकार केरा खातोर एकठ्ठा वेअया. तियाहांय रहबायाल चुगली केअथी की सुलैमानाय तियाहान खुब कठीण मेहनत केरावली आथी आन खूब कर वसुल केअलो तियाहांय रहबामाल विबंती केअयी का तीयासे कमी काम करावे.

परंतू रहबामाय तियाहान मोडायाकी उत्तर देदो, तुया आसताका माआ बाहाको सुलैमानायतुमाहान कठीन मेहनत केरावीही आन आंय तूमाहान तियासे बी खुब तकलीप केरावीही.

जाहा लोकाहांय तियासे इं आखता उनाया ता तियामेने काहीका हांय तिया विरूदाम झगडो केअयो. दाहा गोत्राहांय तियाल सोडी देदो तिया आरी आमी फक्त बेन गोत्र आथा तिया बेन गोत्राही बी स्वतः यहुदा राज्यों आख्यों.

बाकी दाहा गोत्राहांय योराबामा नावा एक पुरुषाला राजा बनाव्यों ऐ गोत्र देसा उत्तर-पूर्वा भागाम आथो. तियाहांय स्वतःल इस्त्राएला राज्यों आख्यों.

पेन यारोबामाय परमेश्वरा विरोदाय बलवो केअयो आन लोकाहान पाप केराव्यो तियाय लोकाहा आराधना केरा खातोर बेन मुर्त्या बनाव्या तिया आराधना केरा खातोर नाय गिया.

यहुदा आन इस्त्राएला राज्य शत्रू बनी गिया आन अवसर एक बिजा विरुध्द लेडता आथा (लेडा लाग्या).

इस्त्राएला नवा राज्याम, बादा राजा दुष्ट आथा तियामेने काहीक राजा बना भागता आथा ते इस्त्राएला द्वारे माय टाकाम आला.

इस्त्राएल राज्या बादा राजाहांय आन खुबुज लोकाहांय मुर्तीही आराधना केअयी. जाहा तियाहांय एहेकी केअयो ता ते अवसर वेश्याहा आरी हुवतला आन इंही लुग का कोताक दा मुर्तीही आगाडी वोसरे बली बी केअये.

यहुदा राज्या राजा, दाऊदा वंसज आथा इया राजाहामेने काहीक हारा व्यक्ती आथा जियाहांय न्यायपूर्वक थारान केअयो आन परमेश्वरा आराधना केअयी पेन यहुदा खुबुज राजा दुष्ट आथा तियाहाय दुष्टाई की राज्यों केअयो. आन मुर्तीहीं आराधना केअयी. इंही लुग का तियामेने काहीक राजाहांय सुबी मुर्तीही आगाडी तियाहा पोयरे बली बी केअये. यहुदा खुबुज लोकाहांय परमेश्वरा विरुध्द चुलाया आन विहिरी देवी-देवताहा आराधना केअयी.